已讀不回死全家!

第64章 - 64 Unread Messages

我忽然間有種好奇怪嘅感覺,好想叫楊悅盈唔好走,或者至少俾我陪佢一齊過去MTCC。

照佢尋晚講法,其實番學校等啲同學可以面對面互相監察嘅話,我覺得賴智勇一個番去已經夠。

大不了叫楊悅盈等我去廣源俾番部電話賴智勇,之後先至再番嚟同佢會合一齊過海。

要我咁樣左撲右撲,我其實無乜所謂。

但係我見到楊悅盈態度咁堅決,都唔好意思喺呢個問題上同佢糾纏。

「呼…」

我一番到入屋,就走番埋梳化度撻番落去;雖然我一啲都唔眼瞓,但係始終成晚無休息過,個人無乜力咁、唔係好想郁。

尋晚兩點半左右,Admin就開始咗第三輪獨立Whatsapp;一如所料,我手上嗰三部電話之一——賴智勇部機——好不幸咁中咗招;不過我連Admin講啲乜都懶得睇,直接就打咗「何晞賢」三隻字覆咗佢。

跟住佢就成晚不停咁同我提番Billy死嗰日嘅事:柯志恒早過我哋知道羅彥輝已經死咗、賴智勇曾經建議過同學Send Whatsapp俾楊悅盈。

我知道Admin係想引我對佢哋做啲乜嘢、或者將佢轉俾其他人,所以我只係求其Keep住每半個鐘覆佢一次,無太在意佢講啲乜嘢。

唔知係咪俾楊悅盈感染到,我都開始深信今日件事就會完結,所以有啲緊張。

賴智勇呢個時候Facebook Send咗個Message俾我:

 

Johnny Lai:

早晨,我哋十二點喺瀝源等?               10:13

 

我本身打算覆佢「係」——

 

Hei Yin Ho:

如果早啲你得唔得?

十一點左右?              10:14

 

Johnny Lai:

無問題,喺學校隔離間茶餐廳等?                 10:14

 

Hei Yin Ho:

OK,一陣見                  10:14

 

——不過我諗諗下,想叫佢早啲出嚟;有個伴喺身邊好似會安樂啲。

入廁所洗咗個面,但係仍然覺得個人有啲乏力。

唔理得咁多,我入房換番套校服,袋好啲電話,行到去門口嗰陣…

我走番入去打開咗家姐房門——佢開到個冷氣好大,入面成個雪櫃咁。

何晞媛仲喺度瞓緊,我諗未到一兩點佢都唔會醒;我走咗去床邊踎喺佢隔離。

拍咗佢塊面一下——無反應。

再拍一下。

佢都係無醒到。

「喂!」我對住佢兜口兜面大聲嗌,終於嚇醒咗佢。

何晞媛睜開眼望咗一下,見到係我,即刻乸埋口面,然後就翻轉身背對住我繼續瞓。

「屌…」我聽到佢細細聲講咗句。

「我出去喇,要番一番學校。」我搖下佢膊頭同佢講,佢一下撥開咗我隻手。

唔知點解我想再同家姐講多陣嘢。

但係越諗就越發現無嘢講;反而平時我同佢坐喺度,啲瑣瑣碎碎嘅話題可以講成晚。

「你一陣起身記得洗番尋晚啲碗。」我講完都覺得自己有啲無聊,所以就起番身打算出門。

「得喇…走啦…」何晞媛用把半夢半醒咁嘅聲答咗我一句。

 

***

 

因為想慢慢行過去學校嗰邊,我無搭到車,搞到遲咗少少到。

呢個日子呢個時間,學校隔離間茶餐廳無乜人,所以一行入門口就見到賴智勇對住我招手。

埋到去坐低見到佢已經叫咗嘢喺度食緊。

「咦?楊悅盈呢?」佢見到我自己一個嚟,有啲奇怪咁問。

「佢另外有嘢做。」我掹咗個餐牌出嚟睇。

「有嘢做?」

「Jessica叫咗楊悅盈上佢公司…話要佢幫手Shut Down Admin個系統。」

「吓?」賴智勇飲咗一啖佢嗰杯唔知凍奶茶定凍咖啡:「點解係搵楊悅盈?」

我聳聳肩,然後叫咗個伙記埋嚟落單。

「但係…佢自己一個上去,你放心咩?」

——其實唔放心…我無出聲答到賴智勇問題,淨係開番個Facebook Messenger問下楊悅盈而家點:

 

Hei Yin Ho:

你點樣?上咗去未?            11:19

 

我見佢明明On緊,好快就讀取咗,但係無覆到我。

既然仲睇到Message,咁我諗佢應該無事?我一邊諗,一邊遞番賴智勇部電話俾佢。

「尋晚Cap咗圖俾你,但你都再睇下個Group。唔知一陣柯志恒又想搞乜。」

講完之後,我挨落椅背度呼咗啖氣。

「好攰?尋晚你兩個搞咩嚟?」睇緊電話嘅賴智勇睄咗我一眼,陰陰嘴笑住問。

「屌你啦…」我開始覺得佢平時成日搞爛Gag唔係有咩企圖,而係純粹真心膠。

「放鬆啲啦…我信得過你哋兩個。」

我怒睥咗賴智勇一眼。

「喂,我意思係我信得過你同楊悅盈唔會俾我哋出事。」佢一面無辜咁解釋。

大約三四個字之前我先啱啱覆完一次嘅Admin,喺呢個時候Send咗個Message過嚟:

 

要不要在這裏告訴他?

他跟楊悅盈才是結束遊戲的關鍵(笑)                  11:22

 

賴智勇應該唔知——諗都無諗過——自己竟然會係其中一個關鍵人物;我亦都唔想佢知道咗然後亂諗嘢:

 

喂,反正你可以經啲電話睇到我哋

不如你話我聽而家楊悅盈點?               11:23

 

只能夠很遺憾地告訴你

她就像你眼前的賴智勇一樣,仍然在生(笑)                11:23

 

垃圾AI,可唔可以講清楚啲?               11:24

 

「無嘢吖嘛?」賴智勇見我不停咁對住個電話打字,有啲關心咁問。

「無聊人啫,唔緊要。」

賴智勇好似唔信我咁,雖然無出聲,但不時望一望我,又借啲依想挺起身望下我個電話。

好在我叫嗰份早餐啱啱好到;所以我就開始食嘢,同時反轉咗部電話放喺枱,以免俾賴智勇見到Admin同我講嘅嘢。

留言

    未有留言

分享