Slow Music

第12章 - 第三章:我們的第一次! (第四節)

距離初次直播還有六個星期,Szeyan一個人坐在姐姐開的咖啡店內喝花茶。

「Rainbow!妳真的很叻叻豬呀!又估中咗我想飲咩嘅?」

一個穿著米色收腰連身裙,配上咖啡店專用的黑色背心圍裙的女侍應,眼大大,還有霧綠色的及肩短髮這個特徵,她就是芳齡十九歲、在Alice Cafe中可看穿客人喜好的鎮店之寶 ─ Rainbow!

「妳每次嚟都想試老闆新入嘅花茶,如果唔係妳都唔會上嚟坐喇!」

語帶興奮的Rainbow為Szeyan再添熱水,在浸泡過程中,聽著Szeyan說話。

「哈?咁又唔係喎,今次我唔係為咗花茶而嚟嘅!妳知唔知?陸行鳥佢成立咗一個網上樂隊,仲搵我幫佢做Keyboard添呀!」

「Keyboard?妳識整電腦嘅咩?」

「呀……妳玩嘢呀……玩Keyboard呀!電子琴手呀!」

Szeyan興奮地按著Rainbow的肩膀,對她一直搖晃,幸好那時Rainbow已經放下了熱騰騰的茶壺。

「小心呀妳!有熱水架!咁老闆知唔知架?」

「佢梗知!係佢叫我去試下嘅!」

「點解妳想組樂隊?妳唔係淨係Classic,諗住做鋼琴手嘅咩?我真係未聽妳講過喎……咪住!妳媽媽知唔知架?」

Szeyan即時夾著嘴巴。

「車!反正佢又唔係香港,沒問題喇!家姐叫我玩,佢會幫我解釋架喇……我諗……」

Rainbow用力嘆了口氣,開始抱怨起來。

「哎呀……睇嚟妳兩姐妹都係咁反傳統架喇!一個被家人反對都要開cafe、一個就扮晒讀唔成音樂系,走去讀旅遊,而宜仲要做流行歌手添……明明媽媽就係極出華人鋼琴演奏家,偏偏兩個女兒都……」

還沒有得Rainbow說完,身後突然被餐牌正後腦。

「Rainbow!恃寵而驕喇?連我嘅是非都講喇?」

手執餐牌的正是Cafe的老闆、亦是Szeyan的姐姐 ─ Alice洛詩雯。同樣是穿著收腰連身裙的Alice比Rainbow高出二人約十公分多,頭髮扎起半節。也許是二十七歲的她比較年長,而且身穿的高根鞋關係,比起兩位小妹妹多添一份女性的魅力。雖然剛剛輕輕責怪了Rainbow,但還是笑面迎人,Rainbow也偷笑著回到自己的工作岡位。

「家姐!你知唔知陸行鳥間錄音室就係我哋Cafe對面?」

「我知,佢仲成日報告比我知妳有幾雞手鴨腳添……」

Szeyan見Alice話中帶刺,自己也要反擊一下,邪惡地看著Alice。

「哎呀!其實我早就知道陸行鳥係另有目的架喇!原來佢想打妳注意……」

Alice早就對Szeyan的胡說八道習慣了。

「咪亂講……我同佢同子銘都係中學同學,以前已經有夾band架喇……」

「子銘?佢有嚟過咩?開舖到宜家,我見過佢三次咋!大導演應該仲係日日留係工作室剪片拍嘢,佢邊有分過時間俾妳呀?」

Alice沒有在意Szeyan的說話,只是一直看著她微笑著。

「詩恩妹妹……愛情呢回事,妳呢個初哥係唔會明架!搵個男朋友比我見下,先再同我討論愛情喇!」

Alice的說話一針見血,令Szeyan失去理性地反駁:

「咩無男朋友?妳睇著喇!我一定會係三年內遇到個好男人架!」

Szeyan說過後,才知道自己的聲音蓋過了咖啡店的音樂,頓時傳來其他客人的陣陣細語,更有些花巧型的男子叫到Szeyan加油,令她尷尬得很,但Alice卻樂在其中:

「妳講得出呢句說話,就知妳幾咁天真喇,可愛嘅妹妹!」

第四節完

留言

    未有留言

分享