已讀不回死全家!

第68章 - 68 Unread Messages

今日個太陽好猛,天台花園熱到好似地獄咁。

賴智勇行前梯走咗上嚟坐喺啲長櫈度。

如果係平時,佢一定打死都要留喺有冷氣嘅課室,但係而家佢想獨處一陣。

佢成績唔係特別好,運動又唔識,所以佢平時先成日搞爛Gag,希望靠住做小丑群到啲朋友,熟到啲同學;事實上亦都好成功,5A班、甚至乎同級嘅同學,一提到佢都會諗起佢係冷笑話王。

但係賴智勇其實好想真正融入呢班同學,搵到自己嘅朋友、圈子同埋位置。

所以,已讀不回死全家由開始到呢一秒鐘,佢一直都好想自己可以好似楊悅盈佢哋咁,搵到啲方法、漏洞,然後領導住啲同學;佢好想體驗下嗰種真實嘅存在感。

曬咗一陣已經有啲頭昏腦脹,所以佢行番過樓梯口,坐咗喺最頂嗰級度。

諗番去周Sir叫佢一齊去MTCC嗰一刻,佢相當之「興奮」——話興奮可能有啲唔恰當…因為始終咁多同學因為呢件事而死。

但係佢好開心終於有人搵自己,叫佢一齊參與一件事;同楊悅盈、何晞賢佢哋一齊嘅呢一日,佢終於感覺到有人當佢係一份子。

有個身影行緊上嚟,賴智勇望落去,見到係何晞賢;佢而家仲有啲嬲頭先何晞賢講嘅嘢,另一方面…其實好想多謝佢。

「想點?」賴智勇問咗一句。

何晞賢無答到佢,淨係走咗埋嚟坐喺賴智勇隔離;諗起自己打咗佢一拳,賴智勇有啲唔好意思。

「Sorry。」何晞賢開口講:「頭先講咗啲咁嘅嘢。」

賴智勇見佢咁認真道歉,反而有少少唔好意思。

「呃…唔緊要…我唔應該出手打人。」佢回應番一句;的確佢而家開始有啲後悔。

「遲啲俾我濕番一嘢當無數。」何晞賢笑住咁同賴智勇講。

——遲啲…我仲有「遲啲」?賴智勇諗起啲嘢,內心一沉。

「喂…」所以,佢忍唔住開口問:「你頭先話我係最後一個關鍵人物…係真定假?」

何晞賢點點頭。

「唉…仆街羅彥輝…」賴智勇拍一拍自己額頭,半講笑咁鬧咗一句。

佢自己覺得同羅彥輝唔算熟,平時都唔係太多話題;雖然無份欺凌佢,但係會盡量唔同佢行得太近,以免俾人當埋自己係羅彥輝同類,搞埋佢一份。

反而羅彥輝好似當咗佢係朋友,不時會搵佢傾計;賴智勇唔想拒人於門外,同時又好避忌俾人以為佢兩個係好朋友,搞到佢成日都覺得好難做。

老實講,羅彥輝休學嗰時,賴智勇鬆咗一口氣;佢估唔到嘅係,羅彥輝竟然咁樣自殺死咗。

如果…當時自己無已讀不到佢…

「無事架喎,唔使驚。」何晞賢拍一拍賴智勇膊頭,好似安慰緊佢咁:「不過有兩樣嘢我想澄清番。」

「唔使安慰我喇…我…如果要用我條命嚟救番你哋…」賴智勇苦笑一聲——就隨便處置我啦…

後半句佢講唔出口;佢其實唔想死…

「邊個話要你條命?」何晞賢皺起眉頭,一邊拎咗部電話出嚟:「你唔係以為我真係信柯志恒條仆街仔吓?」

「咁你頭先——」

「兩樣嘢:第一,楊悅盈唔係我女朋友…」何晞賢打斷咗佢:「第二:佢未死。」

然後,佢拎咗部電話出嚟打開Whatsapp;賴智勇見到,望住佢部電話呆咗。

「哦…」佢見到賴智勇一面驚訝,就解釋番:「我放入櫃嗰部電話係羅彥輝嘅…因為我驚條仆街仔會做啲乜嘢…」

何晞賢遞咗部電話俾賴智勇睇,係何晞賢同楊悅盈之間嘅Whatsapp對話;楊悅盈打咗好多嘢,賴智勇未開始從頭睇,佢淨係留意到幾分鐘之前收到嘅最尾兩條Message:

 

有個叫Ivan嘅男人過緊嚟,你俾晒啲電話佢就得

不過佢份人有啲恐怖…你小心啲…                   12:48

 

記住覆番我                  12:49

 

「頭先見到佢Quit咗Group…我都嚇咗一跳。」何晞賢打咗啲回覆楊悅盈,Send咗出去之後,向後一挨瞓咗落地下,舉起手望住自己啲手指。

賴智勇放低部電話喺地下——我都係…佢心入面諗。

「而家我哋等嗰個…邊個…過嚟拎走啲電話就OK…」何晞賢繼續講:「本身我仲煩緊點樣叫你哋拎晒啲俾我…」

忽然間,個電話震咗一下,何晞賢即刻用手撐住坐番起身,然後同賴智勇一齊睇:柯志恒Send咗個Message過嚟:

 

多謝合作,希望下世有機會再做同學             13:07

 

「仆街真係無藥醫…」何晞賢馬上講咗一句。

「佢頭先放入櫃嗰部電話——」

「區家純嘅…我估。」何晞賢「嘖」咗一聲:「估唔到條友仆街到收埋自己部電話…」

賴智勇打咗個突,望一望何晞賢。

「唔係吖…佢同你一樣咁做咋嘛…」

何晞賢無理到賴智勇,淨係拎番個電話覆佢:

 

唔好話下世,今世我都唔想再見到你…          13:13

 

Send完之後,佢就企咗起身。

「落番去啦…唔係半個鐘之後你哋就死硬…佢一定唔止Send俾我一個…」何晞賢一路行落去,一路講:「無嘢喇…件事已經完咗喇…」

賴智勇仲消化緊何晞賢講嘅嘢:頭先仲做緊心理準備要為咗啲同學而死,而家竟然發現已經甩咗難?

「不過頭先喺課室…真係唔好意思。」何晞賢再講多一次。

賴智勇終於起番身,跟住佢一齊行。

讀咗足足五年中學,佢終於真心感覺到:原來自己唔使扮小丑,都可以同人做到朋友。

留言

    未有留言

分享