已讀不回死全家!

第72章 - 72 Unread Messages

行上樓梯嗰陣,Ivan同豪仔慢條斯理咁跟喺我後面,我感覺到一陣莫名奇妙嘅壓力,好似俾佢兩個吸住咗咁,連我都行唔得快。

明明我拎住枝鐵枝,好似準備上去打喪屍咁樣,但係Ivan同豪仔似乎唔係太在意,只係一直喺我後面傾緊嘢,不過細聲到我聽唔清楚佢哋講乜,只係隱約聽到啲名詞。

「M-A-D」…

「致命」…

「已讀不回死全家」…

喺前面嘅我疾咗一疾擰轉面望住佢。

「做乜?繼續行啦。」佢見我咁樣,催咗我一句。

「有咩番到入課室先講…」我唔知點解佢同Jessica明明知道咗已讀不回死全家都無事,但係我有預感其他人——今日番咗嚟嘅學生同老師——唔會。

如果佢再講落去,唔小心俾邊個咁啱行過聽到…

上到四樓嗰陣,我見賴智勇同梁家豪企咗喺啲Locker前面唔知傾緊嘢定等緊我;見到我番上嚟,賴智勇本身諗住走過嚟我度,但係望到尾隨住嗰兩個西裝友之後就停低咗。

「呃,呢兩個係——」

「我叫Ivan,係MTCC嗰邊嘅人。」Ivan好似無視咗我咁,加速去咗我前面同賴智勇、梁家豪自我介紹同握手:「呢個我助手豪仔。」

我望一望豪仔,佢仍然係好似尷尷尬尬咁對住我點一點頭;睇嚟佢唔係怕Ivan,而係本身性格就好驚青。

「好,不如番入你哋課室慢慢傾?」Ivan回頭望住我,啲語氣雖然好客氣,但我感覺到佢根本喺度命令緊我。

賴智勇皺起眉望過嚟我度,我聳一聳肩,開始行番入課室。

我哋五個入番課室嗰陣,托住頭睇住街景發呆嘅鄭綽婷望咗我哋一眼,然後乜都無講,繼續望番出去;我開始有啲佩服佢呢種將「事不關己」精神發揮到極點嘅性格。

——但其實根本你就係當事人之一…我一邊咁諗,一邊行咗埋電腦枱度,賴智勇同梁家豪跟埋過嚟。

「我哋拎番啲電話整少少嘢先…你等等…」我對Ivan講咗句,然後就開始撬個櫃筒。

原來…無我想像中咁容易;個櫃筒邊俾我刮到花晒,但就係開唔到。

「使唔使幫手?」賴智勇主動問。

我其實已經好攰,所以求之不得,點點頭之後放低咗條鐵枝,再讓咗個位俾佢埋嚟,自己坐咗喺隔離張枱上面。

「你頭先話爭咗一部?」Ivan唔知幾時又走咗埋我隔離:「即係呢度未齊?」

我點點頭。

賴智勇終於撬開咗個櫃筒,將五部電話拎番出嚟;果然如我所料,當中有三部——佢哋三個——都收到一個來自柯志恒嘅Whatsapp。

拎咗個電話出嚟望時間:13:37;仲有幾分鐘,柯志恒覆我Message嘅時限就會過,但係佢仍然一啲動靜都未有。

——仆街…佢明明話一點半左右番嚟…

開始有啲不安,我襟咗柯志恒個電話出嚟打過去。

同時發現個電話打得通…但係無人聽。

賴智勇好快手咁還番另外嗰兩部俾鄭綽婷同埋梁家豪;豪仔自動自覺咁行埋櫃筒拎走咗剩低嗰兩個電話收咗入佢手上面個公事包度。

「嘩屌…」我聽到賴智勇對住部電話細細聲鬧咗句:「好在…」

然後佢哋幾個就開始襟電話,九成係覆緊柯志恒個Message;我見呢度一切正常,所以起身諗住出去搵柯志恒,同時再打一次佢個電話。

「喂,去邊?」Ivan叫住咗我。

