日常

第20章 - 妖夜3

秋傻發曬癲咁追住我黎斬,其瘋狂程度完全拍得住人肉叉燒包既黃秋生,又或者係癲佬正傳入面既秦沛,我姑且叫佢「癲佬叉燒包」。

 

我一路跑一路搵野掟佢,但係佢好似變形俠醫咁無視我掟既野,只係衝住我黎攻擊,天啊!我黎搵鬼而唔係黎比人追殺架!我見到街巿另一邊出口,心諗跑左出再算,但係怪事又發生……

 

「嘩!!頂!!」

 

我跑到去出口竟然被無形之物彈返入黎,衝擊力大到我向後打左筋斗,直撞埋菜檔地下既垃圾。呢個時候,周傻已經係我眼前。佢減慢步速,因為我跌左係地已經走唔甩,佢提起把豬肉刀,笑笑口咁講:「唔好走,肥叔叔要捉你喇……」

 

「咪住,肥叔叔?」

 

我見到周傻眼泛紅光,豬肉刀準備劈落黎,我不斷向後退,隻手就搵下地下有無野執黎擋,好彩!比我摸到個爛左既啤酒樽,諗都唔諗就一野插埋佢隻腳到,即時見血!

周傻好似有返意識,痛到跌左落地,我即時起身再一腳踢向佢揸刀隻手,把刀時飛開。襯佢典緊果陣,我嗱喳嗱聲走返肉檔救瘦仔。

 

瘦仔:「好彩你救左我咋,我差啲比佢當豬咁斬!」

 

「話時話,點解你會比佢捉左架?」

 

瘦仔:「我係遊樂場睇住你比風吹走之後,我一直追住怕醜仔跑,我親眼睇住佢地三個比肥彪殺死架,核突到呢…」

 

「講重點啦,我唔想知佢地點死。」

 

瘦仔:「重點就係我匿係街巿入面,驚俾肥彪發現,點知後面有人搵野扑暈左我,我醒返就發現俾人綁住,隔離仲多左個秋傻係到!」

 

「我諗秋傻比肥彪上左身!」

 

瘦仔:「唔難想像!」

 

「我插左佢大脾一野,應該無咁快追到上黎,快啲諗辦法走啦!」

 

瘦仔:「跑去出口咪得囉!」

 

「我試過啦,我地應該闖左入肥彪既結界,出口比野封住左!」

 

瘦仔正想回答,佢瞳孔放大,因為秋傻已經係我後面出現。

 

瘦仔:「分頭走!再諗辦法!!」

 

我同瘦仔一人走一邊,秋傻隻腳雖然仲流緊血,但係佢好似已經復原咁,越行越快,不過佢今次係追住瘦仔黎斬。

 

瘦仔:「救命啊!」

 

我已經跑到老遠,但係都聽到瘦仔把聲。我望一望天花,發現有橫樑可以匿埋,於是我走到去牆邊借助木箱擒上去。

 

我沿住橫樑爬,望到瘦仔比秋傻追斬,想叫佢又怕比秋傻發現,唯有繼續爬……

 

「咦,前面有個細天井!」

 

呢類單層式街巿因為驚落雨天台會水浸,所以預留左個天井位係最近既牆邊,方便卸水。我好似老鼠咁極速爬去另一邊牆,終於見到個天井。

 

「仆街,鎖左!」

 

個天井有蓋冚住,上面有個生曬鏽既鎖係到,我試圖用手整開佢,但係唔得,不過我發現結界應該無覆蓋呢個位,因為個蓋係有少少鬆,手指可以伸到出去。睇黎我要落返去搵野撬爆佢先得,但係要靠瘦仔引開秋傻。

 

另一邊廂,瘦仔比秋傻追到瘦。由於秋傻隻腳不繼流血,佢塊本來已蒼白既面而家仲白,配上發紅既雙眼,爭對兔耳就成隻白兔咁。

 

秋傻:「我要斬死你個斬合金鏟,快啲比叔叔斬兩刀!」

 

呢個時候,瘦仔憑佢瘦削既身型,成功攝左入兩間鋪之間既罅隙,暫時得以回氣。

 

瘦仔:「死人秋傻係到捕住,我又出唔x到去,阿初去左邊到啊!」

 

阿初襯秋傻行去另一邊,成功搵到瘦仔位置。

 

阿初:「瘦仔,我搵到逃離呢到既地方!」

 

瘦仔:「邊到啊?」

 

阿初:「殊……唔好咁大聲,秋傻係附近。」

 

瘦仔:「即係邊到?」

 

阿初:「我頭先擒左橫樑,係最埋邊條巷上面有個細天井可以擒上出口,不過而家鎖住左,我要搵野整爆個鎖先。」

 

瘦仔:「咁我繼續引開秋傻,你去搵野啦!」

 

瘦仔走返出黎,大叫:「死傻仔我係到啊!」

 

秋傻應聲而來,肉刀一揮,斬開瘦仔身後既鋪閘,瘦仔不顧一切向前走。

 

我本來想搵鎚仔,但係五金鋪落曬閘,經過魚檔既時候竟然見到啱用既架生---魚鈎(唔係用黎釣魚果種,而係鈎大魚果種。)

 

我拎住個鈎走返去橫樑果邊,途中遇到秋傻,我冷不防係用力鈎落佢背脊到,再用力抆返出黎,個鈎抆出黎果下連肉同血一齊拉出,成世仔都未見過咁長既血柱!瘦仔見秋傻再受傷,即時跟住我走。

 

「就係呢到!」我指住橫樑上面天井位置,因為瘦仔比較輕,我抬左佢上去先,再擒埋上去。

 

「接住!」瘦仔拎住個鈎用力鈎個鎖到,兩三下手勢就打開天井個蓋,跟手爬左上頂。

 

瘦仔:「上面果然無結界,快啲上黎!」

 

正當我擒緊上去既時候,個癲佬竟然捉住我隻腳,將我扯落去……

 

瘦仔:「阿初!!!!」

 

「唔好理我咁多,諗辦法點樣對付隻野!」

 

瘦仔:「我搵我老豆!!」

 

留言

    未有留言

分享