阿媽叫我去飲茶相睇

第2章 - 徵婚啟事

自從阿媽食錯嘢入院留醫幾日冇開工,我都同公司請咗3日假陪佢。

今日已經係第三日,阿媽終於都可以出院返屋企。

「媽媽,食碗粥先啦。」

「嗯……」

「係喇,你同阿昌見面見成點啊?」

「仲好講? 相睇,人都冇到啊!」

「吓? 咁點啊!」

「好好笑囉,佢阿媽阿爸代佢相睇! 阿姨點解會介紹昌媽你識架?」

「啲親戚真係好想你嫁得好架,所以有咩單身男仔都介紹比我話你知。」

「得架喇! 得架喇! 你叫佢哋唔洗再介紹,我有分數!」

「係先好講,唔好再令我擔心喇。就算唔抱孫,都想有個好女婿!」

「係喇,係喇! 我返房先喇。」

「嗱,嗱,嗱! 又避喇。 叫你去相睇啫,又唔係叫你去送死。你唔係仲掛住個衰仔堅啊嘛……」

「講笑咩!」

之後,我返咗入房攤喺張床度,想瞓又瞓唔到,眼光光咁望住天花板。

然後,

突然心血來潮寫街招......

「徵婚啟事」

一係唔做,一做就會好認真做,我份人就係咁,可能同我份工有關。

「我 : 女性,27歲,瘦削身材。

前幾日,阿媽叫我去飲茶相睇,我無聊冇嘢做米順吓佢意囉,點知相睇嗰日男方無嚟到......
如果有人同我一樣俾阿媽迫婚,又好好奇我第一次相睇結局係點嘅話,可以What's app俾我。 電話 : 96570000。
做唔到夫妻,都可以當識個朋友。

徵婚人士上
2018.02.27 」

望住尼張徵婚啟事,我真係有少少佩服自己。

一係唔玩,一玩就玩到盡。

雖然,由細到大阿媽都教我同細佬對婚姻「尼一樣嘢」唔好當遊戲咁玩。

當然,以前又冇「認真便輸了!」尼句說話。

「阿媽的話,永遠是對的。」

不過,到最後佢都係一個婚姻失敗者。

有啲嘢,真係整定。

留言

    未有留言

分享