廁探Toiletective

第39章 - 擇日再死

  自從發生咗小背心果單嘢之後,我就立即向經理請咗一個禮拜嘅大假,然後衝番屋企瞓咗一場大覺。但一個好清楚嘅事實係,就算我遮咗自己個樣,做乜都好,個變態佬都可以輕而易舉咁知道我所在嘅位置,佢已經清楚知道我睇穿曬佢現實嘅身份同做咩工作,佢應該唔會放過我,但呢個反而係我嘅好機會。

  而鍾華應該都只係清楚我「一個人」嘅位置,但佢果種手法唔係面對面嘅跟蹤,所以同細粒佬喺電影中心果晚,佢以為我哋有兩個人,而唔知阿俊同阿豪同時在場。根據果晚嘅經驗,我諗我唔會再驚個變態佬,呢七日以嚟唔出街唔係驚佢再尋仇,而係等我隻腳完全好番。

  「「隻腳仲痛唔痛?成日都咁唔小心HURT到自己!」我無講到我係同鍾華交手而受傷,喺我最孤獨嘅時候,小林總會適時咁出現。

  「有你呵番就唔痛喇。」我話。

  「嘔心呀你!不如等我收工一齊睇《哪一天我們會飛》吖!我諗你就嚟悶到生菇架喇,睇完我請你飛的番去!」有個夜晚收工都仲要驚你悶拉你出嚟睇戲嘅朋友,你話夫復何求呢?

  「好呀,去邊度睇呀?」

  「九龍塘AMC啦,我喺網上幫手買埋你張飛,十點半鐘唔好遲到吖!」

  「呢家先三點半,一定會準時啦!除非唔會。」我知道我今晚一定會好早就出門口,我仲要留番啲時間比鍾華。

  時間已經去到六點半,個天已經完全黑曬,而我亦一早已經食完飯,準備出街,由西環邨去九龍塘絕對唔需要四個鐘頭,但我仲有啲嘢要做。

  我知道我必須把握呢四個鐘頭嘅時間,喺西區嘅每個大大小小嘅陰暗角落裡面大搖大擺咁不斷穿梭,直到鍾華知道我出咗街,直到鍾華嚟搵我。係,佢一定會親自嚟搵我,因為我已經捉住咗佢嘅痛腳。

  「企喺度,今次你個虧佬唔洗旨意再走得甩!」係鍾華把聲,我行到去一個渺無人煙嘅地方,今次終於可以引蛇出洞,引到佢自投羅網。

  「我咪企咗係度囉,過嚟打我吖笨!」

  「點解…個大隻佬無劈死到你!點解!十萬蚊係班古惑仔一年都未必搵到嘅錢。」見咗鍾華咁多次,我第一次聽到佢講咁多嘢。

  點解我會無死到?一切一切都係講番起一星期前嘅果一晚。

  「劈撚死你!十皮嘢啊!」個大隻佬正要手起刀落大大力劈落嚟之際……我喺我個銀包度拎咗張我同阿俊阿豪三劍俠嘅合照出嚟,好似呀SIR去酒吧查牌SHOW PASS咁樣用單手五隻手指揸住幅相好似如來神掌咁向前推,然後奇蹟就就出現咗。

  「大王,係大佬幅相喎!」小背心MK妹禁停咗個大隻佬。

  「邊個有錢邊個就係大佬,豪哥都無面比啊!受人錢財,替人消災係天經地義嘅事!」個大隻佬開始重啟由上而下嘅揮刀動作,喺呢個時候我已經方寸大亂,唔知可以做啲咩先可以頂得住呢個既講義氣,又唔講義氣嘅古惑仔。

  「隨身帶住同千祈唔好唔見呀!」我個褲袋入面除咗有個銀包,仲有上次呀俊比我果個信封,話就話隨身帶住,實情只係我懶得濟一直無拎過出嚟。喺電光火石之間,我用半秒喺信封度拎咗果十張一千蚊紙出嚟,個頭岳高向左傾三十度,雙手伸直向天,用食指同大拇指將個疊錢舉起遮住個大隻佬嘅雙眼。

  「十張一千蚊紙?咪即係一萬蚊!?我講到明事成之後會比十萬蚊佢哋架!」鍾華好似仲未理解到發生咩事。
 
  「你作為一個醫生,無可能唔明呢個道理架?」

  「有錢洗得鬼推磨,我點會唔明!」

  「如果你有絕症可能一年之內就會死,如果開刀就可以幫你續多二年命,但有超過一半機會會死,咁你仲開唔開?」

  「咁梗係唔開啦!隨時唔開仲長命啲!」

  「如果你係個大隻佬,乜都唔洗做就有一萬蚊,或者係殺咗我拎十萬蚊,但好大機會比警察拉去坐監,咁你又點揀?」

  「激死我喇!一早覺得班古惑仔信唔過!」

  「用錢買番嚟嘅關係永遠都係唔真誠嘅,佢哋仲肯幫手指證你買兇殺人。」

  「點解你明明有證據,都仲唔走去報警拉我?今日就係你自己幫自己安排嘅死期!」

  「因為你嘅罪絕對唔止買兇咁簡單,講!到底我同你有咩關係?點解你要殺人!」

  「呢個就係我要搵你嘅原因,因為你實在知道得太多嘢,我一定要殺咗你呢件垃圾!」

  「你慘得過一件垃圾可以揭發到你係一個連環姦殺案嘅兇手?」

  「全部都係廢話,你呢個虧佬乖乖地受死!」然後,鍾華已經拉後咗佢隻左手拳頭去到耳仔後面嘅位置,準備向我使出致命嘅一擊......

留言

    未有留言

分享