廁探Toiletective

第29章 - 無間道

  「傑…我啱啱差啲比人強姦,但好彩無RAPE到…我盡曬力去跑先走得甩,但我真係好NERVOUS…嗚…」小林平時堅定而磁性嘅聲音變到震過貓王,隔住個MON都感受到佢嘅眼淚,我諗佢真人已經完全崩潰。

  啱啱由瑪麗醫院收工嘅小林竟然又遇上咗強姦,我一路都擔心緊嘅嘢終於發生咗,如果小林唔係由細到大都跑開步,練成咗一對「奪命香雞腳」,我諗佢已經會落入咗個強姦變態佬嘅魔爪手上。單嘢又係西區發生,乜個變態佬唔係啱啱入咗廣華醫院諗住搵淑怡咩?

 

  「唔洗驚,我即刻過嚟。」小林就算讀書同做嘢幾叻都好,佢始終都係一個女人,喺出事果陣都需要嘅男人嘅照顧。

 

  油麻地去薄扶林話遠唔遠,飛的行西隧都要幾個字。而當我去到嘅時候,一大隊衝鋒隊已經到場,小林旁邊仲企咗個女警係度安慰緊佢。

 

  「你無事呀嘛?唔好意思我咁遲先過到嚟。」我立即上前慰問小林。

 

  「啱啱先錄完口供,啲警察幫我搵緊個變態佬,一定要快啲拉到個衰人。」小林嘅情緒睇嚟已經穩定番,但我仍然好清楚咁見到佢左手前臂上面嘅鮮紅色抓痕,我諗頭先佢一定係經歷咗好強嘅掙扎。

 

  「你頭先係咪同個變態佬糾纏嚟?如果你哋有身體接觸,咁交比警察化驗會唔會搵得番佢嘅DNA?」我突然鑑證專家上身問咗小林呢個問題。

 

  「佢捉住我隻左手唔肯放,仲HURT到我,但佢好小心咁戴咗手套…」小林答。

 

  「咁個男人係咩樣架?有無啲特徵?」我好想CONFIRM吓小林遇到嘅呢個變態佬,究竟係咪我見過果個變態佬。

 

  「佢係一個幾大隻嘅男人…戴住口罩我睇唔到佢個樣,但佢對眼有股好強嘅殺氣。」同小林嘅背景雖然差天並地,而我亦無詳細同小林講過個變態佬嘅外貌,我都幾可肯定想老強小林嘅就係我想搵嘅果個人。

 

  「係呢,點解你要成半個鐘先嚟到架?乜你唔係喺屋企咩?」小林問。

 

  「我啱啱喺油麻地過嚟呀…」我答。

 

  「咁夜你仲喺九龍果邊做咩?平時你好早瞓架喎。」估唔到小林自己差啲出事,都咁關心我。

 

  「ER…無嘢呀,過去信和睇吓嘢咋嘛。」我求其作咗個原因諗住過骨,我唔想講自己因為陣菊花味而日日去譚仔食晚飯嘅事比小林聽。

 

  「打比你果陣都差唔多十二點,信和都閂咗門啦,DON’T LIE TO ME!」小林擺起咗個嬲嬲豬嘅樣,諗起自己走去呃一個差啲比人強姦嘅受害者,我真係有啲唔啱。

 

  「其實件事就係咁嘅…」我將我嘅開心大發現講曬比小林聽。

 

  「咁你呢家仲有無咩頭緒呀?我唔想再有其他人遇害喇!」小林話。

 

  「我哋遇到果個變態佬應該係同一個人,但我諗極都唔明點解我會遇到一個咁似個癲佬嘅人,佢臨尾仲要走咗入廣華醫院。」

 

  「會唔會根本個變態佬就係喺廣華度番工?或者係TWINS?或者今次只係意外,姦我果個人唔係你之前見到嘅果個。而就算上次你喺醫院見到個變態佬,佢都係嚟番工,今晚都係。」小林做咗個大膽嘅猜想,佢企係受害者嘅位置,比我更想搵到個兇手,個變態佬根本就唔係想探人。

 

  「但係佢上次想殺淑兒果陣係著住件醫生袍喎…有乜可能啊?」

 

  「所有線索都要去跟,咁樣先唔會估估吓。邊個同你講DOCTOR就無可能殺人?強姦人嘅一定要好似你咁係洗廁所嘅?」小林突然間講到有啲激動,連自己人都唔幫一幫口,我終於明白讀書人同我呢種平民係睇問題上面視野上嘅分別。

 

  「你講得啱,係我太睇低自己。」我望住受咗傷思路仲咁清晰嘅小林,出現咗種由心而發嘅慚愧。

 

  「I think I can help,醫管局內聯網有個好大嘅資料庫,有曬咁多間醫院職員嘅相同資料,唔理佢係醫生、護士定係工友,我都可以查到佢哋嘅資料。」

 

  「個人資料嚟架喎,乜你有權睇人哋嘅資料架咩?會唔會搞到你連醫生都無得做架?」睇電視都有教,亂咁拎人哋嘅資料絕對係犯法。

 

  「為咗香港女仔嘅safety,我唔想有第二個我出現呀,你明唔明啊?無間道咪無間道囉!」上次信和呀俊同呀豪都係因為件事殺到埋自己身所以先應承幫手,今次小林都係一樣情況。

 

  「但你連佢嘅名都唔知喎,點查呀?」我諗起我頭先喺譚仔影咗個疑犯一張相,雖然係偷影唔係好清,但總算睇到佢個樣。然後,我將幅相SEND咗去小林個WHATSAPP度。

 

  「等我好消息,如果佢真係喺醫院度做,咁一切都會真相大白。」小林嘅意志愈嚟愈堅定。

 

  「重案組,電台。」警察部對講機傳嚟一把聲音。

 

  「SEND,電台請講。」

 

  「謝斐道有單「屍體發現案」,女死者懷疑死之前比人強姦,除咗頭部有傷痕之外無明顯被虐嘅痕跡,已經過咗身超過個半鐘頭,過去睇睇吖。」

 

  謝斐道?姦殺案?又係我啱啱離開咗嘅地方,點解除咗頭兩次嘅兇殺案,之後每次發生大單嘢都會同我有關?媽,我好亂啊!

留言

    未有留言

分享