已讀不回死全家!

第75章 - 75 Unread Messages

「如果我爆番你哋啲嘢出去…你會點?」我閂埋車門嗰陣問Ivan。

「爆番啲嘢出去?」佢忍唔住笑咗兩聲:「我勸你唔好添呀。」

見到佢呢個反應,我唔係太舒服——佢咁講即係威脅緊我哋?

望一望賴智勇,佢皺住眉對我搖搖頭,我唔明佢咩意思。

但係Ivan無再理我哋,淨係鎖咗車之後,就開始行過去?口,我哋四個惟有跟住佢。

MindTech House個停車場比我想像中細,但係拍滿咗車;行緊嘅同時Ivan打咗個電話。

「我到咗,你仲有幾耐?」聽佢咁講,應該係打俾豪仔:「好,上我Office等。」

我哋一行五人入到?,Ivan襟咗66樓,然後就無再出聲。

賴智勇、梁家豪,甚至連鄭綽婷都好似精神繃緊咗咁,耷低頭望住地下,不時偷望我或者Ivan一眼。

「就算我哋幾個唔講出去都好…」反而係我主動再聊Ivan講嘢:「你點樣同啲死咗嘅同學佢哋屋企人交代?如果佢哋睇住自己啲仔女爆頭死,你可以點同佢哋解釋?」

Ivan無答到我,淨係用一個好似覺得我好弱智咁嘅眼神望埋嚟。

好快架?就到咗,我哋跟住佢,行咗入MTCC Office——如果係貿貿然撞上嚟,未必會知呢度係乜嘢公司,因為呢度門口係公司名、招牌、Logo等等乜都無。

按賴智勇尋日所講,佢哋係去咗65樓,即係呢一層佢都未嚟過。

我哋跟住Ivan經過咗幾個大嘅Working Space之後入咗佢間辦公室,佢埋番自己個位坐低咗,好似好舒服咁挨咗落背度。

「坐,等埋豪仔番嚟就好快搞掂。」佢指一指張梳化同我哋講。

佢哋三個聽到之後仍然唔郁,而係再次好似等我俾指示咁望過嚟我度;搞到我又開始有啲燥。

「坐啦!望我做乜?」忍唔住大聲對佢哋講咗句;佢哋即刻三個人逼埋一齊坐咗落去。

「後生仔,唔好咁火爆。」Ivan好似攞景咁同我講咗句,然後佢企咗起身行過去門口:「你哋喺度等我一陣。」

我見到佢想走,所以企咗喺道門前面意圖擋住佢。

「楊悅盈呢?我要見佢。」

出乎我意料地,佢揚一揚眉,竟然無反對。

「哦…咁…你跟埋我過嚟。」

無理到另外嗰三個同學,我轉身就打開門同Ivan一齊出咗去,跟住佢嚟到另一間房前面;佢門都無敲就打開咗門。

一望入去,我就見到一個著住成套西裝,背對住我哋嘅女人;而楊悅盈就坐咗喺佢隔離,仲著住我今朝俾佢嗰件外套,皺埋眉頭咁對住部電腦埋頭苦幹。

「?妹!」Ivan叫咗一聲,楊悅盈同個女人同時望咗過嚟:「有人搵你。」

楊悅盈望到我嗰一刻,咬住咗自己下唇好似想喊出嚟咁;而我自從今朝送完佢搭?走之後,硬係有種講唔出口嘅感覺…好似驚自此之後見唔番佢咁。

忽然間有個衝動,好想衝過去一下攬住佢。

但係我無,我只係慢慢行去佢隔離。

「何晞賢?」個女人微微笑咁望住我:「我係Jessica,Nice to meet you。」

我無理到Jessica,而係企咗喺楊悅盈面前;佢起番身,垂低雙手耷低頭,挨咗落我心口度。

聽到背後Ivan同Jessica細細聲講嘢,又感覺到佢哋嘅視線,我有啲唔好意思;擰歪面望一望部電腦,見到楊悅盈用一個好似山寨版Skype咁嘅嘢,同緊唔知邊個傾計。

「喂…無事喇…」我輕力拍一拍楊悅盈背脊:「唔好喊啦。」

「我無喊…」佢用把沙沙地嘅聲講咗句,再打咗我一下。

聽到身後面響電話,然後Ivan「喂」咗聲之後,就有一下閂門聲。

我擰轉面望嗰陣,Ivan已經唔見咗人,只係淨番Jessica坐喺度,好似睇戲咁望住我同楊悅盈,然後打開個櫃筒拎咗啲嘢出嚟。

「你坐番低先。」我細細聲同楊悅盈講;佢耷住頭坐番落去,然後轉咗去後面,開始用衫袖抹自己對眼。

我隨手撥一撥心口濕咗嗰個位,就即刻望番Jessica——因為我見到佢拎出嚟嘅係一部電話。

「Ivan有無同你講過啲來龍去脈?」佢將部電話插入楊悅盈啱啱用緊嗰部電腦度。

——來龍去脈…?我唔肯定佢頭先講嗰啲係唔係。

Jessica閂咗嗰個類似Skype咁嘅對話框,我見到後面係一大堆Code;佢拎咗個Keyboard去自己面前,再打多一段之後,Click咗一個寫住「Compile & Run」嘅掣。

跟住,個Mon嘅正中間就彈咗條Loading Bar出嚟。

留言

    未有留言

分享