已讀不回死全家!

第74章 - 74 Unread Messages

「年半前暴動之後,有人搵咗我哋搞啲防暴嘅Technology,仲指明係要針對年青群體,12至29歲左右嘅人。」佢講嗰陣除低咗個眼鏡:「即係你哋呢類人。」

佢似乎有啲攰,所以捽咗捽眼,伸咗懶腰之後先繼續講。

「所以,當時我哋就開始咗兩個Project,主張鎮壓嘅Ivan開始研究點樣將電話變做武器,佢叫嗰套System做Mobile Acoustic Device。」佢開始扮埋Ivan嘅語氣,做咗個開槍手勢:「嗰陣Ivan仲成日講:『搞咁多做乜,邊個搞事咪開槍射鳩死佢哋』!」

Jessica講完之後,將張櫈碌向楊悅盈隔離,一邊戴番個眼鏡。

楊悅盈諗起頭先Ivan睇緊嗰份文件——MAD應該就係指佢開發出嚟嘅呢個武器?

「我就覺得唔應該用暴力;而且我認為預防勝於治療。」Jessica翹起腳,雙手放喺自己膝頭上面,望住楊悅盈講:「所以…我Prefer控制你哋啲後生嘅思想多啲。」

「控制…?」楊悅盈無諗過Jessica竟然會雞啄唔斷,所以有啲意料之外。

「嗯,控制你哋喺網上睇到嘅嘢:論壇、Facebook、Telegram、Whatsapp…一切你哋會用嚟做通訊嘅渠道,都係我嘅目標。」Jessica解釋:「我呢邊係要做出一個Pass到Turing Test又可以Apply落呢啲平台嘅AI,24/7咁樣隨時控制住網上嘅資訊同埋輿論。」

Jessica講完之後,用手托一托個眼鏡。

「答唔答到你問題?」佢對住楊悅盈笑一笑。

聽到呢句,楊悅盈打咗個突。

因為佢頭先求其隨口一問——點解要整個AI出嚟——佢甚至乎只係自言自語緊,無諗過Jessica會答。

而且佢同眼前呢個Instant Messenger——唔係,根據Jessica嘅講法,呢個係AI System嘅學習介面——傾計已經傾咗唔知幾耐。

頭先,Jessica插咗隻USB入楊悅盈用緊嗰部機度,叫佢將自己嘅諗法灌輸落去,同Admin嘅System Compile埋一齊等佢Crash。

楊悅盈當然聽唔明佢講乜,而且直接同個AI、Admin對話,佢尋晚已經試過;不過當時Jessica信誓旦旦咁話今次有佢喺度,一定無問題。

但係而家諗番…

「你係想…將我變做AI?」佢有啲不敢相信,所以問Jessica。

Jessica嘟一嘟嘴,諗咗兩秒。

「Not Exactly…只係做一個似你嘅AI出嚟。」佢好認真咁答:「你唔會少忽肉,對你完全無影響。」

但係楊悅盈開始猶豫——佢唔想自己變成一個俾人用嚟操控輿論嘅AI嘅一部份。

佢望住Jessica對眼,想伸手推開個Keyboard。

「你諗清楚…」Jessica襟住咗佢隻手:「你唔咁做嘅話,可能連你剩低嗰啲同學,甚至乎你都會有事。」

楊悅盈皺起眉,望一望枱上面自己部電話;Jessica似乎Feel到佢諗緊乜嘢。

「Admin可以控制到佢Contact List裏面所有人嘅電話,而Admin係Sync咗羅彥輝嗰個Contact List。」Jessica又開始放柔把聲同楊悅盈講:「所以佢先可以睇到晒你哋一舉一動、借你哋啲電話嚟殺人。」

「咁又點?」

「咁即係如果你而家唔幫我,如果唔諗辦法Crash咗Admin,就算我幫你幾個同學Block晒佢啲攻擊同入侵都好。」Jessica面色一沉:「只要你哋某一日遇到羅彥輝其中一個同學、朋友或者家人,Admin都有可能會借佢哋嘅電話,用MAD嚟殺死你哋。」

「我唔想變成你呢個AI嘅一部份。」楊悅盈終於照直講出自己嘅諗法。

Jessica笑咗一聲。

「我哋有好多Intern Contribute落個Project度;唔好以為我想老點你幫我做啲乜嘢。」佢有啲輕蔑咁講:「如果呢個係你Concern,我可以喺件事完咗之後將你嗰啲Data Delete晒佢。」Jessica指一指嗰隻USB。

「你發誓?」

「我發誓?」Jessica睜大眼,好似聽到啲好奇怪嘅嘢咁:「搞清楚先:你唔信我嘅我唔會逼你,但係後果自負。」

楊悅盈歎咗一口氣,知道其實自己無得揀。

「都係嗰句…你要保證我同其他人都無事。」楊悅盈拉番個Keyboard埋嚟。

Jessica做咗個「OK」手勢。

楊悅盈望住個Mon,開始繼續打字。

同時——雖然佢唔知應唔應該講出口——但係楊悅盈問埋佢最後一個問題。

「你同我講咗咁多嘢…唔驚我會講番出去?」

留言

    未有留言

分享