已讀不回死全家!

第69章 - 69 Unread Messages

「你擺低部電話喺度,我同你出去講兩句。」

聽到Jessica咁講,楊悅盈反而更加用力渣實自己部電話。

「喂用下腦啦…」Jessica反咗一下白眼:「如果我要害你嘅,尋日你已經死咗啦。」

呢個講法無令楊悅盈釋疑。

「你放低個電話喺梳化,我哋一齊行出去,你自己親手鎖門。」Jessica喺外套袋拎咗條鎖匙出嚟遞俾楊悅盈:「呢間房得我一個有鎖匙。」

「無後備匙?」楊悅盈問。

「無我Permission邊個夠膽自把自為入嚟?」Jessica串串地咁答。

諗多一諗,楊悅盈終於接過咗條鎖匙:個匙扣好舊,似乎係啲紀念品嚟。

Jessica見到楊悅盈終於有行動,所以佢自己起咗身行過去開門,企喺門口等佢。

楊悅盈雖然都係有啲唔放心,但係佢似乎別無選擇——除非而家走——所以佢都係擺低咗部電話喺梳化,然之後就跟住Jessica行咗出去。

Jessica後面係翹埋手挨住自己房門等緊佢哋出嚟嘅Ivan,楊悅盈淨係望到佢都有少少驚,好在Jessica夾咗喺中間。

佢閂埋門,用鎖匙鎖好,袋埋咗條匙。

「跟我過嚟。」Jessica同楊悅盈講,然後就開始行:「你跟埋嚟OK,但係你醒定啲。」

後一句係對Ivan講嘅,因為楊悅盈發覺佢喺自己後面跟住。

由Jessica領頭,佢哋三個入咗一間房。

入到嚟先見到,呢度大細同Jessica間房差唔多,但係無咁多擺設,淨係得幾個電腦位;有個戴眼鏡,望落大約廿歲左右嘅男仔,見到Jessica同Ivan,企起身好恭敬咁同佢哋打咗聲招呼,跟住就走咗出去。

呢間房四面都係牆,無落地玻璃或者窗,楊悅盈忽然間諗到:呢度入面發生啲咩事,外面係完全睇唔到。

一直都無退散過嘅不安感一下子又升到高峰,楊悅盈有啲想調頭出番去;但係喺佢後面嘅Ivan已經閂咗門。

「坐啦。」Jessica指住其中一個電腦位示意楊悅盈坐低,然後拉咗張櫈過嚟;楊悅盈無辦法,惟有乖乖地坐咗喺部電腦前面。

「喂,走開啲啦…你嚇親人呀。」見到Ivan想過嚟一齊坐,Jessica有啲唔客氣咁命令佢,Ivan只係蔑一蔑嘴,然後行咗去門口隔離挨埋牆。

楊悅盈坐姿好僵硬,雙手捉實自己條裙;對住呢兩個大人,感覺就好似細個嗰陣做錯事,等緊老師宣佈有咩懲罰咁樣。

Jessica坐住張櫈碌咗去楊悅盈隔離開咗佢哋面前部電腦,然後拉咗啲Keyboard Mouse去自己度,打開咗個唔知乜嘢Program;楊悅盈淨係見到一大堆碼,完全睇唔明。

佢望一望Jessica,見佢拎番個眼鏡出嚟戴,跟住一面專注咁開始打字。

「你哋個Admin就係喺呢度誕生…」Jessica一路打字,一路細細聲講,唔知係自言自語定係對楊悅盈解釋緊:「論資排輩…我應該算係佢阿媽?」

講完之後,自己笑咗一笑。

Jessica好純熟咁打啲Code落去,某啲單字楊悅盈睇得明,但係完全唔識電腦嘢嘅佢根本就唔知發生緊咩事;楊悅盈偷偷地睄咗Ivan一眼,發現佢似乎同自己一樣完全唔知Jessica喺度搞緊乜嘢。

頭先個男仔入番嚟,本身想同Jessica講嘢,但係Ivan阻止咗佢。

好快打咗幾版嘢出嚟,Jessica襟咗一下個Program入面一個寫住「Compile」嘅掣,然後電腦就彈咗一條Loading嘅Bar出嚟;佢呢個時候終於留意到個男仔企咗埋一邊,所以招手叫咗佢埋嚟,然後喺佢手上接過咗啲嘢:一條鎖匙同埋一部電話。

「我知你一定唔肯,所以問都費事問你。」Jessica袋埋鎖匙、拎住部電話開始同楊悅盈講。

楊悅盈而家先見到呢部電話原來係佢嘅;Jessica開咗佢個Whatsapp出嚟唔知襟咗啲乜嘢。

「為表誠意…你望一望。」

一手喺Jessica手上搶番個電話,佢原來開住咗已讀不回死全家個Group:

