已讀不回死全家!

第84章 - 84 Unread Messages

十月中,雖然太陽仲係有啲猛,但係感覺上已經無暑假嗰時咁辛苦。

楊悅盈自己一個喺瀝源天台,靠住牆坐咗喺地下;仍然係著住一身淺色衫嘅佢,同之前惟一分別就係頭髮長咗,出門口之前紮起咗條馬尾。

佢想向後挨埋牆,但係紮住頭髮頂住咗,個感覺好怪;最後佢決定放棄,拆咗條辮,將條橡筋箍番喺手腕度。

然後諗番起以前嘅自己。

以前佢一直都唔敢自己一個上嚟。

中一中二嗰陣,楊悅盈成日俾三個同班嘅女仔欺凌,喺課室會改佢花名、劃花或者撕爛佢啲書、掉咗佢啲嘢…等等;最恐怖嘅係,嗰三個女仔有時放學仲會捉佢上嚟呢度,剪佢啲頭髮,甚至…

甚至…

楊悅盈搣一搣自己塊面,強迫自己唔再諗啲痛苦嘅回憶。

…只能夠講,逼佢做咗好多連自己都不堪回首嘅嘢。

反正嗰段日子,每一朝起身都好辛苦,行番學校嗰段路好似上刑場咁;佢唔敢話俾屋企人聽、同學之間無人會幫佢。

佢試過鼓起勇氣同老師講,但係因為情況有啲嚴重,老師反而警告楊悅盈:如果只係同學之間玩下嘅話,佢就唔好亂講,因為呢件事可大可小。

情況一直維持到佢中三嗰年。

後來終於有一次,有個隔離班嘅男同學上到嚟撞破咗;當時佢無即時出面幫楊悅盈,而係直接番咗學校搵訓導主任告狀,三個女同學終於俾人重罰,仲爭啲鬧上警局。

最初以為搞到咁樣,欺凌者只會變本加厲,但係估唔到佢哋竟然收斂咗——

呢個時候,擺喺自己隔離部電話開始響。

——又係何晞賢?佢心諗:近排打得最多俾佢嘅就係何晞賢。

唔係。

打嚟嘅係一個佢無Save低嘅手提電話號碼;雖然佢無Save低呢個電話,但係對呢個號碼有啲印象:大約兩個月前嘅一晚,呢個電話打過俾佢。

佢猶豫咗一陣應唔應該接…

但係最後都係接咗。

「喂…」楊悅盈有啲戰戰兢兢。

「做乜唔番學?」

——嗯…無記錯…呢個電話號碼係Jessica嘅。

「你…點知我無番學?」楊悅盈打咗個突,開始懷疑佢係咪又透過啲電話Cam嚟監視自己。

「呢個時間,如果你番緊學又點聽到我電話?」Jessica有啲不屑咁答佢。

——嘖!俾佢一下講中咗,楊悅盈有少少不忿。

「打嚟做乜?」佢對Jessica語氣都開始唔係太友善。

「淨係想提一提你,你啲同學、6A班係車禍死嘅。」Jessica清一清喉嚨:「如果你想同人講啲關於你嗰班嘅奇怪科幻故事,無論你當面講又好,上網講又好——」

「又會點?」楊悅盈打咗個突。

「呃…唔會點;你當面講上網講,我都係吹你唔漲嘅…」Jessica講完之後自己開始笑:「但係我諗你而家知道講完會有咩後果?」

 

——開學嗰日佢忍唔住,想同全班嘅人講已讀不回死全家呢件事出嚟;但係佢發現啲同學望住自己嘅眼神,好快就變到望住啲精神病人咁…

——「你咁做係幫緊你自己;我咁同你講都係為你好。」原來自己一直都誤會咗Jessica呢句說話係咩意思。

 

「我唔知…」但係,楊悅盈仍然好硬頸咁答番Jessica個問題:「我淨係知我唔可以就咁當無事發生過;我過唔到自己嗰關。」

Jessica冷笑一聲。

「算把啦,我都曾經經歷過你呢個年紀,好明白——」

楊悅盈Cut咗佢線;報番前幾次俾Jessica Cut嘅仇。

已讀不回死全家…唔係;6A班同學呢件事,楊悅盈喺呢一個月嚟,不斷咁嘗試組織番、寫低成件事嘅細節,試過貼上網、亦都試過匿名Email出去俾記者。

最後當然係無登到出嚟。

但係佢相信自己總有一日會揭發真相,令到啲應該受罰嘅人被制裁。

楊悅盈曾經係喺被害嗰一方,但係有人拯救咗佢;中三嗰年幫過自己個男同學唔知對呢件事仲有無印象;但係楊悅盈一直都想搵機會同佢講聲多謝。

如果無佢嘅話,自己可能仍然只係一個日日俾人恰嘅女仔…

甚至乎會好似羅彥輝咁樣自殺…

企咗起身,將部機放番落裙袋。

行咗去天台邊伏喺欄杆度望出去。

 

——何晞賢…

 

佢望住自己學校,睇睇時間:而家14:17,Lunch Time完咗好耐。

 

——佢應該喺學校上緊堂?楊悅盈心諗。

 

其實諗通咗開學嗰日個情況之後,已經無再嬲何晞賢;因為佢明白點解何晞賢唔幫自己,甚至想出手阻止佢。

但係已讀不回咗佢差唔多成個月,如果而家主動Whatsapp番佢,好似有啲尷尬…

楊悅盈苦笑一下。

忽然間有個衝動想番學校搵佢。

但係諗咗一陣,決定都係繼續留喺度。

留言

    未有留言

分享