已讀不回死全家!

第85章 - No New Messages

我襟咗一下門鐘。

聽到屋入面有人行過嚟應門嗰陣好緊張,心入面幻想打開門嘅人會係楊悅盈。

明明做咗兩年同班同學,都好少可會留意佢;我唔知點解自己突然間會有啲咁嘅幻想。

入面道木門打開,我個心好似停咗一下咁。

但係開門嘅人唔係楊悅盈,而係楊太;裏面仲有個男仔喺度打緊機,應該係楊悅盈阿哥,但係望唔清楚佢咩樣。

「咦?你係…」佢見到我,好開心,但係似乎醒唔起我叫咩名:「呃…」

「何晞賢。」我費事佢唔知呃幾耐:「阿盈呢?」

「阿盈出咗去喎,你喺唔喺度等佢?」楊太打開埋鐵閘:「不過我都唔知佢幾時番…衰妹成日唔聽我電話。」

「咁我…下次再嚟啦,費事阻住你。」我雙手合十對住楊太講:「我晏晝仲要上堂。」

楊太見我咁講,都無再留我,淨係同我講聲拜拜之後就閂埋咗門。

口口聲聲話唔想阻住我嘅賴智勇企咗喺隔離單位門口,見我咁快講完,似乎都感覺到我摸門釘。

我對住佢搖搖頭,然後就一齊去番?口度搭?落去;成個過程中兩個人一句嘢都無講過。

我哋兩個一齊轉左,行過去便利店嗰陣,賴智勇終於忍唔住開聲打破沉默。

「兩點喇…遲到成個鐘。」賴智勇對住我笑一笑,故作輕鬆咁講,不過佢好明顯唔太自在:「唔知會唔會記缺點呢…」

——佢唔自在當然唔係因為驚遲到俾人罰:我睇得出,佢係擔心緊楊悅盈。

「唔會記缺點,最多警告啫。」我先佢一步行咗入便利店。

——點解我會睇得出佢係扮輕鬆、其實心入面有啲唔舒服?

「咁都仆街啦…實俾老母鬧到阿媽都唔認得…」賴智勇緊隨住我,兩個一齊行埋個雪櫃度。

——因為,我而家個感覺同佢一模一樣…

「我唔驚呀…」打開雪櫃拎咗兩枝可樂,再埋收銀處俾錢:「由細到大有啲咩大鑊嘢,我都係俾家姐叫佢幫我冒簽。」

我用八達通俾完錢,遞其中一枝俾賴智勇。

「多謝腎哥。」佢講完之後,我哋同時「嗞」一聲扭開咗個樽。

「不過…你就爽啦!」佢飲咗一啖汽水之後,用啲羨慕嘅語氣同我講:「我都好想有個家姐。」

「咪FF咁多啦。」

「有無相呀…俾我睇下你家姐啦…」賴智勇好誠懇咁問我:「你家姐靚唔靚女?」

「頂你個肺!」我笑住咁打咗佢一拳。

開咗學到而家我哋始終同6B班啲人有啲隔膜、好似兩個局外人咁,加上因為 #已讀不回死全家 呢個 In Joke,我對佢哋無乜好感;所以我同賴智勇就順理成章兩個自成一角,就越嚟越Friend。

我其實幾鍾意呢種生活,反正我本身就唔係啲鍾意埋堆、靠大邊嘅人;我甚至有時會喺賴智勇身上搵到啲同Billy允仔玩嗰陣嘅感覺。

我哋兩個行到去樓梯度,賴智勇似乎真係好驚遲到,好快就急步落咗半層。

但係我就無跟到落去,企咗喺原地。

其實我想搵個地方靜靜地坐低…

「喂…不如去樓下搵張長櫈坐下。」我終於向賴智勇提出:「無乜心情番學…」

「唔好玩我啦腎哥,真係諗住逃半日學?」佢喺下面擰轉身,抬起頭對住我講。

我點點頭。

「唔陪得你癲呀。」賴智勇尷尷尬尬講:「我又無家姐幫我冒簽。」

「挑…」我笑住咁對佢舉一下中指:「咁你番去啦。」

佢對住我揮一揮手,就連跑帶跳咁落埋剩低嗰半層趕番學校。

我一邊落樓梯,一邊Send咗個Whatsapp睇下有無得坐何晞媛順風車:

 

你今日有無渣車番學?一陣過嚟接我得唔得?                14:17

 

落咗唔夠幾級,我就停低咗,忽然間好想上去天台。

呢個以前曾經同Billy、允仔喺上面玩,渡過咗無數個晏晝;而家佢兩個無可能再陪我,而我亦都一直有意無意咁避開唔去番呢個老地方。

唔知做乜霎時間有個好強烈想再上去一次嘅感覺,所以企喺樓梯中間諗咗陣,我就調番轉頭向上行。

電話響,家姐打俾我。

「喂?你咁早放學嘅?」

「唔係呀,我晏晝唔想番學。」因為都係叫佢幫我簽手冊請事假,所以無必要呃佢:「今晚幫我簽個名。」

「吖你個仆街仔…」佢鬧完呢句之停咗停:「咁你而家喺瀝源?」

「係呀。」

「我可能要半個鐘先到…再打俾你啦。」講完佢就收咗線,感覺上應該係渣緊車。

半個鐘,還好。

終於上到天台,我行咗去嗰一大片空地嘅正中間——

然後留意到,欄杆嗰度有個長頭髮嘅女仔背對住我望住我哋學校。

我覺得自己好似即刻放低咗啲咩心頭大石咁,同時拎番個電話出嚟Whatsapp何晞媛:

 

都係唔使過嚟接我喇,我一陣自己番去                  14:19

 

雖然髮型唔同咗,但係我好肯定自己唔會認錯人。

竟然會喺呢度見到佢,有啲難以想像。

我笑一笑,嗌咗佢一聲,然後慢慢開始行埋去佢度。

 

-《已讀不回死全家》完-

留言

    未有留言

分享