日常

第10章 - 遊樂場3

「氹氹轉,菊花園,炒米餅,糯米磁…」

 

哈哈哈…唔好追我啦,哥哥!

 

每日放左學,我最鍾意同哥哥走去屋企樓下個遊樂場玩,我地就咁將個書包放係個「轉轉」上面,然後就無停咁玩,哥哥好鍾意叫我企係上面,佢就轉到我頭暈暈,一直轉到停為止…

 

然後走開始去玩「捉依因」!

 

哥哥每沒次都會數十聲,之後就開始搵我喇。我通常都會「呢埋」係瀡滑梯後面,因為我驚哥哥搵唔到我,平時都係我同哥哥玩,不過今日有多五個朋友仔同我地一齊玩!

 

肥果個同哥哥一樣咁大,都係十歲,佢叫肥仔明。

 

有個又瘦又矮既叫瘦仔。

 

仲有兩個一樣樣既叫大細孖。

 

仲有一個比較怕羞既,我地叫佢怕醜仔。

 

「怕醜仔!拖緊d我阿妹啊!」哥哥做鬼,我地幾個一齊呢埋。

 

「知喇!」怕醜仔捉實我隻手唔放,佢好似好驚哥哥搵到我地咁,我地面對面望住對方,一齊傻笑。

 

「肥仔明,仲捉你唔到?」哥哥抆住肥仔明件衫,點知瘦仔同大細孖都一齊出埋黎。

 

到最後,怕羞仔拖住我一齊出黎。

 

「嘩!你拖住我個妹咁耐都唔放,要結婚架!」哥哥大嚷。

 

「係囉!結婚!結婚!結婚!」其餘四人同時叫嚷,怕醜仔塊面紅曬,甩開我隻手之後就走左返屋企。

 

「我地聽日繼續玩囉!」

 

就係咁,我地幾乎日日都成班人一齊玩,直到我見到肥叔叔果一日。

 

「玩埋今日之後,我就要搬走喇…」怕醜仔爸爸買左樓,聽日就要搬走,好唔捨得佢啊…

 

「咁我地玩多次捉依因啦!」哥哥只係掛住玩,對怕醜仔離開唔太在意,不過今日瘦仔病左,肥仔明比學校罰留堂,大細孖父母去左旅行,佢地去左親戚屋企,結果得我地三個人玩。

 

今次到怕醜仔做鬼,我同哥哥呢埋。

 

「今次我地呢埋係樹後面!」由怕醜仔開始數十聲,哥哥帶我跑到好遠好遠…就係呢個時候,我地唔小心撞到肥叔叔,哥哥跌低左。

 

「小朋友,無事麻?」肥叔好好人,但係哥哥好無禮貌咁答佢:「唔關你事!」跟住肥叔叔就捉住左哥哥,我問佢:「不如叔叔都一齊玩丫!」

 

肥叔叔:「好啊,如果我捉到你地我就要罰你地架。」

 

哥哥變得好好奇,佢想知道會罰乜野。

 

結果,肥叔叔好快捉到我地,不但無罰我地,仲帶我地去食糖糖…

 

「我地完全忘記左同怕醜仔玩緊。」

 

不過果日之後,我地就無左見過怕醜仔喇…我而家同哥哥日日都係「氹氹轉」到玩,仲識到新朋友仔,唔知怕醜仔幾時返黎呢?

 

十幾年前,屋邨曾經發生轟動一時既血腥慘案…

 

「小兄妹遭精神病瘋漢慘殺肢解,雙眼被挖,人頭被棄於屋邨遊樂場之垃圾桶內…」

 

續。

留言

    未有留言

分享