《筆示驅魔傳》

第7章 - 筆示驅魔傳 第二章:驅魔拍擋 (一)

經過一次靈異事件次後,我識咗Yui呢個女仔,佢話自己係做咩驅魔生意。呢啲咁幻想風嘅工作我只係會喺網上嘅故事、或者係ViuTV啲節見到睇到,無諗過會識到一啲咁嘅人。但又唔真係親身見過,我都唔信原來世界上真係有鬼呢回事。你話去佢哋嘅地方,佢SET晒局引你上吊都話,但今次係佢走嚟我間舖,幫我驅鬼,我點可以唔信呀?就因為咁,之後佢主動約我去佢公司到傾嘢,我都無拒絕,好準時咁係葵芳新都會地下等佢。

「喂!咁準時嘅?」

Yui依舊都係著返個套背心加外套短裙,同佢最易認嘅粉紅色頭髮。唔同嘅係佢今日有啲笑容,或者係個晚生死關頭,一直都見佢好認真咁做嘢,未放鬆過。

「咁女仔約我就更係準時啲喇,有咩想傾?」

「我想搵你做拍擋!」

「拍擋?驅鬼個啲工作?」

「係呀!不過係街唔方便傾,去我公司先喇?係工廠區入面。」

講完佢就轉身走咗去……死喇,雖然我無咩錢,又唔介意俾佢劫色,但跟佢走入去工廠區,會唔會佢伏擊我之後搶內藏架?

雖然係帶住呢啲問題,不過我都係跟住去……最多留心小小,執生嘅即。

 

跟住佢行,過咗天橋同穿過咗個大型屋村之後,去到好似個廢城咁嘅工廠區,唔知點解望落去就好似電影「功夫」入面個城寨一樣,圍牆內外都係烏煙瘴氣,不過可能係因為咁啱個天上落雨即……如果唔係,就應該有啲我見唔到嘅嘢佈滿係四周圍……

「係呢到喇……我公司就係頂樓。」

Yui指俾我睇,大概就係嗰個單位嘅上空,團積咗一個漩渦咁……好鬼可怕。

「嘩……咁高呀……」

「做咩呀?你畏高呀?放心喇!入到去你唔好望出街咪得囉!」

又係咁,講完就自己走咗入去工廠範圍,我又只可以跟住佢行……

突然,當我經過大門個下,好似穿過層薄膜一樣,耳仔鳴咗一下,有啲怪怪地。

「你……感覺到?」

Yui好似預知我會有呢個反應,一早企定定係到,等我答佢。

「係……係咩事?」

「我未搬嚟之前已經有,係一開始已經存在住嘅結界,就好似個保護網咁包住呢度。詳情我都唔記得喇,不過就一定安全。跟我嚟!」

Yui走入大堂,唔用客Lift,走到貨lift前將上下式嘅閘門打開,我就只好跟住佢。

「唔好睇呢部lift好似好舊,但其實快過部客lift。」

「唔係啩?貨lift都快過客lift?」

「因為呢部有特別用途,只要用嘅人識得其法就可以好快……」

Yui閂咗閘後,係啲制下面揭開鐵片,將裡面嘅槓桿推向右,架lift突然震咗一震……唔通係咩通過異能之後,開咗啲咩異界次門?

果然,唔夠五秒,我哋已經到咗,但過程中我一啲感覺都無。Yui將槓桿拉返去左邊,將鐵片閂返,之後就開閘出去。

「呢部lift係咪都係之前啲術士改造過?係咪有無靈力係到?好堅喎!」

Yui聽到皺一皺眉,無奈咁回應:

「我都唔知喎……不過,應該只係純粹機械。」

「吓,咪玩喇,邊有可能幾秒上到廿幾樓呀?」

「你係IFC,唔洗幾秒都可以去到幾十樓喇,有咩出奇即……咪咁少見多怪喇!我係做驅魔,呢到都有個奇怪嘅結界,但唔代表呢到好似魔法學校咁,又新奇又有趣咁架……」

Yui無咩癮咁走到盡頭,係一道咩裝飾都無嘅鐵閘前搵鎖匙,唔好話少女風,就連呢到係有人租用嘅感覺都無。

「嘩……你個門面咩都無,啲客上嚟點知呢到係妳公司?」

「我都唔會叫啲客上嚟,要傾咪出去傾囉。想搵我傾生意就會打比我架喇,上得門嘅都應該係尋仇或者追數嘅即,咁唔俾佢哋知呢到係我公司咪仲好……」

聽佢咁講又幾有道理……似乎佢係被尋仇同追數方面……應該幾有經驗。

「咁做咩要我上嚟傾?」

Yui將門打開,突然轉身微笑講:

「我怕出面唔乾淨,所以都係自己地方好。裡面無人架,入嚟先講?」

佢最後特登吊一吊聲去講呢句,老老實實,我個下真係有啲興奮。俾個廿靚歲嘅女仔咁樣引一引,定力都差咗啲,我就呆呆下咁跟佢行咗入去。到入咗去先見到……

「喂……Yui,呢到除咗張梳化、一張茶几同四個拖板插滿火牛差電之外……床都無張……算係咩地方呀?」

Yui閂返大門後先再同我講:

「咩呀……係到做嘢……要張床嚟做咩呀?」

「做嘢就更係要有床……」

我講完之後先發現大家對「做嘢」呢個詞彙有啲唔同,Yui開始鄙視住我:

「你想做嘅係咩嘢呀?」

「……做嘢……做倦咗,有張床休息下,訓陣。好理所當然即?」

Yui接受唔到我嘅解釋,我就唯有拉開話題:

「……妳……個堆火牛,一個人用洗唔洗要十四個火牛差電咁多呀?」

Yui勉強諗咗一下,好無知咁答:

「其實我都唔明架!不過有iPhone、Notebook、iPad、上網個架嘢、Note9、藍芽耳筒、HTC、printer、scanner、Mac機、華為、投影機、喇叭、小米……都差唔多喇。」

「得得得……妳數到我都唔知妳講咩,不如入正題。」

Yui聽到後就好似唔記得我哋討論「做嘢」呢件事,走到梳化到坐低,之後都順便叫我坐埋落嚟。

「好喇,咁講正題。我想你同我合作,幫我做驅魔日誌做記錄。」

「驅魔日誌?」

「係呀!我發覺驅魔呢個行業唔做返啲記錄呀、宣傳呀、啲人都唔差識你。睇見個啲呃神騙鬼個時神棍節目,個個都好似賺好多錢咁……我係真才實料架麻,點可以咁窮先得架!」

以我目測,Yui絕對可以行偶像路線嘅KOL,不過爛口都唔係問題,份人太火爆,唔講都估到佢應該係白羊座,佢呢份人點可能做到好公關。其實呢啲都唔係重點:

「你想我做死亡直播,幫妳做戰地記者拍片?咁我好危險喎!」

「咁更係唔洗喇!啲鬼都上唔到鏡,拍咩啲人都睇唔到喇!我想你用文字做記錄就得。相嘅話……好似上一單嘢,係夢到驅魔,點會影到相呀?同埋……有樣嘢真係你先做到!」

「咩呀?」

「就係連你自己都唔知自己有嘅異能!」

第一節完

留言

    未有留言

分享