已讀不回死全家!

第83章 - 83 Unread Messages

#已讀不回死全家

下星期班會活動,我要去Book位…

邊個嚟嘅快啲覆我                12:24

 

我同賴智勇喺學校隔離間餐廳食緊Lunch嗰陣,班會主席張芷瑤喺6B班Whatsapp Group度Send咗呢段嘢出嚟。

我知道佢係專登打已讀不回死全家出嚟,連佢咁樣打係乜嘢用意都好清楚——雖然無人Add過楊悅盈入呢個Group,但係6B班近排開始當咗佢係個笑話咁,不時提番啲呢件事嘅嘢出嚟當笑話。

「屌…」我有少少嬲,熄番個Mon掉低個電話。

「算啦…過多半年就唔使理班人架喇。」同樣睇到個Message嘅賴智勇咁樣同我講咗句:「當睇唔到。」

我飲咗一啖檸檬茶,無回應到佢;因為佢根本唔明我嬲緊乜。

「佢…仲係無覆過你?」賴智勇試探性咁樣問我。

我依然無答佢,只係將部電話推咗去賴智勇面前;佢拎起咗嚟睇。

由開學到而家,已經過咗個幾月。

我幾乎每日都淨係同賴智勇一齊食飯放學;至於去咗隔離班嘅梁家豪同鄭綽婷…佢哋好似已經群番自己班嘅人,過番啲正常嘅校園生活,因為佢哋無搵過我,我亦都無再理佢哋——本身我同佢兩個就唔熟。

但係我好耐無見過楊悅盈。

開學嗰日,楊悅盈唔理我阻止,企咗出嚟同全班同學開始講番已讀不回死全家呢件事;起初啲同學好驚訝,但係楊悅盈講咗都未夠一半,班上面嘅氣氛就開始改變。

我見到啲同學——甚至乎Miss Cheung都係——開始皺眉,眼神存疑咁望住楊悅盈。

如果唔係諗住我哋幾個啱啱死咗大半班同學,佢哋要顧住「口德」,我覺得6B某啲同學應該會即場笑出聲,或者出聲講嘢串楊悅盈。

唔係…其實當時已經聽到自己位附近有啲人開始細細聲講嘢。

——哈哈,又幾好想像力…佢係咪傻撚咗?

——係咪叫創傷後遺症?其實佢都幾慘…

總之,Miss Cheung見勢色唔對,出手制止咗楊悅盈唔俾佢再講。

楊悅盈開始向住我同賴智勇——主要係我——投以一個好似求救咁嘅眼神。

——出句聲…好唔好…?

但係,當我發現啲同學沿住佢嘅視線望過嚟我度嗰陣,我乜嘢都無做、乜嘢都無講。

淨係個腦一片混亂,有啲怯…

當然賴智勇都一樣。

無辦法之下,楊悅盈惟有番咗埋我隔離坐低。

嗰日,佢全日都無再同我講過嘢。

第二日,佢無番學。

第三日都無。

之後嗰一個星期、兩個星期;直到而家,佢都無再番過嚟學校。

賴智勇見到我呢一個月以嚟俾楊悅盈已讀不回咗嘅嗰啲Message,皺一皺眉。

「…Facebook Messenger呢?」賴智勇繼續問。

「同之前一樣,唔覆。」

「有無打過俾佢?」

「都係,Cut我線。」

「咁——」

「唔使再問喇。」抬起頭望住賴智勇講,一邊伸手問佢拎番部電話:「除非衝上佢屋企,如果唔係都幾難搵到佢。」

「我連Message都無Send過俾佢…」佢將部機遞番俾我嗰陣,好似都對楊悅盈有啲內疚咁:「唔敢…唔好意思Send…」

我望住啲Send俾楊悅盈嘅Message…對隔離嗰個雙藍剔又愛又恨。

因為咁樣代表佢唔想睬我,完全唔想理我。

但係同時亦都代表佢…至少…仲睇到我啲Whatsapp、Cut到我電話。

「唉…但係就算搵到又可以點?」佢苦笑一下:「叫佢番學?而家班人咁樣…」

「6A班車禍」呢件事過咗已經個幾月,開始無乜人再提;反而6B班嘅人就喺呢個時候,開始拎番楊悅盈講嘅已讀不回死全家呢件事出嚟,好似當咗做圍內一個笑話咁成日用嚟講。

 

唉…Cindy又唔覆我Whatsapp #已讀不回死全家 啦…

 

跪求舊年Math Past Paper #已讀不回死全家

 

Miss Cheung聽日生日,Lunch約食飯邊個到? #已讀不回死全家

 

好在楊悅盈自己唔知…但係我每一次聽到,都會不禁有啲嬲。

嬲最主要其實唔係嬲佢哋——而係嬲我自己。

點解我當時唔阻止佢,或者一直陪住佢…

雖然結果可能同而家一樣,但係至少…

忽然間好想知道楊悅盈而家點;呢段時間以嚟我一直都有個念頭。

而家終於決定唔再考慮咁多,直接實行。

留言

    未有留言

分享