《筆示驅魔傳》

第8章 - 筆示驅魔傳 第二章:驅魔拍擋 (二)

「我嘅異能?」

「讀取靈魂記憶,你記唔記得呀?」

諗返起入夢個時,的確我係睇到陳生嘅過去,我仲以為因為係我同佢個身體交換咗,所以先睇到佢嘅往事添。

「如果你可以幫我讀取靈魂嘅記憶,咁對我做驅魔嘅工作都好有幫助架!」

咁講開又係,如果可以了解到對手嘅背景,的確係可以輕鬆啲解決對手……不過……

「等等先……妳唔係話想我幫妳做記錄嘅咩?咁做咩講到我好似要幫妳手驅魔,做埋妳助手咁?」

Yui有啲尷尬,笑笑口講:

「咁……反正你都唔會即場寫,不如係現場幫下手囉……咁唔係幾好咩?」

喺呢個時候,我係第一次見佢笑得咁甜……唔知係咪所有女人知道自己理虧之後,都會用咁無知嘅笑容嚟掩飾自己嘅罪行……我哋男人就唔係會喇!最多都係講過另一件事嚟轉移視線嘅即……

「幫妳都得……不過我怕自己有生命危險喎!妳知妳個啲工作架喇,分分鐘妳自己都顧唔掂……」

講到呢到,我就感覺到佢嘅火燒到上對眼到,直情想噴出嚟一樣。係嘅,我唔應該踩佢話佢唔得……

「……即係……妳嘅異能都會有後遺症,未必可以保護到我,我係咪都應該要學返啲嘢,有咩事走佬都唔洗妳粗心呀麻……」

Yui諗咗陣,都好似認同我講嘅嘢,於是係個堆火牛到拉起條電線,一路扯返部差緊電嘅電話返嚟,係未見過嘅智能電話。

「攞去用住先。」

「……呢部咩嚟架?」

「呢部?阿里郎手機,北韓製,擁有持久力最強嘅屏障,只要輸入#999,可以展開絕對屏障,以手機為中心,隔絕半徑一米範圍內嘅電波,咩都入侵唔到!」

「嘩……好有北韓風格。」

「係呀,仲有追加自爆功能!輸入*999後等3秒就可以啟動!」

哈?咁我就真係唔明,點解要係個保護罩裡面玩自爆……咪住!

「喂……妳可唔可以講清楚……#999定*999係自爆話?」

「咪*999囉……」

「我……大佬呀!個輸入設定可唔可以分別大小小呀?」

「無辦法喇,佢哋諗住生產俾自己用,想方便國民咪用啲差唔多嘅code囉。」

「痴線嘅咩!個功能差咁遠!」

「你唔洗咁驚喎!你唔好諗住撳#999咪得囉!」

無錯,我唔當佢有呢個功課咪得囉……記住*999……但點解好似怪怪地……

「喂……Yui……妳頭先叫我記住咩話?」

「記住?記住唔好撳#999囉。」

「我……妳再講多次?」

Yui初時都好不滿,但仔細去諗……

「係喎……記錯咗添!哈哈……」

「……我都係唔用,你比過另一件裝備我……」

呢個時候Yui好似抽獎咁,又係堆火牛到拉住其中一條電線,今次係小米。

「呢部又點?中國製小米。」

「保護罩無阿里郎咁強,而且只有5分鐘,每次想重設就要關機差滿電。另一個重要功能係可以記錄出現過嘅靈體,只要影底佢個樣,就可以進行分析,然後用追蹤功能,咁佢就走唔甩喇!」

我諗呢部小米點都好過阿里郎。

「喂……咁其他iPhone、iPad有咩用?可唔可以借埋俾我?」

「iPhone唔同架……佢主要用Google嘅世界定位,做好多聯絡同收集情報嘅工作。」

「吓?咁同普通iPhone有咩分別?」

「我呢部係用係Dark Web嘅其中一個受保護頻道,主要係同惡魔有關,你唔需要用到……」

「咁有無武器?」

我問完之後,Yui好似感覺唔耐煩,咁我唯有收儉下……

「你係咪真係想幫我?如果真係合作嘅,我再介紹道具商人俾你識,你到時睇下佢有咩賣俾你喇……」

Yeah!我都知道有呢啲設定架喇!要有啲咁嘅人物先似樣……而且仲有……

「Yui!咁妳有無家族遺傳或者師父傳授異能俾妳?妳知喇……我要寫妳嘅故事,或多或少都應該有啲背景,咁先有吸引力等人睇架麻……」

Yui一幅厭棄的表情,躺在梳化上道:

