獨裁勇者vs民主魔王

第5章 - 尋求真相

我們捉住了女刺客,她是一個普通身材、紅色頭髮、紮馬尾辮的人類女性。

「身為一個殺手,達成唔到任務,結果就只有一個。」被厚厚的蜘蛛絲包著的女刺客說。

「對比起殺人,我比較想知道真相。」我說。

「講真相比你聽,我有乜著數?」女刺客說。

「我地會放你走。」我說。

「但你後面條女明顯係想割左我個頭落黎喎。」女刺客說。

「我會阻止佢。」我說。

「咁好啦,真相就係,我係魔族嘅『應變程序』。魔族憲法第二修正案表明,如果魔王唔係死於自然嘅話,我地魔族入面嘅刺殺大師就會出動,幫魔王報仇。呢條法例嘅原意係阻止有人用刺殺魔王黎啟動重新大選嘅。」女刺客說。

「無理由,成本魔族憲法我都睇過晒!第二修正案係保障魔族學習並運用黑魔法嘅權利,令魔族人民得以自衛嘅法例!你唔好再吹水啦!信唔信我一野燒死你!」魔法師說。

「哈哈哈哈,原來,呢個世界,真係會有人睇晒成本魔族憲法。」女刺客說完,一直大笑不止。

「唔好講廢話啦,你知道我有方法令你求生不得,求死不能嘅!」魔法師陰森地說。

「你覺得我怕咩?」女刺客說。

「要點樣你先肯講?我係講道理嘅。」我說。

「不如你講下點解你地咁執著要終止呢場戰爭?」女刺客反問。

「你睇下佢。」我指著剛才幫我們撐船渡河的哥布林,然後繼續說:「佢係一個普通人,有屋企人、有自己嘅生活、有自己嘅煩惱。但係呢場維持左幾百年嘅戰爭,令佢地嘅生命朝不保夕。」

「明明闖入黎殺佢地嘅係你地幾個,唔好扮野啦!」女刺客再次大笑。

「其實我知道,發起戰爭嘅其實係我地人類,但係持續到而家,大家互相殺害,重覆報仇,仇恨越黎越深;我想要嘅,只係一個了結啫。」我說,真心的。

「好啦,我話比你聽,真相就係我係人類國家聯盟派黎嘅,目的係要你地死係魔族領地,咁佢地就有理由繼續打仗、繼續報仇、同埋繼續收稅嘞!」女刺客說。

「如果係咁!我會去搵聯盟講清楚!」我說。

「我未講完!又或者真相其實我係魔族軍隊嘅僱佣兵,你地太強大,強大到佢地要用外力黎對付你地。」女刺客一邊說一邊笑。

「你玩野呀!」魔法師舉高手,頭上已經出現了一個直徑達兩米的火球。

「你地想要嘅,根本就唔係真相,你想要嘅,只係可以證明你地自己猜測嘅真相!」女刺客說。

魔法師忍不住了,把火球直線丟向女刺客。我立時拔出配劍,剛好趕及把火球擋開。

但被擋開的火球卻意外地落到了那個撐船的哥布林頭上。哥布林在火中哀號,全身被燒著,看來將會活活地被燒作焦炭。

「快救他!」我轉身過去對牧師說。

留言

    未有留言

分享