日常

第52章 - 姊魅2

自從兩年前既巴士意外之後,我證實患上左創傷後遺症,兩年間我連交通工具都唔敢坐,但係好奇怪,每晚我都發同一個夢,就係見到有個女仔比人推落樓,地點似曾相識。我睇左兩年心理醫生,佢話我因為意外果陣就係撞到果個跳樓死既人,所以潛意識模擬左個畫面出黎,但係我唔係咁諗,最多都只係見到撞車果刻遮,點會見到有人被推落樓架……

因為我既失職,害死左成車人,不過後來我知道原來意外前,我架車上層發生緊更可怕既事---痴線佬斬人,本來個痴線佬打算將全車人殺曬,只不過因為意外發生左,連個痴線佬都死埋,可能就係因為咁,我個心好過啲,講到尾,我都係其中一個殺人兇手。

食左兩年藥又聽過醫生意見之後,我應該克服最大既心魔,於是決定去揸的士。我已經故意唔係麗瑰邨果區開工,奈何無論我架車係邊,都總會有人叫我車去果到,起初我都有抗拒,但試過比人投訴我拒載,唯有硬住頭皮做。

唔知係咪同單意外有關,自從揸的士之後就成日撞鬼,明明之前都無見過架,不過又無試過好似鬼戲咁有鬼上左我車,只係路過既時候見到啲企係到完全唔郁既「物體」,起初都無為意,但係諗深一層,無理由半夜三更會有人企係公路邊咩都唔做架,不過我見佢地無犯我,我都係經過就算,整整下都唔驚,直到某一晚……

果日好記得我如常開工,收到一個女仔係call台指定要我車佢返麗瑰邨,我心諗,有人整蠱我咋,但係去到上車位時見到,呢個女仔好靚!

「小姐,就係妳call我架車?」

「係啊。」

「麗瑰邨?」

「有問題嗎?」

「無,出發!」

果次我第一次車佢去,去到廣場前停車,不過佢準備落車果陣我見到成班鬼係到開party,正當我想叫佢唔好落車住,點知佢比左成千蚊我唔找,仲話要去食蛇晏,轉個頭人都唔見埋……果次係我第一次車鬼,仲要係鬼火咁靚既女鬼,後來當我知道佢係跳樓果個女鬼既時候,我產生左悔意同歉疚,雖然做唔到啲咩,但係每次佢上我車既時候,應該係佢每次故意上我車既時候,我都會好安全咁送佢返黎。

係醫院見到佢呢一刻,竟然有仲危難時遇到朋友既感覺,話就話成日車佢,但咁近見面都係第一次。

「小姐,點解妳會係到既?」

佢無答我,但係好奇怪地,我望下佢下身,唔係咸濕,只係想望下佢有無腳,咦?點解有腳既?

「呢個係我妹妹既肉身,我只係暫時借住黎用,因為我要保護佢。」

佢無啦啦同我講啲咁既野,一時間都唔知比咩反應佢好,唯有笑左下,講左句:

「哦。」

頂,明明我有好多野想問佢,唔知係太驚定係緊張,我咩都無問。

個女仔又再開聲:「你而家處境好危險,我先帶你離開呢到。」

「吓,乜呢到唔係普通醫院黎咩?」

女仔:「本來係,但係你誤入結界,出唔返去可能會死。」

「咁嚴重!?」

女仔:「應該唔關你事,但係之前有兩個人黎左醫院,個結界應該係報係佢地到,但係你曾經接觸過佢地,可能因為咁而入左黎。」

「咁頭先幫我落口供個警察呢?」

女仔:「佢比結界既異像嚇死左。」

呢刻我即時緊張。

「我同佢地無關係架喎……」

女仔:「點會無關,你係成件事既起源……」

突然間,房入面好似地震咁,天花裂開,石屎跌落黎。

女仔:「快啲跟我走!」

佢一下拖住我,果下質感非常真實。

「但係我行唔到……」

女仔:「幻象黎架!快啲諗返點行!」

果然,我真係起到身,佢一路拖住我走,一直向前衝,直到見到有光既地方,佢指住個出口。

女仔:「你快啲跑去果到,出口黎架!」

「咁妳呢?」

女仔:「我唔存在係呢到架,只係強行黎救你!結界破左我就會返去原本地方!」

「即係邊到?」

女仔:「麗瑰邨啊!你出返去記得要搵一個叫張靜初既男人啊!」

聲音越黎越細,我亦都跑左出去,一道強光出現,光到我咩都睇唔到,當我再開返眼,我發現自己原來仲係病床到。

護士:「先生,先生,你無事麻?」

「呢到係醫院?」

護士:「係啊,你昏迷左幾日喇。」

「我係意外入院?」
護士:「係啊,有兩個後生仔送你入院既。」

「係咪有個姓張架?」

護士:「你點知架?」

「跟住應該會有個警察黎同我警口供,佢既編號係PC9933。」

一分鐘後,真係有個警員埋黎,佢既編號同我講既一樣……

「阿sir,一陣無論發生咩事都好,記得向住有光既地方跑!」

睇黎,我已經知道,我仲係個結界入面。

「第四次喇!!!!!」

留言

    未有留言

分享