 

已讀不回死全家

您已不是本群組成員

 

——Jessica Quit咗佢Group…?嗰一剎那佢個腦一片空白,反射性咁丟低個電話彈咗起身。

「唔使驚,已經幫你部機Purge咗。」Jessica喺地下執番起部機放喺枱面:「只要接埋你啲同學過嚟…或者拎佢哋啲電話過嚟,你哋就唔會再有事。」

楊悅盈個心仲跳得好勁,半信半疑咁行番埋去,望咗一望部電話:無錯,係佢自己嗰部嚟,而且的確真係Quit咗Group。

「呃…簡單啲嚟講…」Jessica見到楊悅盈個反應,以為佢聽唔明:「如果你部機係俾鬼上咗身,咁我啱啱就幫部機辟咗邪。」

Jessica又笑咗一笑,似乎覺得呢個比喻好幽默。

鼓起勇氣拎起咗自己部電話;唔好話爆頭,佢連嗰個令人頭痛嘅怪聲都聽唔到。

「點解…」楊悅盈坐番低,仲嘗試消化緊成件事。

「你哋個Admin同我哋個System有部份連埋咗一齊,佢偷咗呢條仆街啲嘢…」Jessica指一指Ivan:「Embed咗喺你哋啲電話Back End——」

「唔係…」楊悅盈打斷咗Jessica;佢唔係指呢樣嘢:「點解…你尋日唔咁樣做?」

Jessica又笑咗兩聲,然後忽然間黑面,指住個男仔嚟鬧。

「仆街!明明尋日就叫咗你搞,搞成晚先搞得掂?」

個男仔表情一下由不安變咗做恐懼,不斷咁同Jessica道歉;Jessica好快又變番個笑樣對住楊悅盈。

「因為…尋日同你傾完之後,我哋先至知係乜嘢事。」唔知真定假,佢好似有啲歉意咁對住楊悅盈解釋:「我叫咗佢哋即晚趕工架喇。」

楊悅盈忽然間醒起何晞賢,所以用自己Whatsapp Send咗個Message俾佢:

 

唔使驚,我無事          12:43

 

喺楊悅盈隔離嘅Jessica見到佢搵何晞賢報平安,拍一拍佢膊頭。

「乖啦,你都唔想男朋友有咩事架嘛?」佢好溫柔咁喺楊悅盈耳邊講:「一日未將所有人嘅電話Disarm晒,佢都可能有危險架…」

「學校…」望住自己Quit咗Group呢個Notification,楊悅盈決定相信佢:「佢哋今日聚埋一齊喺學校。」

Jessica一聽到,就轉身望住Ivan指向門口;楊悅盈見到Ivan撐大對眼指一指佢自己。

「去啦…唔好喺度阻住晒。」Jessica有啲侮氣咁講咗句,Ivan先至有啲不滿咁諗住就範。

「等陣!」Jessica又叫住咗佢:「豪仔跟埋去,一番到嚟就拎晒啲機去做嘢;千祈唔好拎入嚟先。」

豪仔——頭先嗰個男仔——好聽話咁點咗點頭,然後就同Ivan一齊打開門出咗去。

「Ivan會去你學校搵啲同學過嚟。」佢轉番過嚟對住楊悅盈,又變番溫柔語氣:「你同何晞賢講一聲,叫佢幫手收集晒啲同學嘅電話,方便做嘢。」

楊悅盈一邊煩惱點樣三言兩語解釋而家個情況,一邊開始Send Whatsapp俾何晞賢:

 

我諗…我哋終於無事喇                   12:45

 

Jessica幫我部電話整咗啲嘢…

我唔知係咩意思,但係Admin似乎已經攻擊唔到我                 12:46

 

你可以將Admin個對話轉俾我               12:46

 

如果全班同學都喺齊度嘅話

你諗辦法集齊同學啲電話

只要拎過嚟MTCC俾Jessica啲人整一整,就無事架喇             12:47

 

有個叫Ivan嘅男人過緊嚟,你俾晒啲電話佢就得

不過佢份人有啲恐怖…你小心啲…                   12:48

 

記住覆番我                  12:49

 

一口氣Send完之後,佢放低部電話,挨咗落椅背;呢幾日以嚟第一次真正覺得放下咗心頭大石。

「喂,仲未搞掂。」Jessica變番認真語氣講咗句。

同時部電腦嘅Loading Bar去到100%、消失咗;彈咗一個望落好原始嘅Instant Messenger介面出嚟。

「斬草要除根。」Jessica煞有介事咁講,然後終於將個Keyboard推番去楊悅盈面前。

留言

    未有留言

分享