日常

第53章 - 姊魅3

秋傻被撞死果一晚,我同瘦仔送左個的士佬去醫院後,各自返左屋企,一黎係太攰,二黎突然發生咁多事,一時間接受唔到。雖然話秋傻係傻既,不過係呢段日子幾乎日日都見到佢,明明只係打算利用佢幫屋邨啲鬼升仙,而家佢走得咁突然反而家啲唔捨得,可能同佢萌生左友誼……

「無可能既!我又點會個傻佬做朋友呢?」

但自從我黎左麗瑰邨之後,不斷發生怪事,就連女朋友都搵埋,不過最大獲既係,我既間歇性失憶好似比以前嚴重左,因為我到而家都係唔記得瘦仔叫咩名,仲有就係,我好似唔記得左一啲好重要既事。

(三魂六魄!!!)

呢四字又係我腦裡面出現,我突然醒起「怕醜仔」呢個名……死,又要睇返筆記先得。

我係廁所洗完面準備去訓,點知係鏡到出現左一個我好見既人影---著住紅色連身裙既Janice。

「Janice?」

我擰轉頭唔見佢,佢只係出現係鏡中。

「係咪妳啊?定係我錯覺?」

佢無回應,但係我見到佢表情漸露痛苦,好似……

「鬼上身!!」

我記得喇!應該係佢家姐上左佢身!!我望住塊鏡大叫:「妳係咪Janicr家姐啊?我地見過面架!」

佢無出聲,我見到佢對眼流緊血淚。

「妳可唔可以離開Janice個身體?佢係普通人黎架!妳都唔想害佢架?」

因為之前睇住秋傻身體越黎越弱,可想而知Janice會點。點知家姐既表情由哀轉怒,直衝埋黎!!

家姐:「唔準攪我個妹!!!」

呢下衝擊嚇到我向後跌。

我鼓起勇氣問:「究竟妳幾時附身係Janice到?點解妳要上佢身?妳係咪想我地幫手?」

家姐既表情又轉,好似平靜返。

家姐:「我知你係好人……但我要保護妹妹……」

我又突然間記起啲野,之前同Janice咁耐乜鬼都見過,係未見過佢家姐……

「唔通妳一直都係Janice身上?」

家姐:「……的士……」

我又記得喇!第一次去同佢搵鄭伯果陣,佢係坐的士黎架!

「妳可唔可以講多少少?」

家姐似乎有難言之隱,佢既表情又變返痛苦。

家姐:「我……頂…唔住…喇…去…麗瑰…邨…搵返阿妹!」

佢突然間非常痛苦,不斷㩒住個頭大叫,然後消失。

「喂!家姐!!!」

我叫都叫唔切,家姐就咁消失左,我唯有返房訓,但係塊鏡突然間一絲閃光吸引左我,我係鏡入面見到一啲唔屬於我屋企既野……一張病床。

「老豆,我返黎喇。」

做咩燈都無開,咁快訓曬?咦,屋企無人既?阿爸呢?唔係房喎……我行去廚房又唔見阿媽,甚至連肥婆蓮都唔見埋,佢地去曬邊呢?我同阿初送左個的士佬去醫院之後,因為太眼訓既關係,決定各自返屋企休息,等聽日先繼續去搵佢條女。對於頭先睇住秋傻比車撞死,老實講,我無太大感覺,一黎同佢唔係好熟,二黎係之前佢肥彪上身,差啲死係佢刀下,而家佢咁樣死左,我覺得對佢黎講算係解脫。

咁講好似講到我好冷血咁,其實我唔係啲咁既人,只係聽阿初佢地講咁樣玩秋傻法,覺得佢有啲慘遮,死左返而仲好,係突然左啲遮。

屋企人唔知去曬邊,打電話又無人聽,我係梳化抖左陣就去沖涼,早前成日掛住照顧老豆,我望下廁所塊鏡,先發覺自己又瘦左……

「頂,之前瘦得黎都仲有啲肌肉,而家直頭瘦到得返排骨,點溝女?」

我再行近塊鏡先發現自己真係殘左好,自從肥婆蓮黎左之後,仲係覺得佢唔多唔少都有吸緊我地啲陽氣,話唔埋夜晚訓覺果陣比佢姦過都唔定。

諗到呢到,我竟然唔覺意有生理反應。

「痴線!我未拍過拖咩…肥婆都啱?仲要係鬼!」

打開水喉,凍水潑面,成個人醒曬,來應該順便沖涼,不過我抬頭望鏡,發現鏡入面好似有啲野唔同左……我隱約見到鏡既另一邊係另一個廁所,有個人,同一隻紅衣女鬼!!

「嘩!!」

媽的!嚇到我向後跌,坐左係個廁塔到,你知啦!屋邨啲廁所出名細,係唔會有浴缸企缸呢啲咁奢侈既野,痾同沖都係同一個位,我坐左係到,睇住個鏡入面發生緊既事。

「咦,條友咁熟口面既?頂,係阿初黎架!」

佢好似同隻紅衣女鬼講緊野喎…點解我咁肯定果隻係鬼?因為頭先係意外現場,我親眼住佢飄埋去阿初後面,但係距離太遠,我望唔清佢個樣係點。而家竟然係廁所塊鏡到見返,不過隻紅衣女鬼係背住我,換言之,我只係見到一頭長髮,唔係呢排見鬼見得多,否則我都頂唔順。

未幾,阿初同隻女鬼好似交涉失敗咁,隻鬼無啦啦衝向阿初到!好彩佢仲係塊鏡入面……咦,隻女鬼無啦啦擰轉頭既?唔好啦……

「嗱……有事慢慢講……唔好轉過黎!」

頂!佢真係三百六十度轉過黎啊!

女鬼:「你……好……鍾…意…偷…聽…人…講…野…咩…」

跟住廁所無啦啦沖水,個花灑同水喉自己開左,噴到我成身濕曬!

「小姐,唔好玩水好喎!雖然我未沖涼遮!」

點知條花灑喉突然好似有性咁箍住我條頸!仲越箍越緊,大獲!

「對唔住啊!我無心架……」

我頂唔順喇,抖唔到氣……救……命……突然我聽到另一把聲。

「唔好攪我個妹!!!」

所有野回復原狀,啲水停曬,我好似比另一隻鬼救左,我再望返塊鏡,再睇唔到阿初。估唔到返到屋企都會有生命危險……死,唔通阿初都會有危險!?嗱嗱聲沖個涼再打比佢先!

「咦,塊鏡有光既?」

今次塊鏡既倒影係我,但係我後面好似多左張床……一張病床!?

留言

    未有留言

分享