已讀不回死全家!

第7章 - 7 Unread Messages

楊悅盈一向都係唔太出聲,自成一角自得其樂嗰種人,活動唔會參加,成績唔係特別好,又只係中上樣唔係靚女,所以平時無乜同學會留意佢;老老實實,如果唔係羅同學嗰件事,我甚至乎可能意識唔到佢呢個同班同學存在。

俾著係平時嘅班會活動,我絕對唔會想像到楊悅盈行出嚟對住全班講;但係而家佢又的確好似大家領袖咁發表緊佢要講嘅嘢。

「我重申一次,個方法係短時間內可以令到大家100%生還;但係我想同大家講——」

「咩方法?」後面傳嚟一把聲打斷咗楊悅盈句嘢;我認得把聲:徐建文——MK一派嘅其中一個同學。

楊悅盈望一望向徐建文個邊,靜咗一下。

「我想同大家講,而家諗住保命只係治標不治本,我哋應該Focus落去勝利——」

「咩方法唧?講啦!」今次同時間有幾個同學問,然後後面開始起哄。

楊悅盈一直等到起哄聲開始靜落嚟,佢先不徐不疾咁繼續講埋落去。

「我哋應該Focus落去勝利條件度,將三個關鍵人物搵出嚟。」

「你意思係…」又有人發問,今次係柯志恒:「我哋要搵三個關鍵人物出嚟…跟住殺死佢哋?」

後面又開始有人竊竊私語,我忍唔住望一望允仔,從佢表情睇得出佢同我一樣覺得有啲難以置信。

「你可以咁講,因為只要關鍵人物唔死,最壞嘅情況會係我哋班全員死亡。」

今次無人再出聲,全班又一次靜低咗。

「我尋日親身做咗個測試:只要唔Read同學Send過嚟嘅Whatsapp,就唔會符合已讀不回嘅條件,唔會死。」楊悅盈將視線投向Billy:「吳啟鋒尋日Send俾我嘅Whatsapp,我完全無睇、無覆,但係我到而家都未有事。」

今次我Feel到全班同學一齊望向Billy;Billy亦都馬上企起身,行咗去楊悅盈身邊,拎咗佢部電話出嚟。

「係…雖然我無同佢夾埋做測試,但我可以做證——如果有同學唔信,我可以借部電話俾佢睇。」Billy一路講,一路打開Whatsapp,將個Mon向外對住我哋。

坐最前嘅我見到,Billy最後一個Send俾楊悅盈嘅Message仲係灰剔,時間係尋晚19:34。

「只要大家唔Quit Group,唔Read同學嘅Message,暫時係完全唔會有危險。」

楊悅盈講完呢句之後,全班——包括我在內——都鬆咗一口氣,氣氛一下子輕鬆咗好多,Billy拍一拍楊悅盈膊頭多謝佢。

楊悅盈似乎仲有嘢未講;但係我覺得已經無幾多個同學會繼續聽緊楊悅盈講嘢。

佢喺校裙袋拎張摺埋咗紙出嚟攤開,然後反轉將正面對住我哋。

紙上面寫住我哋全班40個同學嘅全名,上面劃咗好多意義不明嘅符號,我惟一睇得明嘅就係,橫線刪走咗嘅人名就係已經死咗嘅同學。

同時我(竟然)留意到,張紙有少少微微震緊:睇嚟楊悅盈對住全班同學講嘢都好緊張,並唔係表面上咁淡定。

「對於關鍵人物,我自己有幾個諗法——」

就喺呢個時候,全班同學嘅Whatsapp一齊響,我哋本身放鬆咗嘅神經一下子又繃緊番。

我拎部電話出嚟一睇:群組已讀不回死全家有一條Unread Message。

 

大家好!關懷同學由Whatsapp做起!

讀後回覆是基本禮儀,已讀不回的人都去死吧!

本日因已讀不回而死的人數:0人

因Quit Group而死的人數:0人  

剩餘人數:28人                   18:50

 

昨晚竟然無人死亡?Admin為各位同學喝采!

大家繼續加油,發揮讀後回覆的精神!                  18:51

 

Admin似乎默許咗楊悅盈呢個做法,定還是佢未發現?

總之,暫時嚟睇應該真係可以唔使擔心已讀不回呢個問題住。

 

尋日Quit Group死嘅人數係11人,剩餘人數係28人

我哋班40人,點解少咗一個?             18:52

 

發問者係楊悅盈。

「屌…問問問…小心一陣懶嘢…」我隱約聽到後面傳嚟少少抱怨聲,怪佢咁多問題。

但係楊悅盈聚精會神咁望住個Group,而我亦都見到Admin輸入中…

 

「關懷同學由Whatsapp做起」,但我可沒有說止於Whatsapp!

