廁探Toiletective

第16章 - 三劍俠

  「今晚出嚟食飯?好耐無見喇!」

  半粒鐘之後……

  「喂,唔得都出句聲吖。」

  喺資訊爆炸嘅今日,通訊APP可以令人與人之間嘅溝通無遠弗屆,話之你係WHATSAPP、WECHAT定INSTAGRAM,甚至係大陸人先用嘅QQ,唔理係咩時間同咩地方,你用廿秒打個訊息,就可以搵到你嘅老友。

  但唔知究竟科技令人嘅距離係遠咗定近咗,已讀不回藍剔嘅感覺令我相當難受,見到佢喺線上彈出又彈入就更加火滾,尤其係當我真係有嘢需要幫手嘅時候。

  「屌你,做咩唔覆我whatsapp!」我終於忍唔住打咗比佢。

  「唔好意思大佬,小弟要搵食架嘛,個個幾百萬上落等住我架!」

  呢個係呀俊,雖然我都唔知佢邊撚度俊,但總之佢就係叫呀俊,係我中學最好嘅朋友之一。而逢親唔識佢嘅人,都會比佢講嘅嘢嚇死,但如果你真係了解佢,你係絕對會笑死。

  「乜撚嘢幾百萬上落呀,我起碼億億聲架喎!」

  「係咪想拎貨呀又?你個衰鬼!」

  無錯,呀俊係一個生意人,佢由中學畢業之後就自己創業,然後無幾耐就唔知發咩癲而搬咗出去自己一個人住,一手一腳撐起成盤生意,雖然唔可以話大富大貴,但總可以話係自食其力,ONE MAN BAND忙到無時停,比起我呢個洗廁所,日日都要睇經理面色嘅嘅廢柴叻得多。

  「唔係呀,其實我係想搵你幫手……」

  「洗鬼用手咩,我等陣寄件好嘢比你啦!」

  「真係唔係呀,你聽我講先…」

  於是,我將我喺呢半個幾月嘅奇遇話咗比佢聽。

  「我得閒都去搵吓女朋友出火啦,係老友嘅,我留返個最新型號嘅飛機杯比你,但果壇嘢就免喇!」

  「我真係好需要你嘅幫手架,我等你電話吖,三日內覆我吖。」

  「喂…喂…喂…」佢話佢嘅電話訊號好似收得唔係咁清楚,然後就收咗線。

  雖然比喺廟街賣性玩具嘅呀俊狠狠咁拒絕咗,但我仲有呀豪,佢係我呢個無乜朋友嘅LOSER嘅最後希望。

  記得當年喺中學嘅時候,我哋三個毒撚自封為「三劍俠」,毒來毒往,以三個人嘅力量排斥曬全間學校。雖然無人知道我哋花朵嘅來由,以為我哋一齊打機打到上腦,但有啲嘢,我哋三個心照就OKAY。

  係就係打機,不過係一齊打飛機。喺中學嘅時候我哋一齊意識到性愛對於人體身心靈發展嘅重要性,所以自然就會將我哋嘅珍藏公諸同好,乜嘢明日花啊,乜嘢蒼井空啊,乜嘢吉澤明步啊,都係我哋嘅中學生涯入面真正嘅老師。而畢咗業之後北上尋歡就少不免,東莞羅湖福田口岸,都留低咗我哋唔少嘅鳩毛。

  「喂,唔該呀豪吖!」

  「你所打嘅電話暫時未能接通,請你遲啲再打過嚟吖,THE NUMBER YOU HAVE DIALED……」打咗幾次佢嘅電話都無人聽。


  又係嘅,今時今日嘅呀豪,已經貴為香港九龍一樓一馬伕嘅主管,唔再係以前果個一齊去揼邪骨嘻嘻哈哈嘅佢,手下幾百條女跟佢搵食,由A排到去Z都有,我指個名,又真係無乜可能隨時隨地聽到我嘅電話。

  於是,我留咗個口訊比佢哋,希望佢哋可以喺三日內打返個電話比我,點都好,出嚟食餐飯慢慢講。

  「不見一日,如隔三秋」,如是者我就喺工作中度過咗九年,結果呀俊同呀豪都無再打返比我,但三日內我就收到超過五個入境快遞嘅電話,明明我從來都無淘寶嘅ACCOUNT。


  有人講過感情係唔會因為距離而脆弱,係人嘅選擇先至會。我唔明點解我人生入面嘅兩位好朋友會唔理我,我又唔係賣保險,我又唔係做傳銷,我更加唔會叫你去信教。我只係想佢哋兩個可以喺果幾單兇殺案上面比啲意見我,睇吓佢哋會唔會有啲新嘅角度,唔係要佢哋冒乜嘢危險去捉賊。我望住一直擺喺我銀包入面果張「三劍俠」嘅合照,唔知點解有啲眼濕濕,心酸到想一嘢撕爛張相,但又唔捨得。

  可能香港真係一個食人嘅地方,一出嚟做嘢之後唔好話要一齊去做「三劍俠」,約埋食個飯都難,個個都要為口奔馳。

  想發生嘅嘢無發生到,唔想發生嘅嘢,就偏偏發生咗。一扭開電視機,又有女仔遇害嘅消息,但今次唔係姦殺,而係被失蹤,香港呢個社會,究竟痴咗邊條筋。

留言

    未有留言

分享