已讀不回死全家!

第77章 - 77 Unread Messages

Jessica講完之後,見到何晞賢同楊悅盈兩個都一面迷茫,唔知係消化緊佢講嘅嘢,定係根本就完全聽唔明。

電腦上面條Bar已經Load到100%。

佢睇一睇手上部機,Admin喺已讀不回死全家入面連續Send咗一堆亂碼出嚟;Jessica知道Admin已經死咗。

同佢預計嘅一樣。

楊悅盈嘅諗嘢同行動方向都係同Admin啱啱好相反;所以Jessica知道將佢嘅想法Merge落去Admin度,個AI就會Crash。

呢個時候Ivan衝咗入房,手上面拎住一部電話。

「你啲同學喺出面等緊你哋。」佢一路行過去何晞賢度,一路對住佢同楊悅盈講。

何晞賢接過部電話,但係似乎無諗住走。

因為楊悅盈仲係望住Jessica,唔知等緊啲乜。

「點?」Jessica碌大眼望番住佢。

「成功咗?」楊悅盈問。

Jessica點點頭,然後遞咗手上部機俾佢同何晞賢睇。

「見唔見到啲亂碼字?」Jessica指一指個Group入面嗰堆嘢俾佢兩個睇:「咁即係代表個AI Operation有問題,如果你唔信嘅話,我可以俾呢個AI嘅Facebook——」

「得喇…唔使。」何晞賢唔知點解打斷咗佢。

Jessica本身諗住開埋個Facebook Page——LYFS——俾佢兩個睇下一個唔可以Funtion Properly嘅AI會係點;但係嘅然何晞賢話唔使,佢就慳番。

「你哋呢一兩日可能會仲收到啲Admin Send過嚟嘅嘢;好彩嘅話唔會有。」佢繼續講:「但係嗰啲你哋唔使理,唔好覆佢;佢而家Crash咗之後,呢啲手尾我哋好快可以執到。」

——如果將個AI當成人嚟比喻嘅話,Jessica會話佢就算未死都已經身受重傷。

何晞賢同楊悅盈兩個無再講嘢、無再問問題;Ivan呼咗一口氣,好似有啲唔耐煩。

「OK?咁你哋——」Jessica鬆咗一口氣,諗住叫佢哋走。

但係俾楊悅盈打斷咗。

「你應承過我。」楊悅盈指一指部電腦插住嗰隻USB同佢講。

——麻撚煩…Jessica蔑一蔑嘴,然後開始喺楊悅盈面前清走隻USB同埋部機上面楊悅盈頭先輸入嘅嘢。

Ivan動作有啲誇張咁睇咗下錶,似乎同緊Jessica講佢好唔得閒;但係Jessica無理到佢。

「如果無乜嘢你哋走啦,我可以講嘅係咁多。」Jessica望住部電腦但係對佢兩個講。

「就係咁?」楊悅盈個表情好驚訝。

「係咁。」Jessica好簡單咁答番佢一句。

「我哋班死咗咁多人,你哋…你哋無人要負責?」佢有啲激動咁問。

「無,因為…」Ivan插嘴講咗句:「唔會有人知發生過咩事。」

「走啦…」已經達到咗目的嘅Jessica唔想再同佢晒時間:「一係你自己行出去,一係我Call Secure。」

楊悅盈交替咁望佢兩個,塊面紅晒,好似尋日喺樓下會議室發脾氣嗰陣咁樣。

但係何晞賢扯一扯佢隻手,好似想叫佢走咁樣。

終於,楊悅盈屈服咗,乖乖地咁同何晞賢跟住Ivan離開咗呢間房。

臨出去之前,楊悅盈再同Jessica四目交投咗一下;Jessica微笑住同佢揮手講拜拜。

 

***

 

