悠長假期

第3章 - 我會做好這份工

      前前特首係宣傳自己的時候用一句口號,<我要做好這份工>,他做得好唔好就見仁見智,不過結果係他做到入左監倉。

      我其實覺得做好這份工這句話幾好,正面又有浮誇,但重點係我首先要揾到有份工。

       係2000年,一個做左幾個月嘢又無專長的大學生,想揾份工係有難度。當年揾工係寄求職信,郵票好似$1.2,我用左$100影50張證件照,買左5包郵票(1包10張)寄左幾十封求職信都無回音。為左唔問屋企攞錢,只有幫人補吓習揾少少使費,我記得當時係$90/小時,係葵涌補中三。係當時$90補中三係算好平,但係總好過生無野做。

       之前都講過,做sales 都可以叫做 account executive,  title 真係只係title,實際做乜可能都唔關事。 正在思考這些無聊問題時,係面前又出現另一個title,係financial planner,財務策劃顧問。幫人策劃財務,每月份人工要點分配而達至短期及長期目標,還要做風險管理,退休安排。講真,這些鬼佬概念聽落好似好勁,但係華人地方係咪真係work。

      我都無理過個概念係work唔work,只係知道我想要一份工,同做好這份工。就係咁我去左一間保險公司做financial planner,首年有底薪加佣金,之後就全佣金。

      財務策劃,幫人達至目標。我個腦不停有一個疑問,我又無真正學過finance,點幫人,跟著公司教的就可以? 這個疑問好快就解答左,就係可能人地得,但我真係唔得。連自己都唔信,點sell? 我入這間公司時,我office只有我一個年輕人,其他的都是做左十幾年野的,有些說話能力好高,  字字珠璣,有些好aggressive,三句唔埋,兩句就sell,有些就好靜,平時無乜講野,唔似sales,但每月report 又有單返。因為得我一個年輕人,他們當左我係仔咁,加上我厚多士性格,樣樣都八卦下,問下,有時候又做下跑腿。係兩三個月內,我係不自覺地慢慢學習左他們一些技巧,就好似武俠小說的主角咁,我學左好多唔同門派招式,而且我因應我性格改造,變成自己的招式。

      我再無叫自己做財務策劃顧問,行出去見客亦乜都唔帶,淨係吹水。因為當時大部分準客人都係同學,我以前幫過的人,所以入手機會高,出得來都預左俾我sell,但我又唔sell,淨吹水。

      搞到係佢地問我點解唔sell佢地,這個時候就係我出招的時候。我向幾個centre of influence 入手,當他們買左之後,其他人自然都會買,而且買的金額都差不多。

      就係咁,我好似如魚得水,短時間內達公司要來,升級,然後再短時間內再升級,成為分區經理,聽admin 講,能夠短時間升兩次的,每年得幾個,而且大部分都是有錢仔,係我咁得意,做平民單能夠搶閘出來。

      所謂不學無術,我唔會乜都唔識就可以升到,我選擇行左一條相反路,我專門研究公司賠償責任,我發覺我們公司當時候係全港最講人情講道義的。意思係就賠得好足,唔會收錢快手,賠錢就走。我就揸住這點,加上一些做過做到的賠償經驗,成為當時小賠償專家,醫生填份form 俾我,我睇左就知賠唔賠,賠幾多,而且將醫生公分門別類,乜科我都有一兩個熟悉的或已打招呼的。講真,買保險就係想有事有錢賠,有我這個pre approval,客人放心知不會買錯野,有事唔會無錢賠,客人源源不絕。我把這個做法推落去跟我的下線,又work 喎,就係咁我入行第二年已年薪半百。 係2009年時,係資深分區經理,年薪八十幾萬。 八十幾萬係保險行業係好少錢,好多人年薪幾百萬,但我深知我唔係果啲人,我只係做平民單,幫文化唔高的人買合適的保險,有乜事有錢賠,所以我都算是收入與職級不相稱,因為同級一定過百年薪。

     2009年,坐甲級寫字樓海景房,有私人秘書(自費),下線有二十人,當中幾個預備升級,即係我又預備升級。滿以為今世就係這公司過,財富亦會慢慢變多,生活安定。

    特然一個輸道理但無輸道德的錯誤,我把所有歸零,把辛苦十年的成就全部摧毁,我離開了這家公司,離開了這個行業,而上天給予的悠長假期就係這時候正式開始。。。

留言

    未有留言

分享