已讀不回死全家!

第63章 - 63 Unread Messages

咇咇。

咇咇。

楊悅盈襟熄個鬧鐘嗰下,覺得有啲依依不捨。

前一晚Set咗九點半鬧鐘響,佢甚至開始有啲後悔,因為頭先佢發緊一個難得令到自己唔想咁快醒番嘅好夢——夢入面嘅6A班齊齊整整,而佢就同一啲永遠都無可能會同自己做朋友嘅同學感情好好咁約埋一齊番學校。

點知開學禮都未開始,個鬧鐘就「咇咇」聲咁響。

佢用力咁捽一捽雙眼,然後撐起自己挨住床頭坐起身;每一朝瞓醒佢都一定逼自己坐,以免轉個頭又瞓番著。

擘大眼一望,雖然視線有啲模糊,但係隱約覺得好似有啲唔對路。

喺枕頭邊攞番個眼鏡嚟戴先知咩事:呢度…呢間房好陌生。

望住佢身處緊呢個地方…

呆咗一陣先醒起自己而家喺何晞賢屋企。

坐起身伸咗個懶腰、用手指梳咗下個頭之後,就行咗出廳。

何晞賢坐咗喺梳化度對住自己部電話唔知睇緊乜嘢;佢應該成晚都無瞓過,但係似乎仲好精神。

「咦?咁早起身嘅?」佢見到楊悅盈,就放低電話問。

「嗯,我唔想遲到。」

楊悅盈好快梳洗完,就入番房換衫。

尋晚著嗰件衫雖然有啲殘,但係始終心口多咗幾點深紅色嘅污漬,唔知何晞媛會唔會介意;佢將件衫摺番好,拎咗出去還俾何晞賢。

「Sorry…唔知洗唔洗得甩…」佢遞俾何晞賢嗰陣又再講多一次。

「少少唔緊要。」何晞賢接過件衫之後就隨手放喺隔離,然後對住楊悅盈上下打量,皺一皺眉:「但係你…」

楊悅盈而家仲係著住尋日嗰套:白色上衣、淺藍色裙,一大撻乾咗嘅啡紅色血漬好顯眼。

「一係我俾套衫你換。」何晞賢起身行咗去佢家姐房門口,諗咗一諗之後走番入自己房。

楊悅盈喺梳化坐低,袋番埋自己部電話嘅同時望咗一眼何晞賢嗰部,原來佢喺Whatsapp度應付緊Admin——羅彥輝。

「費事入家姐房嘈醒佢…不如我俾件外套你褸住算。」何晞賢把聲喺佢間房度傳出嚟。

「嗯。」楊悅盈應咗一聲之後,有啲想攞起何晞賢部電話嚟睇,但係佢好快就拎住件褸行番出嚟,所以楊悅盈打消咗呢個念頭。

「呀…尋晚唔知又有邊個死咗…」何晞賢有啲輕描淡寫咁,苦笑住講:「跟住Admin好快就番咗嚟我度…我Hea住Hea住咁覆咗佢成晚。」

「趁有機會同佢傾多幾句,過埋今日可能無機會。」

楊悅盈想講下笑緩和下氣氛,但係何晞賢似乎Get唔到,無俾反應佢,淨係將手上嗰件黑色嘅連帽外套遞俾楊悅盈。

「我最細係呢件,你試下。」佢有啲尷尬咁同楊悅盈講。

——唔使試都知唔會啱…

楊悅盈接過件褸企番起身,對住高自己差唔多一個頭嘅何晞賢著咗件褸:衫尾差唔多長到落佢大脾,佢指尖僅僅喺個袖口度伸到少少出嚟,惟有摺起個衫袖露番自己對手出嚟。

「今晚還番俾你。」楊悅盈拎番自己個袋之後,就準備出去;何晞賢去咗門幫佢開門。

「拎番部電話未?」拉開道木門嗰時,佢回頭望一望楊悅盈。

「嗯。」

「真係唔使我一齊?」佢企喺門口,好慎重咁問。

楊悅盈搖搖頭。

「我可以同你一齊,但你等我——」

「唔使。」楊悅盈打斷咗何晞賢。

「咁…你小心啲,有咩事就打俾我。」佢好似仍然唔係咁放心,所以跟埋楊悅盈出嚟等?。

成個過程,楊悅盈都係垂低頭望住地下無咩表示。

何晞賢亦都只係望住佢,無再講乜嘢。

好快,部?就到咗;楊悅盈行入去之後,先至擰番出嚟望住佢雙眼講咗一句。

「如果你有咩事…就打俾我同我講。」

楊悅盈其實覺得咁講有啲奇怪,因為好似專登喺度同佢鬥氣咁。

不過,

反正,

之後道?門就閂埋咗,

而何晞賢亦都無機會再俾啲咩回應佢。

留言

    未有留言

分享