Jessica除咗副眼鏡,坐喺張櫈度托住頭發呆。

由尋日開始到而家,佢心情都係有啲興奮、又有啲意外。

因為佢無諗過自己做出嚟嘅AI竟然咁快可以發展到咁。

楊悅盈同佢啲同學嘅呢件事…雖然係一件意外,亦都證明咗佢呢個系統係個失敗產品。

但係之所以失敗,係因為做得太成功——佢嘅AI差唔多變到好似真係一個人咁。

忍唔住望一望枱面放住、頭先用過嗰隻USB…

有人喺外面敲門。

「Come In。」

Jessica回頭一望,豪仔入咗嚟。

「呃…Jessica?」佢一如以往好似好驚青咁款:「呢度搞掂未?」

「OK架喇,不過——」

佢拎起枱面隻USB拋咗過去俾豪仔。

「——你幫我睇下Re唔Recover到。」

豪仔有啲輪盡咁接唔住隻USB跌咗落地,所以佢彎低身執番。

「無問題。」佢托一托個眼鏡,補問一句:「公司嘢?」

Jessica皺起眉諗咗一諗,然後搖搖頭。

「唔係,我自己Research用。」佢答番豪仔,心諗都唔算係講大話。

因為就算Recover咗楊悅盈頭先嗰啲嘢,全部又好,一部份又好,對佢而家幫公司做緊嗰個維穩AI都係無乜大幫助——但係佢好有與趣當係自己嘢咁樣研究落去。

好想試下模擬一個楊悅盈出嚟,睇下佢呢種性格,將來大個咗會變成點…

Jessica諗緊嘢嘅同時,豪仔粒聲都唔敢出;但係有一個人門都無敲直接開門入咗嚟。

「好,送咗班?仔?妹走。」Ivan見到豪仔喺度,對住佢揚一揚眉:「喂,啱喇,有嘢俾你做。」

「係,你講吖。」豪仔恭敬到有啲誇張。

其實Jessica叫過豪仔好多次,對住佢自己同埋Ivan,唔需要咁嘅態度。

由佢哋啱啱喺大學認識開始,豪仔已經當咗佢兩個好似老闆咁服侍;估唔到過咗十幾年,豪仔無論係態度定係個樣,都無乜點轉變過。

「Contact警察嗰邊,話件事已經Resolve咗,照Jessica個Proposal Proceed。」Ivan開始對豪仔落指令:「另外打俾盧Sir Office,你話我哋嗰隻防暴聲納武器已經改良咗…可以約個時間再傾一傾。」

豪仔一路聽,一路點頭,Ivan一講完佢就急步走番出去。

然後,Ivan拉咗張櫈過嚟坐咗喺Jessica隔離,有啲得戚咁對住佢笑。

「點呀?而家無事啦,仲乸埋口面。」佢拍一拍Jessica膊頭。

——唔係你整嗰套MAD強度失控,死咗人,其實唔會有咁多手尾跟…Jessica心入面諗…如果只係個AI開咗個Group,或者搵番自己啲同學,大不了當係俾人Hack Account;根本就唔需要驚動到佢哋。

「食屎啦你…」Jessica將頭先啲諗法用四個字總結。

「不過頭先嗰班?仔?妹…」Ivan有啲試探性咁問:「佢哋知咁多嘢,唔怕?」

「怕乜?」Jessica反問。

Ivan知Jessica明知故問,所以反一反白眼。

「我講咗好多次,跟我尋日個Proposal去鋪番件事就無問題…」Jessica答佢:「到時佢哋醒目啲,就知將呢件事嘅真相講咗出去都唔會有人信。」

Ivan聽到之後露出一個好滿意嘅表情。

「咁我去做嘢先,有咩進展再傾。」佢起身諗住離開;但係行到去門口,又停咗喺度。

「喂…其實我覺得…」佢望住Jessica背影:「頭先嗰條?妹…楊悅盈,有啲似你以前。」

Jessica無回頭,但係舉起咗隻中指。

Ivan冷笑一聲,終於走番出去。

留言

    未有留言

分享