非請勿進

第2章 - 圖書館停電

【由唔知幾時開始,我個魂魄好似攝咗入去尼首歌裡面。 係……圖書館閉館音樂。】

https://m.youtube.com/watch?v=-TRefMmzCnM

(請聽住尼首歌繼續閱讀!謝謝。)

 

「喂,你好! T67。」每日至少有50個電話打尼。

「我想預約電腦,唔該。」

「請等一等。」

「喂,你好! T67。」又有一個電話打嚟。

「你哋尼度點去架? 我依家喺港鐵站。」

「港鐵站B2出口,直行兩個街口就係。」

日日都喺接尼一類電話居多。
由我見工簽約開始就被要求接電話嘅時候唔可以大大聲聲咁講工作嘅地方全名,只有畀我哋用代號,到依家都唔知點解。當然見工嘅時候有問過,但得到嘅答案係 : 「知道咁多對你無好處。」

「唔該,洗手間喺邊?」有個大肚媽媽拖住佢個仔走過嚟問。

「3樓。」

「係唔係樓下食肆嗰個?」嗰位媽媽回答。

「係。」

「有冇其他乾淨少少嘅洗手間? 我個仔唔習慣用樓下嗰個洗手間。」

嗰位媽媽望住佢個仔回答。

「8樓體育館。」

日日至少要答尼個問題100次左右。

「請問續牌……」突然有位內地女人衝咗過尼櫃檯問。

「尼度唔係續牌!」我好無奈咁講。

「咁係……喺邊?」

「小姐,你想做咩架?」阿龍問。

「續牌!」

「車牌?」

「賓館牌!」嗰個女人好認真咁講。

「尼度係圖書館!」我同阿龍異口同聲。
眼前尼個女人連回應都無就擰轉頭離開。

「哈! 瞬間變賓館。」

「唔出奇吖,尼排成日都有人白撞架啦!」阿龍回應。

「你琴日無番工,有個人上咗尼問有無老鼠藥買添!」

「哈!哈!」

「轉更喇阿龍。」倫少走出尼講。

「唔該。」

「唔該,我有啲嘢想問啊……我續咗4次架喇,係唔係喺度可以重頭續借四、五次架?」有個伯伯指住佢手上本書走過嚟問。

「每個讀者都可以續借5次。」

「咁……我係唔係要還返先可以再由頭續借5次啊?」

「你可以喺我哋尼度睇下有冇尼本書,然後先再還返你手上尼本。」

「個code係一樣?」佢指住書脊上面嗰個索書號。

「係,理論上每間圖書館啲書上面嘅索書號都係一樣。」

「同書名同code係唔係尼度唔同。」佢指住個barcode講。

「係!」

「咁……尼度一樣係唔係唔可以再借?」佢又指住個barcode講。

「唔係,你還完一百次再借同一本書一百次都得!」

「哦……唔該!」

「唔該,我想續借尼本書。」嗰伯伯行開咗三分鐘都冇又有一個讀者走埋嚟。

「好啊,幫你試一試。」倫少回答。

「唔該。」

「小姐,唔好意思,尼本書已經有另一位讀者預約咗,你要還書架喇。」倫少解釋。

「吓? 我未睇哂喔。唔係每個讀者都可以續借五次咩?」

「係,但前題係有人預約咗本書嘅話,讀者就續借唔到。」
倫少再次解釋。

「嗰位讀者都唔知幾時可以拎到我手上本書㗎啦,你地通融吓俾多幾日我睇啦。」

眼前尼位讀者作出一個自私無理嘅要求。

「咁係唔啱規矩。」

「先生,規矩係死嘅,人係生嘅。你個腦可唔可以轉吓啊!算喇……叫你哋嗰館長出尼啦。」

經過半個鐘友善嘅溝通之下,阿漆好順利咁處理咗嗰位讀者嘅問題。

「係喔,其實點解一定要用代號嘅 ?」我忍咗咁多年終於想問。

「聽講5年前左右,唔知邊間館嘅同事喺電話講咗做野嗰間館嘅全名之後,得咗一場大病,無耐仲死咗。不過唔知係唔係真嘅。」娜姐用好低沉嘅聲線講。

「吓? 咁恐怖。」

「唔止添啊,有個同事就咁傳手機訊息俾佢朋友知喺邊間館做,第二日佢就俾車撞死左喇。仲有啊……有個傳聞話曾經有間圖書館嘅同事喺廁所嗰度自殺。」倫少附和。

「係唔係真架,咁點解新聞無尼啲消息嘅?」

「講咗嘅話,其他人未會驚到唔敢尼圖書館做囉。」倫少回答。

「我諗我哋尼度分分鐘仲可怕過做殮房啊! 哈哈。」娜姐喺度笑。

「好恐怖囉! 搞到我有少少想走。」

「你哋知唔知啊……」

「嗯?」娜姐同倫少異口同聲。

「其實我細細個就好想喺圖書館尼度做野,因為見到大家咁開心睇書嘅感覺令我覺得好幸福。但係依家見到大部份嘅小朋友喺家長嘅照顧同另類嘅教育之下咩類型嘅書都要睇,無咗真心想要輕輕鬆鬆睇吓自己鐘意嘅書嗰種感覺。」

「我一直都有咁嘅感覺。」倫少回答。

「仲有,依家咩人都走哂入嚟圖書館。又有小偷、又有癮君子,又有拾荒者……真係當正圖書館好似酒店咁。」

「哇,唔係報咗維修咩?天花板上面盏燈又閃閃吓喇!」

「阿樂,成日都係咁架啦,大驚小怪!」倫少回答。

「唔好理盏燈住喇!」

「唉,啱啱手抱嗰個BB仲好開心咁左手拎住本兒童德文書,右手拎住本莎士比亞小說集。我都唔希望我姪仔姪女好似佢哋咁。」娜姐好擔心咁講。

留言

    未有留言

分享