已讀不回死全家!

第78章 - 7͓͚̪̤̓ͥ8̙̗͇ͪͯ̓̓ ̱̯͈̺͂Ǘ͈̱͙̱̰̮̣͗ͫn̯̅̍r͕e̓̔̓a͎͔̫̗̫d͇̼̙̯̻̦̩̔̔̑ͦ́ ͇̞͖͂̾͊ͨͦ̚M̗̻͂ͭ́͒̈́e̺̮̖̞̙ͣ̊̉̾̿̋s͆̾̎ŝ̤͕̝̠̌͛ͩͤ̇̄a͇͎̯̟̽̑g̠̏̀̐͂ͥ̋ͬe͆s̖̺̳̠ͤ̐

「係咪…係咪真係無事架喇…?」

搭?嗰陣,梁家豪拎住部電話,有啲不安咁問我。

我點點頭。

賴智勇無出聲,但係感覺到佢輕鬆咗好多,其實我心情同佢一樣;而鄭綽婷…我睇唔出佢同頭先有咩分別。

反而楊悅盈就一直眉頭緊鎖,好似硬係覺得有嘢未解決咁。

「真係…?」梁家豪又再追問一句。

呢個時候啱啱好去到地下,我哋一齊行咗出?。

頭先經停車場直接上咗66樓嘅我,而家先發現呢度個大堂好大,尤其是呢個鐘數無乜人喺度,更加顯得有啲空曠;我見到有啲梳化擺咗喺度,所以無出到聲行過去。

其他人自動自覺咁跟住我,然後我哋五個坐埋咗一齊;有三對眼望實我好似等緊我發言咁。

「呃…頭先佢哋已經整壞咗Admin,同埋將我哋啲電話整番好。」我用最簡單易明嘅言詞去說明情況:「之後一兩日我哋可能仲會收到啲來自Admin嘅Message,但係上面嗰班人話唔使覆、唔使理。」

「係咪架…」梁家豪繼續存疑。

一直耷低頭無表態嘅楊悅盈呢個時候將佢部電話遞咗出嚟。

我哋哄埋去睇,兩分鐘前佢收到一個Admin嘅Whatsapp:

 

對̻̣̖̱͙ͣ͑͊ͩ́̄́͗͛̾͆ͬ͑̐ͣ̏͐̽͟͡ͅ不̴̛̺͖̯͙̻̦̯̼̥̣͚̭͙̫ͮ̌̈́͗̑̃͒̾̄̓ͥ̎̚͢͞起̨̒̒̄̔̚͏̸̸̸͓͙̫̖͕̰̪͖…̸̧̢͓͙̜̗͕͎̳ͣ͐̾̑ͯͬͬ͌͠͡              15:46

 

「我哋落嚟之後係咪未有人收過Admin嘢…?」佢問。

我哋幾個都搖搖頭。

「我哋五個開一個Group;我唔會覆呢個Message,半個鐘之後上去報平安。」楊悅盈望住梁家豪問:「咁樣OK?」

梁家豪皺起眉頭,似乎仲有啲擔心,但係都點點頭。

我望一望坐喺我隔離嘅楊悅盈:佢頭先一直都好似心事重重咁,就係因為呢個Message?

