聖誕綜合症

第8章 - 8.

楊悅盈同何晞賢離開茶餐廳嗰陣,唔經唔覺已經差唔多十點。

頭先叫咗杯凍嘢飲,楊悅盈一行到出門口就有啲後悔,因為外面好似凍咗咁,仲落緊毛毛雨。

何晞賢就好似完全唔怕凍咁,淨係著咗件好薄嘅外套。

楊悅盈忽然間就咁企定定喺餐廳門口,好似醒起某啲嘢咁。

「做乜?」何晞賢問。

「無聊嘢啫,但係掛住同你傾計,唔記得咗…」楊悅盈答佢嘅同時拎咗個電話出嚟:「頭先鋪頭有個叫Steven嘅客話,個零月之前識咗個女仔,兩個人見過一次面,Steven借咗本書俾佢;點知個女仔最近Block咗Steven,無還到本書。」

「你…想幫佢搵番個女仔拎本書?」何晞賢好似有啲懷疑咁。

楊悅盈聳一聳肩。

「其實本書唔係買唔番,要搵番嗰個女仔仲難過搵本書,只不過…」楊悅盈開始行過去瀝源商場嗰邊:「入商場再傾?好凍…」

何晞賢點點頭,然後跟住楊悅盈行。

「只不過我好想知道個女仔而家點樣,因為我聽完你講,我就諗:個女仔就係中咗『聖誕綜合症』。」

「即係,你覺得個女仔當時同Steven見面,只係為咗唔理好醜想搵個伴?」

楊悅盈點點頭,然後將佢喺鋪頭嗰時記低嘅一個電話號碼——Anna嗰個——Save落自己Contact List。

「嗯,個問題根本唔在於本書。」楊悅盈解釋:「反而係因為Steven講咗好多次本書一文不值,令對方知道還唔還都無所謂,所以先一嘢Block咗佢。」

「而且,成件事仲有啲奇怪嘅位…」楊悅盈打開自己個Facebook Messenger:「例如Steven淨係會Add住佢附近、大圍嘅仔;但係個女仔住喺油麻地,屋企喺電影中心附近…」

「就算俾你搵到佢,咁又點?」何晞賢問。

楊悅盈搖搖頭。

「所以我咪話係無聊嘢。」

行咗入商場之後,楊悅盈同何晞賢企咗埋一邊,打開咗Facebook Messenger搵人嘅嗰頁。

見到一個更新訊息:「Anna Wu 已從手機聯絡人更新」。

「咁都搵得到…」何晞賢細細聲講咗句。

「睇你好唔好彩,唔係個個都會將自己電話號碼Link落Facebook。」

Anna Wu張Profile Pic,同Steven口中所形容嘅Anna會用嘅相一樣,只係一張貓圖。

但係當楊悅盈打開佢Facebook之後,就見到佢個人資料有一句「In a relationship」。

同埋一張無幾耐之前Upload、一男一女嘅合照;雖然張相只係背影,不過見到兩個好Close,所以應該係情侶嚟。

「係喎,你…跟住去邊?」何晞賢望住楊悅盈問。

「番屋企。」

「我送埋你去樓下?」

「唔使,好近。」

楊悅盈自己一個開始行番去,一路盤算緊後日番工同大飛講呢件事,叫佢轉告Steven令佢死咗條心。

本書又好,個人又好,佢呢世都唔會再有機會見得番。

「同埋呢,我聽晚同啲大學同學去玩。」身後面嘅何晞賢忽然間又開聲:「不過賴智勇都會去,而家我哋同一間U;如果你得閒…又無嘢做,不如一齊嚟?」

——好!楊悅盈爭啲衝口而出,好彩忍得住。

「呃…我唔知聽日使唔使番工。」佢隨口答一句:「聽日我再覆你。」

「好呀。」唔知有心定無意,何晞賢不忘補多一句:「聖誕快樂。」

楊悅盈笑一笑,乜都無講就自己一個行咗上樓梯。

——果然,聖誕真係無咩值得快樂。

因為楊悅盈從來都無諗過,自己竟然會因為有人約而覺得開心。

好明顯,佢不經不覺之間已經感染咗聖誕綜合症。

行番屋企嗰條天橋嘅路上,一樣同好多成雙成對、聯群結隊嘅人擦身而過。

但係唔知點解,楊悅盈已經唔再覺得自己係異類。

 

-《聖誕綜合症》完-

留言

    未有留言

分享