已讀不回死全家!

第67章 - 67 Unread Messages

柯志恒心入面不停咁咒罵緊楊悅盈。

佢竟然唔番嚟…即係話就算計劃,成功殺死晒呢度嘅幾個人,楊悅盈一樣會相安無事。

然後柯志恒同佢就會成為最後兩個人,Game Set。

——唔可以俾呢件事發生…

何晞賢坐喺老師枱,對住全班——僅餘嘅幾個人——繼續講。

「我叫大家番嚟只係唔想好似尋日啲同學咁,因為俾人呃——」佢望一望柯志恒,眼神好憤慨:「——而Quit Group或者做錯啲乜嘢…搞到命都無。」

柯志恒無俾咩回應,淨係開始諗而家可以點做;尋日見到何晞賢都幫手叫人番嚟,佢一心諗住其他人點樣都好,楊悅盈都一定會出現。

點知而家反而淨係佢一個唔在場…

「呀…我想問…」鄭綽婷忽然間舉手:「楊悅盈Quit咗Group,係咪代表佢…」

「咩話?」何晞賢好似聽唔到咁,問咗佢一句;但係柯志恒即時反應係開個Group嚟睇。

 

12:40

楊悅盈 退出了

 

忍唔住笑咗出嚟,柯志恒用手揞住自己個嘴費事俾人見到。

「楊悅盈Quit咗,你望下個Group。」鄭綽婷重覆咗一次:「咁即係點?」

當然,柯志恒唔排除其他可能性:譬如有人拎咗楊悅盈部電話嚟Quit Group;柯志恒尋日都試過一次,結果對方——區家純——直到接觸到啲電話之前一直都無死到。

——唔通何晞賢想用番我尋日個方法,呃人Quit Group?

諗到呢度,佢抬起頭望下何晞賢咩反應。

何晞賢似乎相當之驚訝,頭先嘅氣場完全消失晒,淨係雙眼撐大,呆咗咁望住自己個電話;隔咗一陣之後唔知襟咗啲乜嘢。

仲有賴智勇——柯志恒啱啱先發現佢唔知幾時埋咗何晞賢堆——一樣一面慌張,望下自己個電話、又望一下何晞賢,好似想問佢點算咁。

似乎佢兩個都無預計過呢件事發生。

「你又話等楊悅盈消息,而家佢Quit咗…」鄭綽婷繼續問:「係咪代表我哋都可以Quit?」

「唔好…」何晞賢望住鄭綽婷講咗一句。

然後佢又再繼續望番自己個電話,表情仲有啲質疑。

——接受現實啦…柯志恒心入面冷笑一聲。

「係呀係呀,快啲Quit啦。」佢終於開口指住何晞賢講:「佢兩個成日話咩救番大家,根本就無可能有啲咁嘅方法。」

何晞賢望住柯志恒無出聲,表情有啲茫然。

兜兜轉轉,最終都可以按番佢原本計劃嚟實行——一次過殺晒所有其他同學。

「不過好彩,唔在場嘅人都已經死晒。」柯志恒企起身繼續講:「即係我哋呢度死多三個人就無事喇。」

佢慢慢行咗去課室角落張電腦枱,打開咗最低嗰格櫃筒拎咗條鎖匙出嚟,然後坐低喺張枱度,同何晞賢四目交投。

「我哋用個公平啲嘅方法決定生死啦。」柯志恒拎住條鎖匙對其他同學講:「大家不如諗下自己係咪值得生存落去。」

無人有反應,就連何晞賢都係一面疑惑咁望住自己。

「你噏乜?」梁家豪問。

柯志恒不徐不疾咁行番埋張老師枱度,企咗喺側邊。

「我哋五個將手上嘅電話校靜音鎖入櫃。」佢指一指張電腦枱:「然後我想大家用半個鐘時間諗下,有邊個自己願意為其他人犧牲;之後我會親手用佢部電話幫佢Quit Group。」

