已讀不回死全家!

第65章 - 65 Unread Messages

因為有啲塞車,楊悅盈去到鰂魚涌嗰陣已經差唔多十一點。

本身諗住提早少少去到附近整頓下心情,點知個如意算盤打唔響,反而令到佢有少少煩燥。

同尋日一樣,一落車就一陣啲熱氣迎面襲來;著住件黑色外套嘅佢覺得好辛苦,但係又唔敢除,惟有加快腳步行過去MindTech House。

件外套完全唔啱身,好大陣樟腦味,但係楊悅盈覺得好有親切感,因為令佢諗番起細個嗰陣著阿哥啲舊衫。

忽然間諗起,楊啟臻呢個時候應該仲喺屋企瞓緊?定係已經番咗宿舍?

行入橦大廈嗰陣,啲保安望咗佢一下,眼神有啲奇怪:呢橦大廈應該好少可會有啲楊悅盈呢個年紀嘅人自己一個出入;不過好在啲保安無同佢講啲乜。

楊悅盈望一望電話個時間,已經10:58,所以佢直接去咗搭?上65樓。

部?高速向上升嗰陣帶嚟一陣離心力,竟然令到佢有少少暈;楊悅盈不禁諗起羅彥輝用嚟殺人嗰個尖長怪聲,忽然間好驚陣間要再承受一次。

無論發生咩事都好…佢唔想再聽到嗰個聲…

去到65樓,?門一打開,又見番尋日嗰個Reception;坐櫃枱嗰個女仔同尋日一樣,機械式咁對住楊悅盈微笑打咗聲招呼。

「唔該,我上嚟搵Jessica…」楊悅盈行埋去同佢講咗聲。

「邊位Jessica?」櫃枱姐姐依然微笑住,問番佢。

「呃…」你哋呢度好多個Jessica?楊悅盈皺起眉頭諗咗一陣:「姓…姓石嗰個…」

「你點稱呼?」

「楊悅盈。」

櫃枱姐姐點點頭。

「Jessica,呢度有位楊小姐搵你。」然後就拎起個內線電話講咗句。

望向左邊道玻璃門,同尋日見到嘅情況一樣,入面啲人如常對住部電腦做緊嘢——

殺死咗自己大半班同學嘅技術係呢間公司造出嚟…楊悅盈有啲懷疑入面呢班人係咪唔知自己做緊啲乜嘢。

又或者佢哋根本就唔在乎。

「楊小姐,麻煩你等一等。」櫃枱姐姐好有禮貌咁示意楊悅盈過去啲梳化度:「佢一陣會落嚟接你。」

「唔該…」楊悅盈細細聲講,跟住就埋咗去梳化度坐低。

習慣性地拎咗部電話出嚟渣住,之後忍唔住再睇一次佢同Admin‧羅彥輝尋晚嘅對話。

羅彥輝話唔殺自己,係因為楊悅盈無犯任何規則…但係睇番羅彥輝當時講嘅嘢,同埋忽然間用個怪聲嚟襲擊自己呢一點,楊悅盈覺得當時佢好似係發緊嬲咁。

一個電腦AI模擬出嚟嘅「人」,竟然都有情緒——楊悅盈無呢方面嘅知識,唔知有無可能;佢淨係覺得好神奇。

開番已讀不回死全家個Group,無新嘅Message;楊悅盈數咗一數,而家全班只係剩番六、七個人。

諗起幾日前嘅自己,一心想盡力救番大多數同學。

結果,佢哋不斷咁死、不斷咁中伏、不斷咁減少人數。

由結果嚟睇,自己已經完全失敗咗。

雙手揞住自己塊面,合埋眼歎咗口氣…

好想喊…

好攰…

好驚…

佢搖搖頭,用力咁襟住自己對眼

——唔得,唔可以俾自己咁諗…

因為問題未解決,所以唔可以俾啲負面情緒影響到自己。

電話響咗一聲。

楊悅盈放開手一望;何晞賢Send咗個Facebook Message俾自己:

 

Hei Yin Ho:

你點樣?上咗去未?            11:19

 

「喂!妹妹仔!」

忽然間有人喝咗自己一聲,嚇到本身諗住覆Message嘅楊悅盈爭啲跌咗個電話落地。

尋日喺呢度見過、著西裝嗰個男人,企咗喺?口襟住個掣,用啲唔係太友善嘅眼神望住自己。

楊悅盈唔知點算好,所以對櫃枱姐姐投以一個求救嘅眼神;但係櫃枱姐姐好刻意咁垂低頭,似乎想避免同個男人有咩眼神接觸。

「過嚟啦,唔係震到聾咗吓?」個男人又對楊悅盈講咗一聲,一邊用手指住部?。

雖然有啲不安,但係佢鼓起勇氣袋番埋部電話,行咗入?;個男人跟住入嚟襟咗66樓。

 