對班上的事情有疑問,不會自己去求證嗎?          18:53

 

楊悅盈睇完之後,就收埋咗個電話;雖然依然係木無表情,但我覺得佢其實喺度諗緊啲乜嘢。

「好!終於可以番去瞓!」徐建文有啲誇張咁大聲講咗句,然後就拉隊帶住MK五人眾走咗。

其他同學都開始逐啲逐啲咁走,但係楊悅盈無阻止。

「閃?」允仔細細聲問我,然後忍唔住打咗個大喊露;我望一望楊悅盈——佢好似入咗神咁,所以我對允仔點點頭。

我、允仔、Billy同子筠一齊離開課室,尋日喺天台嗰陣嘅不安感好似消散咗咁樣,允仔變番平時一樣開始搞爛Gag、Billy同子筠都如釋重負咁同佢吹水。我跟喺佢哋後面,完全無心機加入佢哋啲對話。

因為我始終覺得有啲唔妥——唔知係我直覺,定係因為親眼見到Elaine死,令到我有啲疑神疑鬼。

一行四人行到落一樓嗰陣,我電話響。

 

6A-楊悅盈

來電

 

通常有人打俾我,我都會由佢變Miss Call之後再Whatsapp覆人,但係今次我好快就接咗個電話。

「喂?何晞賢?你而家即刻搵個藉口去Art Room等我,千祈唔好同其他人講。」

Art Room?我忍唔住想開口問嗰陣——

「唔好講嘢——你而家應該同吳啟鋒佢哋一齊?快啲諗辦法撇甩佢哋過嚟。」然後楊悅盈就收咗線。

佢尋日都喺課室,同我一樣目睹咗Elaine點死(雖然無我個隔離咁近),所以我好想聽下佢會同我講乜。

Billy佢哋已經準確行落地下,無留意到我講緊電話。

「喂…我漏咗啲嘢,你哋走先唔使等我。」我同佢哋講。

「鳩賢你…」Billy望番上嚟,瞇起對眼,好似有啲懷疑我咁:「唔好扮嘢啦…」

我心入面震咗一震,佢睇得出我其實係搵藉口撇開佢哋?

「…你想上去搵佩珊咪講囉…唔會笑你架…」Billy講完之後,同允仔一齊陰陰嘴笑。

「唔好踢爆我啦屌…」咁樣正好,我就扮做真係去搵佩珊,同佢哋講拜拜之後就準備走。

爭啲唔記得咗——「允仔,記住覆我個Whatsapp,我唔會Read你,有咩事我哋電話或者用Group再傾。」

允仔對我舉起個OK手勢。

我等佢哋三個落咗下一層之後,就沿住一樓走廊行過去Art Room。

我哋學校嘅構造係:每一層都有前梯同後梯,總共有六間普通課室,前梯對正有一間,課室門口擺咗Locker,男女廁同埋電梯都喺呢邊;沿住走廊就並排住五間課室;靠後梯就有兩間特殊課室——一樓嗰兩間特殊課室就係Art Room同Music Room。

經過一間又一間空嘅課室嗰時,我不禁喺度諗:點解呢件事會發生喺我哋班?

差唔多去到Art Room門口,楊悅盈都啱啱好喺後梯行到落嚟;我同佢對望咗一眼,然後一齊入去Art Room。

入到去嗰陣鄧鐵雄已經坐咗喺度——我有啲恍然大悟:原來佢同楊悅盈係夾埋嘅。

但係…夾埋做乜嘢?

「Sor…Sorry呀…我頭先——」鄧鐵雄誠惶誠恐咁彈起身向楊悅盈道歉,楊悅盈舉起手制止,佢就馬上收咗聲。

我行過去坐咗喺鄧鐵雄對面,點頭示意——雖然五年中學同佢已經做咗兩年同班同學,但係我唔係好鍾意佢嗰種怕事鵪鶉嘅性格,所以一路都無同佢有咩深交。

不過正如我所講,我其實同大部份同學都無乜深交。

楊悅盈閂埋門,望一望確保無人喺外面,然後就行咗過嚟坐咗喺我隔離。

佢哄埋嚟,粒聲唔出咁望住我。

我感覺到自己塊面又開始發熱;我唔係毒撚,但係都無乜女性緣;除咗Elaine同家姐之外,我好少可有機會同女仔咁近距離接觸。

大約望咗我十秒之後,佢先至開口;我完全無預計過佢會咁開門見山——

「何晞賢,我想吳啟鋒死,你要幫我手。」

留言

    未有留言

分享