已讀不回死全家!

第82章 - 82 Unread Messages

正如我所料, Miss Cheung同我哋講五個要分做兩批,去剩低嗰兩班理科班上堂。

不幸中之大幸,我真係可以同楊悅盈同埋賴智勇同番一班,6B;梁家豪同鄭綽婷就去咗6C。

而且,學校安排咗我哋五個見駐校社工,一個星期要見兩次,維持一個月。

我哋行入6B課室嗰陣,感覺到佢哋全班都靜咗一靜,然後所有注意力放晒過嚟。

開始有啲低語聲。

課室最後排一個角落放咗四張空枱,Miss Cheung示意我哋過去坐。

賴智勇帶頭行過去,我跟住佢後面,楊悅盈一直耷低頭跟喺最尾。

望一望呢班同學;中三先轉校過嚟嘅我,除咗四五個同我同過班嘅之外,我幾乎全部都唔識。

行嘅途中,不時會有同學向賴智勇打招呼,或者拍一拍佢以示鼓勵;楊悅盈行得好貼近我,好似唔想俾人見到佢咁。我雖然唔知點解,但係由得佢。

去到角落嗰四張枱,賴智勇坐喺尾二嗰行,我同楊悅盈坐咗喺佢後面。

見到我哋坐低咗之後Miss Cheung就開始同6B班同學講我哋三個嘅事,大部份同學都即刻望番向前面,但係我仍然感覺到有啲目光停留咗喺我哋身上。

楊悅盈坐低咗之後就繼續耷低頭望住自己枱面。

嗰幾單新聞代表嘅嘢,大部份都係今朝我同佢兩個自己推敲出嚟;而自從嗰陣開始,佢就一直灰到而家。

「你…真係可以當無事?」楊悅盈用一個細到幾乎聽唔到嘅聲線,重覆咗一次佢尋日問我嘅呢個問題。

我無答到佢。

「我哋全班人…無緣無故咁死晒…」

佢轉頭過嚟望住我。

「無人需要負責,無人向我哋補償、交代…」然後繼續問:「仲要無人知道事實係點樣;你接受到?」

窗外面嘅陽光照入嚟,啱啱好曬住佢;佢今日望落比起平時更加蒼白,加上佢全黑嘅頭髮同埋瞳孔,我覺得佢成個人好似無咗顏色咁。

但係…無辦法。

「…唔係我哋可以點?」我歎咗一口氣,反問佢。

「將件事講番出嚟。我唔信咁大件事…可以俾一單假新聞完全掩蓋住。」

我輕輕力捉實佢隻左手,望住佢對眼。

「算啦…」發自內心咁同佢講:「我哋無事就得,其他嘢…唔好再冒險。」

佢望住我嘅眼神有啲失望、有啲憂鬱;然後用力掹番自己隻手出嚟。

我仲未意識到楊悅盈想點嗰陣,佢已經舉起咗隻手。

「Miss Cheung,我有嘢想同大家講。」

Miss Cheung頭先講緊啲其他嘢,俾楊悅盈突如其來一句搞到窒住咗;其他同學好似終於搵到理由繼續觀察我哋咁,幾乎全部人同一時間望晒過嚟。

楊悅盈企起身,想行出去。

唔理得其他同學嘅目光,我再一次捉住佢。

楊悅盈低頭望咗我一眼。

我對住佢搖搖頭。

佢有啲無奈,甩開咗我隻手。

然後楊悅盈就喺眾目睽睽之下行咗去一面疑惑嘅Miss Cheung隔離。

我好想跟埋佢出去,再拖番佢入嚟——但係自己呢個時候開始亂諗嘢。

點解咁多同學嘅家長,要揀何穎璇屋企人?

係咪對我嘅警告?

MTCC為咗掩飾呢件事,呢件意外,可以做到咩程度?

我個人好似生咗根咁,無論幾想企起身,都無能為力。

賴智勇一樣眼白白咁望咗一下已經企咗喺Miss Cheung隔離嘅楊悅盈,然後垂低咗頭。

楊悅盈好似叫Billy約人番嚟嗰一日咁,乜嘢都無講,淨係慢慢掃視一下全班同學;當日我唔明點解佢要咁做,但係而家知道,其實佢好緊張。

全班同學同埋Miss Cheung都唔知發生緊咩事,一齊望住楊悅盈。

但係佢目光停留咗喺我身上。

「我想同大家講…」見到我無動於衷,楊悅盈歎咗一口氣。

「我哋班…6A班唔係死於車禍,而係——」

留言

    未有留言

分享