***

 

部?好快到咗66樓,呢度無Reception、無梳化、連公司Logo或者名都無,淨係得道玻璃門。

男人用張職員證喺個感應器度嘟咗一下,再推開道門俾楊悅盈入去,然後示意佢跟住自己。

門口完全唔同,但係入到嚟之後,呢度同65樓差唔多一模一樣,都係坐滿咗人,所有人各自對住面前部電腦埋頭苦幹;惟一分別在於呢層啲人好多都無著西裝或者制服,有幾個望落甚至乎同楊悅盈差唔多年紀。

個男人帶住佢行咗入一間辦公室,門口個牌寫住「Ivan Choi」;一入到去,男人就去咗辦公枱後面張大班椅度坐低,拎起枱面啲文件嚟睇。

間房好大,感覺上同尋日間會議室差唔多,但係闊落好多;男人——佢應該就係Ivan本人——張枱背後係一大片落地玻璃,佢嘅右邊係一列書架,擺滿咗啲又厚又唔知係乜嘢嘅英文書;門口隔離有一張兩座位嘅梳化、同埋一個矮身櫃。

楊悅盈習慣性地閂埋門之後就企咗喺度,有少少不知所措。

「坐啦。」Ivan用命令式嘅口吻指一指佢對面嗰兩張櫈。

楊悅盈覺得好緊張。

不過照樣攬住自己個袋,坐咗喺佢對面;Ivan一直集中精神對住份文件,不時揭前揭後、睇兩眼之後就好似喺度諗嘢咁。

楊悅盈呢個時候先留意到佢年紀唔細,應該起碼都三十幾歲,左手無名指戴住隻戒指;望番過去書架,見到一張Ivan同另一個女人嘅合照。

佢想睇下嗰份文件係啲乜嘢嚟,但係當佢偷望咗一眼,發覺成份都係用英文寫、間中夾雜一兩張完全唔知係乜嘢嘅圖表之後,就放棄咗。

見Ivan似乎已經當咗自己透明,不過楊悅盈都係唔敢輕舉妄動。

唔知隔咗幾耐,佢先至終於偷偷地喺裙袋拎番個電話出嚟:

 

Yuna Yeung:

我無事,啱啱上咗去            11:57

 

——忽然間有啲後悔無叫何晞賢一齊過嚟…

「砰!」Ivan冚埋個文件夾,有啲用力咁丟咗喺枱面,然後深呼吸咗一啖。

份文件個封面寫住——

「尋日聽完嗰個聲之後你有咩感覺?」Ivan隨手將份嘢拎起放番入櫃筒,開始問楊悅盈。

——頭先見到封面寫住MAD乜乜Report…但係太快睇唔清楚…

「點?」

楊悅盈——唔知俾咩反應好——有啲驚咁搖搖頭。

「喂唔使驚喎…」Ivan雖然咁講,但係啲語氣唔太好:「係咪都講兩句吖,頭痛、頭暈?」

「嗯…」

「借個電話嚟。」Ivan對住楊悅盈伸手。

「吓…?」

「拎嚟。」佢好強硬咁講:「無事嘅。」

楊悅盈搖搖頭。

Ivan表情相當不滿,企起身走咗去楊悅盈隔離;楊悅盈諗住會俾佢搶走個電話嗰陣,辦公室道門打開咗,Jessica走咗入嚟。

「好彩我問一問…你條仆街…」Jessica針對Ivan講咗聲,然後直接行埋楊悅盈度捉住佢隻手想拉佢起身:「你跟我嚟。」

——求之不得…好難想像自己會咁諗…但係楊悅盈好慶幸Jessica嚟到帶走自己。

Jessica拖住佢行咗入隔離間辦公室——門口個牌寫住「Jessica Shek」——間房個佈局同Ivan嗰度幾乎一樣,只不過呢度左右顛倒咗。

「坐。」Jessica指一指張梳化示意楊悅盈坐低:「得你一個嚟咗?」

楊悅盈坐低之後點點頭。

「頂…」Jessica有啲唔耐煩:「其他人喺邊?」

楊悅盈唔係太想答呢個問題,所以佢望住Jessica無出聲。

見楊悅盈唔太自在咁款,佢走埋去坐咗喺佢隔離。

「你擺低部電話喺度,我同你出去講兩句。」

留言

    未有留言

分享