獨裁勇者vs民主魔王

第68章 - 潛行空間

在煉金術士的帶領下,我們一行三人在九曲十三彎的地道內向著豐饒國的城堡前進,煉金術士在地道內建造了相當舒適的房間讓我們晚上有休息的地方,地底下的動植物也很多,用紅魔法將它們轉換成各式各樣的食物,味道和口感都相當不錯。

老實說,在地道內過的這幾天,可以說是我冒險以來,生活得最舒適的幾天了。或許煉金術士說得對,魔法普及化可以帶給我們更好的生活。

在地道內一直走了五天,我們終於來到了豐饒國的城堡地底下。

「你一早比我拎D龍骨嘅話,我整架黑魔法推進地底列車,咁咪唔使行咁多日囉!」煉金術士說。

「而家成個大陸上面,除左龍族之外,得我地三個知道龍骨可以咁樣用,如果我地帶出黎嘅話,就會比人知道。」我答。

「遲早我地會教晒所有人咁樣用D龍骨,所有原材料都要經我地嘅地道開採,到時魔法師國掌握住整個大陸嘅經濟,人類、魔族通通都要聽我地講啦。」煉金術士說。

「我唔係咁諗,到時人類一定會捉住晒D龍,然後逼佢元神分離,製造龍骨。」我說。

「我明,你都唔係第一次講。但青龍而家唔係我地身邊,我地拎少少傍下身都好丫嘛!」煉金術士說。

「你而家都返唔到去拎啦,行啦!」我說。

「行乜鬼,到啦!」煉金術士指著天花板說。

「就係上面?」我問。

「係,係正上面,我地諗住點衝入去?定等一陣,睇下青龍會唔會黎先?」煉金術士問。

「我諗左幾日,我覺得我地唔應該衝入去。」我答。

「搞咁多野,你黎到而家同我講話唔入去?」煉金術士怒吼。

「唔係唔入去,而係唔應該衝入去。衝入去嘅話,我地一定會被包圍,而家我地無得用黑魔法,如果比佢地幾百人圍住,實死無生。」我說。

「咁要點?」煉金術士問。

「我要制造一個同國王一對一對話嘅場景。因為煉金術士你嘅紅魔法咁強,我諗左有幾個方法。」我說。

「咩方法?」煉金術士問。

「第一個方法,就係我地大搖大擺咁行去國王間房或者議事廳,然後牧師放一個魔法防護盾比我,之後你起一間房圍住我地同國王。」我說。

「但係咁樣你同國王傾完之後我地點走?」煉金術士答。

「咁一係用第二個方法,就係你起一條隧道直通國王間房張床下面,到深夜嘅時候我地突然係佢床前面出現,你再起四道牆隔開我地同D守衞。」我說。

「城堡咁大,層同層中間,城牆外面都有空位可以做隧道,甚至可以起樓梯,裝燈,都神不知鬼不覺。」煉金術士說。

「係嫁,城堡幾萬呎,邊個會留意樓底矮左幾呎。」我說。

「唔得,佢地之後會追落黎隧道,唔只我地,可能連『龍骨塚』都會比人發現。」牧師插嘴。

「『龍骨塚』呢個名又幾好聽喎,以後就用呢個名啦。」我說。

「點呀你!講返正經野先啦。咁有無第三個方法?」煉金術士說。

「第三個方法就係,整條隧道去佢床下底,然後,將佢運入黎地道呢度。我地可以整個袋,牧師用『睡眠術』確保佢唔會醒,之後我一袋咁拎佢落黎。」我說。

「好喎,我可以整個假人代替佢,到守衛發現嘅時候,可能已經係第二朝。」煉金術士說。

「無錯,整間靚靚仔仔嘅談判房,到佢醒左就正式記錄,到時呢次就係一次外交會面。」我說。

「咪住咪住,點解聽落咁似我地去綁架國王嘅?」牧師問。

留言

    未有留言

分享