已讀不回死全家!

第66章 - 66 Unread Messages

鄭綽婷十二點半就番咗嚟學校。

一行入校門,就機械化咁轉左上樓梯,連諗都唔使諗,好似架火車跟住路軌行一樣。

同佢喺呢間學校讀咗五年嘅生活一樣:番學、放學、功課、測驗、考試…一成不變嘅生活。

佢無參加過任何活動,雖然有啲好熟嘅同學,但係只限於喺學校一齊上堂、食飯,從來無一個深交,亦都無同過任何人結怨。

因為呢啲原因,佢根本就唔擔心會有啲咩人Send Whatsapp俾自己;而且對同學嘅死…出奇地覺得好淡然。

所以已讀不回死全家呢件事發生咗之後,佢其實唔係太驚;佢淨係覺得好煩,因為唔可以Quit咗個Group。

以前其他同學開嗰啲無聊Group,佢每一次都會等到半夜趁無乜人留意嗰陣Quit咗佢,唔好煩到自己。

只不過今次,佢親眼見過Quit Group嘅Elaine…所以佢知道唔可以輕舉妄動。

但係佢唔明…已讀不回有乜問題?

諗番起呢幾日:吳啟鋒、何晞賢、楊悅盈、柯志恒…幾個人好似好落力咁分別處理緊個問題;鄭綽婷覺得只要知道呢一點就夠。

佢自己唔使採取任何行動。

雖然係咁,但係鄭綽婷心入面開始有啲怪責呢四個人…既然企得出嚟扮Leader,點解搞咁耐都未解決到件事。

佢知道自己唔係何晞賢、柯志恒呢啲穩入大學嘅高材生;亦都唔係吳啟鋒、楊悅盈呢種擺明無希望嘅陪跑學生——佢只係想快啲完咗呢件事,等自己可以專心一致準備DSE考入大學。

不經不覺已經上到自己課室嗰層,鄭綽婷經過男廁門口嗰陣見到啱啱行出嚟、用紙巾抹緊手嘅柯志恒。

對住佢微笑,點一點頭——同學間應有嘅禮儀——不過佢其實對柯志恒無乜好感。

點知柯志恒望咗佢一眼之後,竟然有啲輕蔑咁直行直過番咗入課室;鄭綽婷當場覺得好嬲。

呢條友望落文質彬彬,但係平時已經成日離群獨處,好似睇唔起其他人咁,估唔到而家竟然咁樣對自己。

望到柯志恒左邊面仲有啲瘀腫:俾何晞賢打嗰陣嘅傷仲未好番;鄭綽婷忽然間覺得何晞賢打得佢無錯。

行到番課室,發現得何晞賢、楊悅盈同賴智勇仲未番嚟。

話雖如此,其實課室入面計埋自己都係得三個同學;一個40人嘅班級、五日之內竟然剩番10個都唔夠。

如果今屆啲考生都咁樣減少法就好——

——唔得…鄭綽婷搖咗搖頭,咁樣諗好似Over咗…

佢同梁家豪唔熟,柯志恒就更加唔使講,所以佢自己一個坐咗喺角落。

如果唔係尋晚見到何晞賢喺個Group度叫大家今日番學校,佢根本就唔想番嚟。

無錯…佢打從心底裏無原因地比較相信何晞賢,因此當Admin Message佢嗰陣,佢第一時間諗起何晞賢;雖然有啲對唔住佢,但係佢知道何晞賢有能力應付,一定唔會出咩問題。

啱啱諗起何晞賢,點知隨即就收到佢喺已讀不回死全家Send出嚟嘅Message:

 

我同賴智勇番緊嚟

搞咩都好,等埋我哋兩個先                   12:37

 

「唔齊人我唔會開始,放心。」柯志恒把聲喺課室另一邊傳過嚟,佢語氣好似胸有成竹咁。

然後個Group就多咗一條佢Send出嚟嘅語音訊息;鄭綽婷連播都費事播…已讀不回有乜問題?

幾分鐘之後,何晞賢就同賴智勇一齊行咗入課室,賴智勇坐咗喺最近門口個位,而何晞賢就坐咗上老師枱面向住大家。

「楊悅盈呢?」柯志恒問,把聲明顯有啲不滿。

「唔嚟。」何晞賢好簡單咁答咗一句,然後問佢:「你叫我哋番嚟想搞乜?」

「我話過想同個公平、機會均等嘅方法決定邊個生存。」柯志恒答:「如果有人唔番嚟…我乜都唔會做。」

「好,咁大家唔撚使理佢。」何晞賢對鄭綽婷佢哋其他人講:「呢個所謂Admin其實係一個AI系統,楊悅盈而家去咗製造個AI嗰間公司,好快就會無事;大家喺度等佢消息就得。」

鄭綽婷心入面抒咗一口氣,覺得自己總算無信錯何晞賢;同時低頭望一望個Whatsapp——乜嘢叫做Admin係AI?

呢個時候佢留意到,開住嘅已讀不回死全家啱啱多咗個Notification:

 

12:40

6A楊悅盈 退出了

 

留言

    未有留言

分享