已讀不回死全家!

第80章 - 80 Unread Messages

我番到屋企嗰陣,家姐喺廚房煮緊嘢食。

頭先打俾佢問先知道,阿爸阿媽班機Delay咗,可能要半夜先落機;所以佢話今晚自己煮嘢食。

我見佢部電腦擺咗喺飯枱,不過佢本人唔喺度;同時聽到廚房開咗抽油煙機。

我番入房,求其將件外套掉咗上床度,就出番廳。

行埋梳化度一嘢撻咗落去,合埋眼;呢幾日以嚟,終於第一次可以毫無顧忌咁休息、瞓覺…

但係聽日就開學…

我哋班得番五個人,連班主任都無埋…

諗起Billy同允仔…陳佩珊…Elaine…

點解會變成咁…?

「呀——!」我忍唔住大嗌咗一聲發洩。

諗住恰一陣,但係先發現自己完全瞓唔著…

忽然俾人好大力咁拍落我個頭度。

「嘈乜呀?番到嚟又唔講聲!」

我即刻擘番開眼彈起身。

「仆街仔!叫你洗碗又唔洗!」見到何晞媛對住我破口大罵個樣,佢似乎係真嬲:「無煮你嗰份呀!」

「煮乜咁巴閉…」我笑住咁串番佢:「咪又係公仔麵。」

似乎俾我講中咗,佢撐一撐大對眼準備繼續鬧我。

如果平時俾家姐又打又鬧,我一定會還口。

「好撚失禮你咩?」

但係唔知點解,我而家聽到佢鬧我,反而有啲開心。

我耷低頭呼咗一口氣:諗番起今朝出門口嗰陣…我其實好驚以後都見唔番佢…

「喂!同緊你講嘢呀!」

抬高頭望番住佢,發現自己睇嘢有啲濛…所以我捽咗下眼。

「喂…何晞賢…」家姐見到我咁,態度就軟化番:「鬧你兩句啫,唔使喊吓嘛…」

我望住家姐,微笑住搖搖頭。

同時感覺到自己啲眼淚開始流出嚟,所以耷番低。

「唉…」佢歎咗一口氣,然後就喺我面前踎低咗,用手托番起我下巴。

「做乜嘢呀?」佢用手背抹走我啲眼淚,然後摸住我塊面問我。

我無答到佢。

「一時又話張允行死咗…一時又帶個女仔番嚟…一時又問埋晒啲奇怪嘢…」家姐轉咗把十年都唔用一次嘅溫柔聲出嚟:「係咪有咩事?」

我望住家姐,點一點頭。

「咁你話俾我聽發生咗咩事?」

呆一呆,我諗咗一陣。

其實由第一日開始,我已經好想將成件事講晒俾家姐聽。

——而家Admin已經玩完,我部電話都清咗MAD…我話俾家姐聽…佢應該唔會有事?

但係最後都係搖搖頭:我覺得自己而家呢個狀態,無可能將成件事清楚講到出嚟…而且我唔想講完出嚟令到佢擔心。

因為佢就算知道咗,都做唔到啲乜嘢。

「遲啲先…我有啲攰…」所以我咁樣同佢講。

佢苦一聲企番起身,無再追問落去。

「好啦咁…」佢呼咗啖氣,把聲變番平時嗰個何晞媛:「我煮埋你嗰份架喇…等多陣。」

我望住佢個背影:雖然乜都無講到出嚟,但係同佢傾咗兩句之後覺得個人好似輕鬆咗。

「何晞媛…」忽然間好想嗌佢:「家姐!」

佢擰轉頭望一望我,用眼神問我乜嘢事。

「無呀…」我雙手揞住自己塊面,深呼吸咗一下:「唔該晒…」

「唔好咁好禮貌啦…我會驚架…」佢拋低一句之後就行番入廚房。

「但係啲煲同碗你洗。」然後喺入面補充咗一句。

「好…」

我雖然口係咁講,

但係下一秒,

我就攤番落梳化度,

好快瞓著咗…

留言

    未有留言

分享