[讓謊言與虛偽堆砌成我們的最後樂土]《終末後.新世界》

第29章 - 29-神秘地標

「咁我長話短說啦。」紫宜開始說明她的神秘計劃。我們在場每個人都神色凝重地聽她說話。
「首先,我啱先打嗰枝針如果可以保護身體入面仲有『NW-01』病毒嘅人免受地震嘅傷害,調返轉頭嚟講,如果當初根本唔係透過病毒保護作用抵禦地震、而係咁啱好好命先冇死嘅人,就算打咗呢枝針,等地震真係再嚟嘅時候,佢都有可能受到傷害。」紫宜詳細地解釋。
「最簡短嘅講法係,如果我同阿和邊個喺下一次地震身體有異樣,邊個身體就冇『NW-01』呢種病毒。」紫宜又精簡地說。
我思考了一下,還算能理解她的說話。旁邊的大家都在點著頭,好像也明白的樣子。
「好。跟住落嚟我地睇睇份文件最後一頁。」紫宜掀起「試驗性抗生物共振性死亡用特殊病毒注射劑初期研究計劃報告」。
這時大家都了圍在紫宜身旁,留意著文件上有什麼東西。
「22.382701,114.187241,R103。」紫宜快速地讀完文件右下角細小的一組不明數字。
「等等……前面兩組數字應該係座標嚟㗎喎。」阿兒第一個說。
「我都係咁諗。所以我去咗查呢個座標到底係指緊邊度……」紫宜從一旁拿過了自己的筆記本電腦,打開了地圖的頁面。在地圖上,一處已被留下記號。
「結果我發現個座標係代表緊沙田地鐵站。」紫宜繼續說下去。
那就奇怪了……為什麼這份文件最後一頁會印上沙田地鐵站的座標?
「而且份嘢有標R103,我認為佢係房間嘅號碼。」紫宜繼續推理。
「咁奇怪?呢份嘢點解mark住地鐵站入面呢間房?」阿俊問。
「呢份喺中文你地可能會唔太明,但係如果同你地講呢份其實原本係英文嘅話就方便解釋好多。」紫宜回應他。
紫宜打開Microsoft Word,在編輯的正是「試驗性抗生物共振性死亡用特殊病毒注射劑初期研究計劃報告」。(利申:微軟並沒有給予我任何的廣告費,要不然我就不需要落得要跟某網絡出版社搶3毫子稿費的悲慘田地。)
「吓!呢份『繁中譯本』係你自己譯嘅?」阿欣吃驚地問道。不止有她感到驚訝,我們所有人都無法置信。
「人仔細細英文咁勁嘅?連成份機密文件都譯到做中文……」阿俊帶著讚嘆地說。
「係你有啲大叔先有嘅stereotype(刻板印象)以為年紀細就唔識翻譯姐。」紫宜毫不留情地嗆起來。
阿俊立馬閉上嘴來沒有再說話。目擊到一個高中生被小學生用言語秒殺的我不禁在心裡竊笑起來。
「入返正題,原本份嘢係英文……咁同個座標嘅作用有咩關係?」阿慈切回主題。
「你諗下,『22.382701,114.187241,R103』呢個地方,既然係喺外國嘅文件出現,即係其實mark嚟係俾外國人認住我地香港嘅某一part。話唔定嗰度收埋咗佢地嘅秘密設施,而且同佢地個『研究計劃』有關。」紫宜答。
「嘩……咁大陰謀……有冇呀?」阿欣在吐槽著。
「話說……沙田地鐵站喺新城市商場入面。」阿俊提到。我和阿俊曾經在遇到「新世界議會」那群人之後,到過沙田地鐵站前的7-11。我清楚知道要到沙田地鐵站通常都是經新城市商場去的。
「係啊,而且而家新城市商場俾『新世界議會』班人佔據咗。」紫宜回應。
她將「研究計劃」的事和議會那些人扯上關係,我當堂感到更毛骨悚然起來。
「突然發覺呢一串嘅事都好似好多關連……」阿慈說。
「所以我地要入去沙田地鐵站搵文件講嗰間房出嚟。有冇人肯同我入去?」紫宜跳躍式地提出她的建議。
聽到紫宜大膽的提議,我們眾人都暫時無法反應過來。
「所以你講要實行嘅『計劃』,就係入去座標寫住嘅嗰間房搵下有啲咩嘢?」只有在一旁豎起狙擊槍的阿兒問著。
「冇錯。我已經有個詳細嘅作戰計劃。」紫宜自信地回應,好像早已有獲勝的把握。

留言

    未有留言

分享