何晞賢聽到嗰陣,慢慢開始嘴角微微上揚好似忍唔住笑咁;柯志恒見到都怯咗一怯,唔知佢係咪傻咗。

「痴撚線嘅咩,我唔會想自己死架喎…」梁家豪好燥咁,再指咗何晞賢同賴智勇講:「呢兩條友夾埋架嘛,咁佢哋咪——」

「夾埋?係佢自己黐埋嚟架咋!」何晞賢反應有啲誇張:「而家楊悅盈俾佢累死埋,我唔會再——」

「我累死佢?你條女死咗你賴我?」賴智勇嬲到笑,打斷咗何晞賢:「你唔係姓賴架,我先係呀!」

「…做緊戲?」梁家豪問咗句。

「我做你老母呀!」賴智勇好大聲咁講。

「你除咗搞爛Gag仲識乜撚?」何晞賢無理佢,反而指住賴智勇繼續鬧。

賴智勇雖然表情係笑緊,但係塊面紅晒,額頭有啲血管暴現;柯志恒睇得出佢開始發火,因為何晞賢戳中咗佢死穴。

「你講多次?」

「你除咗搞爛Gag仲識乜撚嘢呀仆街!」何晞賢重申一次:「而家楊悅盈唔喺度,我都唔使再忍你喇。」

賴智勇終於收起咗笑容,企起身一下衝咗去何晞賢面前扯住佢衫領打咗一拳。

「嘭!」

何晞賢完全無反抗、亦都無打算還手。

喺隔離近距離睇到嘅柯志恒有啲心涼。

「你知唔知你同楊悅盈係最後兩個關鍵人物呀?」佢淨係正眼望住賴智勇講咗句:「羅彥輝自殺之前佢Whatsapp過而又無覆佢嘅四個人,就係關鍵人物。」

柯志恒同埋在場幾個人——包括賴智勇自己——聽到之後,都覺得有啲難以置信。

「你話係就係呀?」賴智勇雖然咁講,但係明顯有啲淆底:「我夠可以話你係啦!」

何晞賢喺自己褲袋拎咗部電話出嚟,丟咗喺枱面,然後正眼望住賴智勇。

「好,咁睇下大家信邊個?」佢用啲好挑釁嘅語氣問賴智勇。

賴智勇再睥多何晞賢一下,然後好似唔服輸咁「嘭」一聲擺咗自己部電話喺枱面。

「你哋幾個唔使驚…一陣搞掂咗賴智勇就無事架喇。」何晞賢對住梁家豪同鄭綽婷講:「但係如果你哋而家走,我好肯定你哋唔會過到今晚。」

柯志恒越睇越覺得唔對路:唔知點解何晞賢同平時好似好唔同咁…

楊悅盈死咗,對佢有咁大影響?

好在,剩低嗰兩個雖然有啲猶豫,但係都交咗部電話出嚟;柯志恒將佢哋四個人嘅電話校咗靜音、連埋自己褲袋拎出嚟嗰部落櫃筒鎖起咗。

「你有無收埋其他電話?」何晞賢忽然間問佢:「區家純嗰部明明喺你度。」

柯志恒舉起隻手好似投降咁,何晞賢過嚟推咗佢埋一邊,好似警察搜身咁摸咗下佢個褲袋,但係乜嘢都搵唔到。

——當然唔會有。柯志恒心入面暗笑緊。

「鎖匙我Keep,大家一齊離開課室。」佢望一望課室個鐘——而家差唔多一點——之後對住另外四個人講:「一點半之前我唔會番入嚟呢度,你哋可以喺度守住;大家用呢段時間考慮下,一陣我哋要放棄邊個同學。」

佢講呢句嘢嗰陣,何晞賢同鄭綽婷都不其然偷望咗賴智勇一眼。

賴智勇轉身行出課室,途中專登撞咗何晞賢一下;何晞賢有啲無奈,但係等賴智勇離開咗一陣之後都出咗去。

柯志恒望一望鄭綽婷同梁家豪,兩個人啲眼神都有啲不安。

「咁…一點半再番嚟集合,你哋趁呢段時間諗下…」柯志恒袋埋條鎖匙,行向課室門口:「…你哋信唔信何晞賢所講:賴智勇死咗之後就可以End Game。」

柯志恒無再理佢哋兩個,慢慢走出課室入咗男廁;確保廁所入面無其他人之後,就入咗最裏面嗰格。

閂埋門。

冚埋個馬桶坐低。

成件事都好順利,順利到佢有啲不安。

不過已經唔重要,而家大家都拎唔番啲電話。

休息咗一陣之後,柯志恒起身,揭開咗少少個廁所水箱,搵番個膠袋。

佢喺個膠袋度拎番自己個電話出嚟,開咗個Whatsapp,Send咗句嘢俾何晞賢:

 

多謝合作,希望下世有機會再做同學             13:07

 

Send咗出去之後,再Copy呢個Message Send埋俾賴智勇、鄭綽婷同梁家豪。

然後將個電話袋番入膠袋,收埋喺個水箱入面;佢唔想喺呢30分鐘之內俾任何人發現到自己原來真係預備咗兩部電話。

離開廁所嗰陣將門後面嗰個「小心地滑」黃色牌擺咗喺門口,以免有任何人唔小心走入嚟。

半個鐘之後佢哋會再聚埋一齊,打開個櫃筒嗰一刻,所有——除咗佢自己之外——都會因為30分鐘未讀訊息而死。

曾經俾過機會何晞賢同自己合作…但係既然佢唔識相,咁就落埋去陪楊悅盈啦。

柯志恒總算鬆咗一口氣。

留言

    未有留言

分享