龘虎門

第16章 - 集結! 龘虎門!!

再一次踏進機場,不過今次有老闆同雙妖陪同,雖然有d依依不捨,畢竟都係到都生活左幾個月,同四位護法都產生左友誼(班仆街晚晚要上數,唔打到天光唔擺休),最可惜既係同四鬼夾過一陣band,呢四條友真係好有潛質,希望佢地成材,唔好預到壞人。

我反而少同三煞星佢地玩,佢三條友成日鬥地主,我話玩十三張,佢地唔識又唔肯學。。。

不過最奇怪一個問題,呢個問題一直係我心入面,但係我又唔敢問。呢一刻,我終於忍唔住要問。

「老闆,點解。。。我地公司一條女都無既?」

邪神無出聲。

「定係我地公司有規定請男唔請女?」

邪神緊握雙拳。。。佢終於開口。

邪神:「你睇下我地公司有無靚仔?」

「。。。。。。」

邪神:「我都試過請女職員,但係成班淫魔個個兇神惡殺,雖無過犯,但面目可憎!」

「咁你唔請返d靚仔返黎? 請兩個model咩女都有啦。」

邪神怒目,但好快又變臉。。。

邪神:「我。。。唔想有人靚仔過我。」

話時話,舊事重題,我真係唔知道邪神真面目係點,定係如佢真名「古天樂」一樣咁靚仔。。。

邪神:「呢個係我今次要去韓國既目的。」

「你去整容?」

邪神:「飛機就黎降落,到時你就知。」

我有不祥預感。

話說我今次係同佢地三個一樣,都係著乾濕褸上機,唔洗擔心套盔甲過唔到關。

飛機已經到達首爾。

-香港-

小龍望住「龍虎X」既牌匾。

小龍:「睇黎睇去硬係覺得爭咁d。」

小虎:「大哥,睇緊咩?」

小龍:「我覺得龍虎門好似唔夠霸氣。」

小虎:「又龍又虎仲唔夠?」

小龍:「黑龍,獨眼龍一齊過黎。」

三人凝望。

獨眼:「好似真爭緊d。」

黑龍:「我都覺。」

小龍:「我諗到喇! 我地三條龍,你得一隻老虎。。。」

小虎:「你想點?」

小龍隨手攞起支箱頭筆,係個牌匾上面寫左d野。

小龍:「攪店!」

黑龍同獨眼龍非常滿意。

小虎:「下!?」

獨眼:「洗唔洗問埋阿星佢地意見?」

順帶一提,三小將玩4P齊齊瀨野,而家係醫院中。

小龍:「就咁話啦!」

由今日起,「龍虎X」正式命名為「龘虎門」!

小虎一額汗:「個龘字點讀?」

小龍:「er。。。都係讀個龍字!」(其實係同達字同音)

四個人起勢咁跳起yeah。

小龍:「我下星期要飛去韓國搵親生老豆,細佬你去唔去?」

小虎:「當然! 」

黑龍:「預埋我!」

獨眼:「咁我留返係香港睇住果三隻野啦。。。」

龍虎三皇即將遠征韓國,好戲再係韓城上映!

 

 

龘虎門 -日本篇- 完!

「喂?」

「你係咪xxx?」

「我係。」

「我姓火雲,叫邪神。有無興趣黎日本羅剎教擔任要職?」

「有啊!」

全個故事未完,待續。

留言

    未有留言

分享