日常

第15章 - 遊樂場6

我叫李采曄,今年十歲,住係麗瑰邨一座二零六室,我而家讀緊小五,係九龍塘返學,媽咪話屋邨學校唔好,所以要我每日鬼咁早起身搭巴士返學。

 

最初媽咪唔比我落街玩架,放左學又要補習又要上最討厭既「興趣班」,根本討就無曬玩既時間,就算有,都係星期日去姨媽屋企同表哥玩,一直以黎,我都好聽媽咪話,直到有一日放左學返黎經過遊樂場……

 

由於我住果座係唔會經過遊樂場,所以咁多年黎我都未去過果到玩既,其實過多兩個月我地就會搬去九龍塘附近,媽咪話近返d名校區,第日升中都好d,其實我係九龍塘讀小學都係因為用姨媽屋企地址先報到。

 

媽咪唔比我同其他同學玩,所以基本上我係學校無乜朋友,開頭都會有同學叫我去佢地屋企玩,但都比媽咪親自拒絕,因為如果我遲左返學企,佢就會打電話去學校,由細到大,我基本上係無自由既。

 

星期一:補數,學琴

星期二:補英,小提琴

星期三:補通識,游水

星期四:補普通話,網球

星期五:補法文,畫畫

星期六:補中英數,社交舞(無錯,係社交舞)

星期日:全日姨媽屋企

 

基整本上由三歲開始,得閒就唔知道乜野叫玩,直到有一日我好大膽咁行左去遊樂場果邊,我第一次認識到朋友,佢地係瘦仔,肥仔明,大細孖同兩兄妹。

 

「衰仔!唔去補習走黎玩?知唔知出面好危險架!!」

 

我開始越黎越大膽,每日放學都偷偷地走去玩,直到有一日阿媽突擊撿查,發覺我成兩個星期無去補習,於是由放學開始跟縱我……

 

「姨姨!你個仔玩得咁開心咪比佢玩囉!」瘦仔竟然同媽咪對抗。

 

「小朋友,我唔知你地住邊座,不過我唔可以比你地帶壞我個仔!」媽咪對眼充滿殺氣。

 

「我地知佢無朋友先同佢一齊玩架!」瘦仔反擊。

 

「睇下你地丫,放左學校服都未換就走去玩,哦…原來係附近間垃圾學校,我要同你地家長傾下。」

 

「好啊!你去殯儀館搵我老豆囉!」瘦仔大笑。

 

「我阿爸阿媽十二點先放工,你等佢地囉!」肥仔明搭咀。

 

「我地老豆老媽子唔會理我地架!」大細孖異口同聲。

 

媽咪無聲出,但係佢見到兩兄妹。

 

「我認得你地,黃太對仔女麻!」

 

「你……你識我媽咪?」阿哥問。

 

「你爸爸係我老公既下屬,又點會未見過你地呢?乖,唔好係到玩喇,放左學就要返屋企做功課。」

 

聽到「爸爸」兩個字,阿哥即時發脾氣,並道:「我阿爸死左喇!」

 

「點會呢?我之前先過……」我知到媽咪講錯野,因為兩兄妹既父母離左婚,即時拉住媽咪隻手。

 

「點都好啦!阿仔跟我返屋企!」

 

就係咁,我夾硬比阿媽帶走左,不過走既時候我同佢地打左個眼色。

 

「一定要返黎玩啊!怕醜仔!」瘦仔大叫。

 

我好辛苦咁扮乖仔一直扮左成個月,去到臨搬屋前一個星期,因為佢地要忙於執屋,又見我乖返,所以就無乜理我,我又可以去同佢地玩。

 

直到遇到「肥叔叔」果日。

 

瘦仔,肥仔明,大細孖都不約而同無黎到,得返我地三個人玩,本來我做鬼要去搵佢地,點知我見到肥叔叔帶走左佢地,於是我就跟去睇。

 

「叔…叔…唔…好…啊…」

 

我見到肥叔叔用手揀住阿哥條頸,佢塊面由紅變紫再變灰,阿哥再無出聲,我哩左係垃圾桶後面,好驚,我見到阿妹比佢挷住左,我好想去救佢,但係我真係好驚!

 

之後,我聽到好似水喉既聲同斬野既聲,我見到肥叔叔成身都係血…終於嚇到忍唔住。

 

「媽咪…快d黎救我啊!」

 

我竟然忍唔住叫左出黎,仲瀨左尿,肥叔叔發現左我,我想走,但係竟然比個垃圾桶阻住而跌倒。

 

「斬!草!除!根!」

 

呢個四個字係我最後聽到既字……突然有一道白光帶走左我!

 

「病人心跳,脈搏回復正常!張太,你個仔醒返喇!!」

 

我開返眼,發覺自己訓左係病床,有醫生同護士望住我,我則邊仲個女人喊緊,佢仲即時攬住我。

 

「阿仔!!!」個女人大叫。

 

「你……你係邊個?我媽咪呢?」

 

「我咪你媽咪囉!醫生,係咪我個仔失左憶?」

 

醫生:「佢之前比車撞到重傷,可能受到腦震盪暫時失憶,但係咁都無事真係醫學界奇跡!」

 

「多謝你醫生!我會好好照顧個仔架!」

 

「我姓張,我叫張靜初,我唔係姓李,亦都唔係怕醜仔,但係好奇怪點解我對遊樂場既記憶咁清晰,甚至瘦仔佢地既樣貌都好清晰咁係我腦海出現。」

 

係遊樂場入面,自從見到三隻鬼之後,我個腦對呢到越黎越有印象,就好似真係係到住過咁,瘦仔好好奇究竟我係邊個,就連我自己都開始混亂……

 

遊樂場篇---完

 

留言

    未有留言

分享