「仲有個同學未番嚟,我又搵唔到佢。」一邊聽住電話入面接通咗嘅「嘟嘟」聲,一邊答佢:「如果幾分鐘之內佢再唔覆我Whatsapp,就會——」

「就會死?」Ivan好似明知故問:「就會爆頭?」

諗起頭先第一個覆柯志恒嘅係我,同時聽到Ivan嘅咁直接嘅用詞,我個心怯咗一下。

我見佢微微笑,好似有啲期待緊咁樣。

——痴撚線…變態…我心入面鬧咗兩句,無理到佢。

就喺我差唔多行到去到門口嗰陣,道門打開咗。

望到行入嚟嗰條友,我就即刻收咗線。

電話上面個時間係13:41。

柯志恒本身一副得戚樣,但係當佢踏入課室見到我嗰陣,面上閃過咗一個見到鬼咁嘅表情。

「我屌你老母呀!」梁家豪率先指住柯志恒爆咗一句。

「喂!」我緊接住大聲喝佢:「你部電話收咗喺邊?」

但係柯志恒無答到我,而係望向嗰個俾我哋撬開咗嘅櫃筒,仲發現除咗我之外,原來連其他三個同學都已經拎番自己部機,仲喺度用緊。

「快啲去拎番自己嗰部!我知你放入櫃嘅係區純部電話嚟!」我再喝多佢一句。

柯志恒望向我,愕然咗一下。

「唔係…我無…」佢有啲作賊心虛咁嘅語氣。

我估計喺佢心入面,佢行入嚟嗰陣見到嘅景像應該係四條無頭屍體;或者至少係四個將死之人,等住佢番嚟郁手。

但係而家竟然見到所有人——尤其是我——都仲完好無缺,而且仲拎番晒啲電話。

佢回過神來,但係個表情一下子變得好嬲。

「喂!講好咗等埋一齊——」

——頂你個肺…我衝埋佢度扯住佢衫領。

「快撚啲去拎番部電話呀!」忍唔住打咗佢一巴,好大聲咁講:「我半個鐘之前已經覆咗你個Whatsapp喇仆街!」

柯志恒呢一下開始,個表情由嬲變做茫然,最後開始變咗做恐懼。

唔知係咪因為知自己大難臨頭,佢一下無情力推開我,調轉頭衝咗出課室。

我俾佢推到向後仆咗落地,部電話甩手跣咗埋一邊;即刻爬番起身,電話都唔執就跟出去。

正好見到佢身影閃入男廁。

跑咗去男廁門口,跨過嗰個唔知點解跌咗喺度嘅「小心地滑」牌走咗入去。

「嘭!」

廁所入面傳嚟一下響聲。

聽到嗰陣,我全身都寒咗一寒。

入到去一望,最裏面個廁格對上嘅牆同天花板,已經濺滿晒血花,門下面亦都有一大灘血慢慢滲緊出嚟。

我覺得有啲頭暈、企唔穩,就地坐咗喺度。

呢個時候有兩個人都走咗入廁所,然後馬上俾入面個境象吸引住。

Ivan表情變得好認真,行咗去廁格前面推開門,望住入面;豪仔就一面厭惡咁跟埋過去,只係睄咗一眼個廁格,就轉身趴咗喺個洗手盤上面嘔。

Ivan用一個望住死物咁嘅表情——咁講好似有啲奇怪,因為入面嗰件嘢的確係死物——反正,佢好似完全無乜感覺咁樣行咗入廁格度。

幾分鐘之後,佢就雙手染滿鮮血、拎住一部電話出番嚟,塞咗入豪仔件西裝外套個袋之後,開始洗手。

Ivan行去我面前伸出手,想拉番我起身。

豪仔塊面白晒,用水哴緊口;然後佢似乎透過洗手盤上面啲鏡見到個廁格入面嘅景象。

所以佢又趴番落去,對住個洗手盤不斷咁發出啲乾嘔聲。

我望一望Ivan,無到領佢情,只係自己扶住牆,慢慢企番起身。

留言

    未有留言

分享