「異能就唔關屋企人事,我阿哥都唔似有……係意外得到,另外都係偶爾遇到師傳……係佢教我驅魔知識嘅……不過佢唔係香港,你唔洗訪問佢喇。」

「咁……喂,不如妳先講俾我知,妳點解會得到異能?」

Yui聽到之後臉色都變埋,好明顥就唔想提,於是一手搶返部小米:

「算喇!都係唔搵你幫手……你走喇……」

「喂……咩料呀?」

「我無諗過你咁煩……係到問長問短,我唔想同你分享我嘅經歷……」

又係嘢都未講完,佢就走到大門前拉開道閘,示意叫我離開。

「喂……洗唔洗咁呀?問多兩句即……」

「走……我唔想再見到你……」

呢個Yui真係過份,又係佢叫我嚟,話要幫佢做呢樣個樣,宜家問多兩句就發老脾……都唔知當我係咩……走咪走!

我無再應佢,快步走出門之後,聽到佢用力咁轟埋道門,真係覺得佢不可理喻。係就係個世界好有趣,感覺好好玩,不過要同個咁情緒化嘅人合作……命都短幾年……



同Yui反咗臉,無無聊聊,又覺得有啲無癮,結果就去葵芳個到搵啲嘢食下。

呢個地方出咗名多嘢食,特別係遠近馳名嘅Pancake!熱嘅有咸牛肉芝士、凍嘅有香港朱古力,兩種都係我嘅至愛,不過麻煩嘅係太多人……有排等。所以我都會先去買咗一份,之後走入去其他舖到搵下嘢飲。

不過行咗兩轉,無癮嘅心情都係未散,求其要咗包檸茶,就返去等Pancake。就係眾多個黑色頭髮嘅人當中,我見到個粉紅色嘅頭……係Yui。見佢好開心咁係Pancake個老闆手上攞起份Pancake,咁就好滿足咁行埋咗一邊。為咩唔想比佢見到我,我等佢行開咗先過去攞返自己個份……點知當我走去拿起自己個份時,佢突然走返個嚟同個老闆講:

「老闆!我個份點解無朱古力醬架?」

Yui攞起份咬過嘅Pancake俾老闆睇。

「呀……唔好意思,可能唔記得落。」

「咁可唔可以即刻製個份俾我呀?」

「有啲難……小姐,妳未咬過都話……一係我淋係上面俾妳喇?」

「咁個底咪無囉?」

見到呢個情況,唔知點解,我好自然咁俾咗我手上個份……同佢一樣嘅香蕉朱古力班戟俾Yui,佢都嚇咗一下,咁我先知原來佢真係唔知我係到。

「我未食過架……俾妳個份我,反正……我有無朱古力都無所謂。」

Yui呆呆滯滯咁接過,慢慢咬咗一啖,就好滿足咁笑。成個細路女咁……

「對……唔住!」

「吓?無所謂喇……係Pancake我就食得落。」

「我意思係頭先……我唔應該發脾氣。但……我已經無講粗口架喇……所以我真係……好有誠意搵你合作!」

咁講開,佢今日又真係好似一句粗口都無講到……又識得笑,真係判若兩人。

「咁……我都有問題嘅,無喇喇係咁問妳嘅私人嘢……打和囉!Super……」

Yui聽到之後,冷笑咗一下:

「咪咁幼稚喇……好難頂呀……」

Yui準備離開時再講:

「返上去講繼續傾?係街唔方便講太多……」

之後佢又無理我走咗去,奉旨我一定會跟住佢咁……不過算喇……事實上我真係幾想接觸一下呢個世界。唉……不過有一個問題係……Yui咬過嘅呢份Pancake,我食唔食好?

第二節完

留言

    未有留言

分享