已讀不回死全家!

第71章 - 71 Unread Messages

我同賴智勇行到番課室嗰陣,見到鄭綽婷同梁家豪坐喺課室入面坐立不安咁,但係唔見柯志恒。

差唔多可以100%肯定佢Send晒Whatsapp俾我哋四個;而雖然我幾肯定我係佢第一個目標,但係其他收到Message嘅時間唔會差太遠,我點都要喺一點半前幫佢哋拎番啲電話出嚟。

或者叫佢哋有咁遠走咁遠,唔好接近張電腦枱?

「柯志恒呢?」我問咗句,梁家豪搖搖頭,鄭綽婷無反應。

同時發現佢兩個都用啲奇怪嘅眼神、不時偷望賴智勇——睇嚟佢哋真係細心諗過,相信咗我嘅講法,決定咗要賴智勇死。

「關於賴智勇嘅嘢…你哋當我無講過就得。」我歎咗一口氣,嘗試解釋番:「楊悅盈亦都無死到,佢已經搵到方法令到Admin攻擊唔到佢。」

「點呀…」梁家豪把聲有啲迷茫:「成日一時又係咁一時又係咁…玩夠未?」

我無同佢拗,淨係拎咗自己部電話出嚟;鄭綽婷同賴智勇頭先一樣呆咗一呆,反而梁家豪馬上企咗起身。

「點解你仲有部電話?」佢怒氣沖沖咁走埋我度,我有啲驚佢會打我;頭先俾賴智勇打完一拳,左邊面仲有啲慶慶地。

好在,賴智勇行咗去我同佢中間隔開咗佢。

「你冷靜啲先…」佢襟住梁家豪膊頭講,梁家豪總算停低咗,但係仍然繼續怒睥住我。

「頭先鎖起嗰部唔係我嘅,呢部先係。」我後退咗一步拉開少少同佢個距離:「因為我要同楊悅盈Keep住Contact;呃咗大家唔好意思。」

「柯志恒同我一樣,帶咗兩部電話番嚟…」我打開咗柯志恒同我個Whatsapp對話,將部電話擺咗喺枱面:「但係佢係為咗一次過殺死晒我哋呢度幾個人。」

梁家豪睥多咗我幾秒之後,望落我個電話度,眼都大埋。

「佢Send咗——」

「係,佢Send咗個Whatsapp俾我;尋晚佢都認咗,佢目標係『自己生存到最後』。」我打斷咗佢句嘢:「所以我有理由懷疑佢Send晒俾我哋所有人;而家與其坐喺度呆等,不如快啲拎番啲機出嚟等你哋覆咗Whatsapp先。」

張電腦枱係最普通、最平嗰種鐵枱,只要求其搵支鐵通,都可以撬爆個鎖;當務之急一定係咁樣做,要保住啲同學條命先。

但係我明白其實我都要搵番柯志恒出嚟。

因為一來要集齊啲電話等一陣俾Ivan,二來…柯志恒對我頭先個Message仲未有咩反應;我有啲擔心佢係咪收埋咗部電話喺邊,無隨身攜帶,所以根本就唔知我已經覆咗佢。

如果係咁樣嘅話,當一陣佢去拎番自己部電話嗰陣,可能就會…

佢衰還衰,但係我唔想有人直接因為我Send出去嘅Message而死。

我望一望課室個鐘:而家一點四過咗少少,其他人仲有大約十五分鐘時間。

我打開老師枱個櫃筒,除咗啲文具、粉筆同派剩嘅通告之外乜都無;賴智勇似乎明白我想做乜,放開咗梁家豪去咗摷張電腦枱,但係好快就望番住我搖搖頭。

「咁…我落地下拎啲嘢上嚟撬鎖。」我講完之後,就袋番埋部電話準備出去。

我哋學校地下嗰層嘅後梯有道閘,每日放學過咗七點校工都會拉閘,等有咩人上落都要經前梯,方便佢哋知有咩人走咗上去。

閂閘用嗰支鐵枝,一般都會藏喺條閘軌入面,好適合拎嚟爆開個櫃筒。

忽然間諗起啲嘢,我回頭對住佢哋幾個再補多兩句。

「仲有…你哋幾個出去幫手搵下柯志恒。」

然後我就離開咗課室衝落後梯。

聽日就係開學日,我落去嗰陣不時見到某啲班級嘅課室有人喺入面,唔知係整緊壁報定做乜。

忽發奇想,唔知聽日佢哋發現學校少咗一班人嗰陣,會有咩感覺;學校又會點處理…

我好少咁樣全速奔跑,加上尋晚差唔多完全無休息過…所以去到地下嗰陣已經索晒氣,熱到成身濕晒。

喘住氣行埋道閘嗰邊,見到支鐵枝就打直擱咗喺條軌隔離;我拎咗佢出嚟之後,坐喺其中一級樓梯度抖一抖。

呢個時候我電話響。

 

私人號碼

來電

 

「喂?」平時我見到無來電顯示嘅電話,一律會唔聽、Cut線;但係我知呢個電話好有可能係Ivan打過嚟。

「喂,何晞賢?」打過嚟嘅係一把好沉實嘅男人聲。

「係…」我應該無估錯,呢個就係Ivan。

「我到咗,你而家拎埋啲電話出嚟學校門口。」佢講完之後就收咗線。

——啲電話未齊…我無機會同佢講。

企番起身,我右手拎住個電話、左手拎住條鐵枝開始行番去學校大門嗰邊;雖然沿路會經過兩間教員室同埋校務處,但係我懶得理。

果然,行過教員室A嗰陣,有個好生面口嘅Miss啱啱出嚟;見到我之後嚇咗一嚇。

「同學!」佢提高把聲對住我講:「同學,你做咩呀?」

我無理到佢,佢亦都無追到上嚟——唔知係見到我手持「武器」有啲驚;定係純粹費事麻煩。

反正,我無視咗沿路上幾個學生嘅奇怪眼光,因為我開始有啲緊張——未見過MTCC啲人,而且楊悅盈話呢個Ivan有啲恐怖。

去到門口,見到有兩個男人企咗喺大門前面嗰幾級樓梯下面。

兩個都著住成套西裝——而家咁嘅天氣仲可以呢種打扮,其實我好敬佩呢種人——但係兩個俾人嘅感覺都好唔同。

佢哋一個望落似廿幾歲,戴住個黑色鐵框眼鏡,細細粒咁,好明顯有啲驚同埋在意佢隔離個人;佢隔離嗰個男人,年紀應該唔細,有三四十歲,但係好高大,似乎仲高過我;本身木無表情嘅佢一見到我行出嚟,就綻放出一個笑容。

「你係何晞賢?」佢行咗上嚟去到我面前;個男仔誠惶誠恐咁跟到實。

「我叫Ivan,你條女有講過我會過嚟?」Ivan微笑住咁對住我伸出手:「呢位黃日豪,豪仔;我助手。」

我同佢握咗一下手,發覺佢好大力。

「呃…啲電話…」趁Ivan未問之前,我自動報咗案先:「我仲未收齊,爭一部;有個同學拎走咗。」

點知佢竟然無嬲,仲好似有啲興奮咁。

「唔緊要唔緊要!不如我上你課室見一見啲同學先?」

佢整理咗一下自己件西裝褸,就向校門入面指一指示意我帶路。

留言

    未有留言

分享