難怪我永遠懷念飛灰

第14章 - 欺騙我難約定未來回頭

「你頭先話你本來諗住今日之後以後都唔再見我?」小綠問。

「係,本來我係今日決定放棄你嘅。」面對著小綠,我誠實地作答。

「拿!你唔好再講果D咩2018,咩未來果D呀下!」小綠搶先阻止我繼續說下去。

「做咩啫?講事實又唔得嘅?」我反問。

「其實咁咪幾好,你好好地對你女朋友,反正我同你真係唔會有結果嘅。」小綠順理成章地說。

「但你唔覺得咁樣會好可惜咩?呢個宇宙入面有七十億個人類,但偏偏我地兩個就認識到,而偏偏我又覺得你係我『100%嘅對象』。」我說。

「唔會喎。」小綠快速而且肯定地回答。

「喂,你係咪咁呀!一對正正常常嘅普通朋友都唔會咁講野啦。」我說。

「你唔係覺得你自己正常掛。你根本就一個怪人,由頭到尾嘅怪人。」小綠說。

「陳奕迅都有講過『若你喜歡怪人,其實我很美』,你可以考慮下呢個角度。」我也是快速而且肯定地回答。

「但我唔喜歡丫嘛!」小綠用比我更快速、更肯定的語氣回答。

「你記唔記得我第一次同你講野係幾時?」看著燭光打在小綠的臉上,我一邊再次回想那個大學迎新營的營火晚會,一邊問。

「Year One 掛,邊記得呀,成十幾年前。」小綠說。

「我知你實唔記得,係O Camp 夜晚嘅營火會呀。」我說。

「咁又點?」小綠問。

「果時我都有同你講過『100%嘅對象』呢件事,講真,我一生人到而家,剩係試過一次有咁嘅感覺。」我說。

「有講過咩?我無乜印象。」小綠說。

「你乜鬼都無印象嫁啦,果日我話,我係牛頓,而你就係跌落我個頭上面嘅蘋果。」我說。

「我唔明你係度講乜野。」小綠搖了搖頭,說。

這時候,服務員遞上了刺身拼盤,放在我們的正中央,小綠把芥辣放進豉油裡攪拌,芥辣和豉油混合成一種讓人覺得尷尬的啡色;而我呢,則把一小撮的芥辣放在豉油的旁邊,綠色的芥辣小山慢慢地融進深啡色的豉油裡,感覺就好像細水長流的感情一樣。

其實我應該早就料到,小綠並不會相信我是從未來回來,她也不會記得我和她相遇那天的事。她是一個現實主義著,除了眼前的現在之外,她甚麼都不關心,正因為如此,她才可以這樣專注地工作,才會在幾年後變成上市公司的CEO。

「講返蘋果同牛頓嘅問題,你諗下,如果蘋果無跌落牛頓個頭上面,世界會變成點樣?」我說完之後,用筷子挑了一點點芥辣小山的山腰,然後點在魚生上吃掉。

「可以點,牛頓要發現地心吸力,個蘋果掉佢唔中佢都發現到嘅。」小綠說完,夾了一塊魚生,狠狠地醮在那碟芥辣和豉油的混合物中,然後放進嘴裡。

「其實佢發現嘅唔係地心吸力,係萬有引力。」我知道這很破壞氣氛,但還是忍不住糾正了小綠。

「咪一樣。」小綠再吃了另一塊魚生片。

「但就偏偏係果個蘋果,掉中果一刻嘅牛頓,然後佢諗到呢個世界有萬有引力。」我說。

「咁又點?」小綠再問。

「如果我從來都無遇見過你,你會點?」我問。

「咁就好,唔使成日比你煩鬼住晒。」小綠說的時候,嘴角忍不住微微向上翹。

「如果我從來都無遇見過你,我會覺得好可惜,可能牛頓真係無果個蘋果都可以發現到萬有引力,但係如果無果個蘋果掉中佢個頭,我估牛頓都會覺得好可惜。」我說。

「不過你唔係牛頓,我都唔係蘋果。」小綠說完,服務員把鰻魚飯和天婦羅定食送過來。

我們沒有再談未來、100%、牛頓、蘋果這些話題,改為談了她工作上的事,她和男友之間的事,我談了一些朋友的經歷,在這頓飯中間,我好像已經忘記了「黑夜不再來」的事,在長達六年和經歷過小綠三次死亡之後,我感恩我可以這樣坐在活生生的小綠對面,我們一邊談天、一邊吃飯,就好像身處天堂一樣。

離開了餐廳之後,我們漫無目的地在新城市廣場逛街,我在馬莎門前告訴她那裡將會變成Apple Store,她根本無法相信Apple Store會在沙田開店;我們走到羅馬廣場,我說那裡的Cova將會變成一個示範單位,她卻沒有理會我,一直盯著蛋糕看。

我們繼續在商場內漫無目的地走著,直到最後我們走到了沙田大會堂旁邊那個可以返回第一城的小巴站。

「我返去啦。」小綠揮手示意要離去。

「不如我送你返屋企,好唔好?」雖然我知道答案,但我還是忍不住問。

「痴線,講過幾多次,我有手有腳,唔使你送。」小綠說。對,從來小綠不允許我送她回家,是從來。

「我知,不過都係忍唔住要問之嘛,就好似牛頓咁,佢都會忍唔住去咬果個蘋果。」我說。

「死變態!你唔好咬我呀!」小綠笑著說。

「我認真,我好認真,六年之後,你會撞車,然後離開呢個世界;為左阻止呢件事發生,你可唔可以做我女朋友,等我之後一路守護住你呢?」我吸了一口氣後,說出了我想說的話。

「夠啦。我有男朋友,你有女朋友,唔好咁任性啦。」小綠說完,轉身登上了只剩一個座位的小巴,然後小巴絕塵而去。

果然,果然還是會被拒絕的。我這樣做夠了嗎?夠時間讓「蝴蝶效應」發酵嗎?足夠改變小綠在車禍中喪命的未來嗎?

我還是去找Gibson商量一下好了,不知道現在的Gibson是2018的Gibson,還是2012的Gibson呢?

我重新打開我的iPhone 5,打算找Gibson,但一打開電源後,iPhone 5立刻瘋狂地震動,我總共收到了二十個SMS和十二個語音留言,全都是阿玲傳來的。

留言

    未有留言

分享