已讀不回死全家!

第79章 - 79 Unread Messages

何晞賢望住自己個表情有啲奇怪,楊悅盈先至意識到自己可能講錯嘢。

但係佢咁講其實無其他意思…

「我屋企有人…」佢感覺到自己有啲面紅:「我諗住上去換件衫,俾番件褸你。」

「吓?」何晞賢好似恍然大悟咁嘅表情:「好…好呀,你等我打一打俾家姐先。」

然後佢就行咗埋一邊,開始打電話。

呢個時候,楊悅盈袋入面部機開始震;佢拎咗出嚟睇,係一個佢未見過嘅手提電話號碼。

「喂?」

「妹妹仔?」原來打俾佢嘅人係Jessica:「番到屋企未?」

「你打俾我做乜?」

「聽日無論你睇到乜嘢都好…」Jessica好似專登壓低把聲咁:「你記住嗰個先係事實;已讀不回死全家呢件事無發生過。」

「…點解…?」

「我仲喺公司善後緊…唔方便同你講咁多。」Jessica模稜兩可咁答:「但係我驚你一時衝動,講咗今日聽番嚟嘅嘢出去。」

「哈,你想我幫你哋手冚住件事?」楊悅盈忍唔住怒極反笑。

「無人需要你幫,唔好睇得自己咁重要。」Jessica都唔服輸,語氣帶骨咁講咗句:「你咁做係幫緊你自己;我咁同你講都係為你好。」

「我唔係你哋呢種人。」楊悅盈好決絕咁講。

Jessica冷笑咗一聲。

「我知你唔係…但係你終有一日會變成我哋。」Jessica加強語氣講咗句:「係時候面對現實、成熟啲;大個女喇…唔好再諗住逞英雄。」

然後Jessica就Cut咗佢線。

「邊個?」何晞賢啱啱講完電話過番嚟。

楊悅盈猶豫咗一下好唔好話俾佢聽,但係最後決定唔講。

「打錯…」佢袋番埋部電話之後就開始行。

上咗樓,番到屋企門口,楊悅盈見屋企木門開住,淨係閂咗鐵閘,入面傳嚟一陣沙沙聲,應該係媽咪煮緊餸。

佢拉開鐵閘行入去,但係何晞賢企咗喺門口。

楊悅盈有啲疑惑咁望一望何晞賢。

「呃…我企喺度等得喇。」唔知佢係怕醜定點樣。

不過楊悅盈拉咗佢隻手一下掹埋佢入嚟。

「媽咪…」佢對住屋入面嗌咗一聲:「我有同學嚟咗。」

然後佢無理到手足無措嘅何晞賢就走番入房。

開咗盞枱燈之後,就除低件外套同埋自己啲衫。

「呀!同學仔!」佢聽到媽咪把聲喺外面:「你叫咩名呀?」

「Auntie…」何晞賢把聲有啲怕醜:「我叫何晞賢。」

楊悅盈換番平時喺屋企著嗰套,然後摺番好件外套。

「食唔食飯呀?今晚阿哥臨時有事唔番嚟,我煲多咗湯。」

「唔使喇,我一陣番屋企同家姐食。」

楊悅盈拎住件外套打開門。

見到纜住條圍裙嘅媽咪笑得好開心。

何晞賢企咗喺原地,雖然都係微微笑,但係睇得出佢有啲唔自然。

遞番件外套俾佢。

「唔該…」何晞賢拎番之後,即刻講:「咁我走先喇…」

「好呀,得閒再上嚟玩吖。」媽咪笑住咁同何晞賢講:「阿盈好少可帶朋友上嚟——」

「得喇。」楊悅盈打斷咗佢句嘢,去咗開門。

「Auntie拜拜。」何晞賢講完之後,好似求之不得咁馬上出咗去。

睇住媽咪行番入廚房之後,何晞賢就摸一摸楊悅盈個頭。

「妖!」楊悅盈有啲燥咁撥開佢隻手,但係佢反而笑一笑。

「咁…聽日番學校見啦。」

講完呢句,何晞賢就轉身行番過?口。

楊悅盈一直企喺屋企門口望住佢背影。

但係今次無叫停佢。

留言

    未有留言

分享