「嗯…OK嘅話,我想走先。」鄭綽婷講嗰陣已經企咗起身:「我約咗人。」

然後佢就拎住個手袋行咗出去外面,剩低我哋四個喺度。

「佢老味吖…」賴智勇鬧咗一句:「講到好似我哋阻住佢咁?」

「唔係嘅…如果無乜嘢,不如我哋都散。」楊悅盈袋番埋部電話:「聽日開學,大家早啲番去休息。」

講完之後,佢就起番身望住我。

「送我番去。」楊悅盈對住我講完之後,就慢慢行向大門嗰邊。

無辦法,我惟有同賴智勇梁家豪講聲「拜拜」之後就跟咗過去;賴智勇仲好鳩屎咁對我單咗下眼。

楊悅盈企咗喺門外面等我,見到我出番嚟就同我並肩一齊行,但係繼續毫無表情,又唔講嘢。

「做乜?諗緊乜嘢?」我忍唔住問佢。

佢搖搖頭無答我;但係我知道佢而家呢個狀態,一定係有咩唔開心、或者苦惱緊。

果然,行多兩步之後,佢終於出聲。

「聽日…我哋會點?」佢好似自言自語咁嘅語氣問:「Jessica話『無人會知道發生過咩事』…」

我呆咗一呆。

「你驚佢會對我哋做啲乜嘢?」俾楊悅盈咁樣講一講,我腦入面浮現出「殺人滅口」呢四個字。

但係佢再搖一搖頭。

「如果真係要對我哋做啲乜嘢…頭先就唔會趕我哋走。」佢好迷茫咁嘅樣:「只不過…我覺得——」

我停低咗,摸一摸楊悅盈個頭;然後佢抬起頭望住我。

「咁就OK啦…最緊要係我哋無事。」我發自真心咁同佢講。

「死咗嘅同學…吳啟鋒、張允行…仲有其他人…」但係佢皺起眉頭,好似想喊咁:「你真係可以當無事?」

楊悅盈語氣好似有啲怪責我咁,所以我唔敢望住佢雙眼。

「唔得…」我擰歪面答番佢:「我都不知幾想聽朝瞓醒…佢兩個就喺Whatsapp再搵我鳩吹,Lunch一齊食飯,放學上天台Hea…」

我望咗一眼背後嗰橦MindTech House…

——但係而家我哋又可以點?我心諗。

 

***

 

之後成程,楊悅盈都無同我講過嘢,上咗車之後淨係托頭望住窗外面。

我唔知佢係嬲,定係仲諗緊佢頭先講嗰個問題,但係我都無再出聲同佢傾計。

番到沙田、行緊去瀝源邨嗰陣,我部電話震咗一震。

賴智勇開咗個叫做6A嘅Group,成員得我哋五個倖存者;佢劈頭第一句就問:

 

@6A-楊悅盈 你無事吖嘛?           16:39

 

我身邊嘅楊悅盈望住地下,仍然粒聲唔出,所以我代佢覆咗一句:

 

無事…佢喺我隔離

大家可以放心              16:40

 

Send完之後我無收埋部電話,想睇下梁家豪會唔會仲有咩問題;點知都未夠一分鐘,鄭綽婷就Quit咗個Group。

我即刻打咗個突,有少少無名火起。

 

Quit呢個Group會唔會有事…?             16:42

 

我最初以為係賴智勇搞爛Gag,但係問嗰個原來係梁家豪,所以認真答佢一句:

 

唔會…無事架喇,你放心啦…                  16:43

 

賴智勇好似講笑咁補咗句:

 

如果你Quit我聽日打柒你             16:43

 

見到佢呢句,記番起平時同學之間打打鬧鬧嗰啲胡鬧嘢,所以我微微一笑。

遞咗部電話俾隔離嘅楊悅盈睇;佢望咗一陣,好勉強咁笑咗一下,繼續一句嘢都無講。

終於番到佢屋企樓下,行過嚟嗰段路我俾太陽曬到好熱,本身已經好攰嘅我覺得自己就嚟中暑。

著住件黑色外套嘅楊悅盈應該都唔係好得我好多;所以我入便利店買咗兩枝水,遞咗一枝俾佢。

我擰開樽蓋,灌咗兩啖冰水,先覺得舒服番啲,抒咗一口氣。

「唔該…」楊悅盈雖然拎咗枝水,但係只係渣住,無開嚟飲。

「好啦…咁聽日見。」我語重心長咁同佢講:「唔好諗咁多嘢喇…拜拜。」

佢有啲猶豫,但係「嗯」咗一聲。

再摸一摸佢個頭,今次佢有啲厭惡咁撥開我隻手。

我微微一笑就擰轉身行去搭車,同時拎咗部機出嚟諗住打俾何晞媛——

「何晞賢!」楊悅盈忽然間叫咗一聲。

行咗兩步都唔夠佢就叫停我,我有啲奇怪,所以回頭一望。

「陪埋我番上去…」佢攬住枝水,細細聲同我講。

留言

    未有留言

分享