已讀不回死全家!

第62章 - 62 Unread Messages

見楊悅盈好似想打電話咁,我捉住佢隻手。

「如果你諗住打俾Jessica講啲咩重要嘢…最好用番我屋企個手提。」

楊悅盈無講乜嘢,淨係放開手俾我拎走佢部機,跟住好似好攰、軟綿綿咁挨落個椅背度。

我將佢部電話放番喺梳化度,然後攞番個家用手提電話。

「喂…我瞓喇…」何晞媛冚埋部Notebook伸咗個懶腰:「幫手洗咗啲碗佢…吖…唔該?」

「你拎番入廚房擺低。」我求其敷衍佢一句,就走番入房。

開番房盞燈,我先發現枱上面有幾滴血喺度。

我放低個電話喺枱面,走去佢隔離坐喺床邊,望到佢用一隻手揞住自己個鼻,有啲血喺佢手下面滴緊落嚟,佢件衫個胸口位已經幾點紅色嘅血漬。

嚇咗一跳,即刻喺枱面盒紙巾掹咗幾張出嚟俾佢。

「唔該…」佢細細聲同我講咗句,之後接過啲紙巾,用嚟襟住自己口同鼻。

佢又入番今日晏晝嗰個迷迷濛濛咁嘅狀態,好彩似乎無晏晝嗰陣咁嚴重。

楊悅盈將張染血嘅紙放喺枱面,再自己掹咗兩張嚟抹枱面啲血漬,之後先拎起個電話,慢慢襟咗Jessica個號碼打過去。

「喂?」個電話似乎通咗,所以我好似頭先咁坐埋啲挨過去聽。

「喂?妹妹仔?」Jessica把聲喺個電話度傳出嚟。

楊悅盈望一望我,指咗下佢身後面道門;我行過去閂咗佢鎖好門。

「我…我聽日過嚟你度。」楊悅盈同Jessica講:「我自己一個嚟。」

「我會同佢一齊。」我坐番埋去楊悅盈隔離插嘴講咗句;楊悅盈拎開個電話睥咗我一眼,好似怪我多口咁。

「其他人呢?」Jessica問。

「唔關其他人事…」楊悅盈索咗一下鼻:「你唔係話過最緊要嗰個係我咩?唔好牽連其他人入嚟。」

「仆街,我都話Guarantee其他人肯合作就全部人都唔會有事。」Jessica好似嬲嬲地:「你當我呃你?」

楊悅盈搖搖頭。

「唔係,但係我哋想搵埋其他同學過嚟…可能有啲難度。」唔知楊悅盈搖頭係咩意思,但係我代咗佢答:「因為有同學一直從中作梗喺度搞事…我唔肯定佢哋肯唔肯聽我哋講。」

「就算叫唔到佢哋過嚟,你最好都Gather晒所有人喺同一個地方。」Jessica語氣難得地好認真:「如果唔係會有好多手尾。」

——手尾?

「我俾唔到咩你哋去證明,但係我同你哋一樣唔想再有人死。」佢繼續講:「所以,如果你帶到其他人嚟就最好,就算唔得,都要Gather晒佢哋喺同一個地方。」

「點解?」我追問。

「我…聽日要做啲乜?」楊悅盈同我同一時間問。

「帶你自己部電話過嚟…帶埋個腦過嚟。」Jessica似乎有啲歉意咁補咗句:「今日喺Office玩大咗,Sorry。」

楊悅盈點點頭。

「得,我會提佢。」我答完之後拍一拍楊悅盈;講緊電話點頭搖頭人哋睇唔到架喎。

「聽朝十一點上到嚟我公司,同Reception講搵我就得。」Jessica應該係呼咗啖氣,因為個電話「沙」一聲:「我都係嗰句,最好搵齊人上嚟。」

講到呢度,Jessica就Cut咗線。

「拜拜…」楊悅盈個人慢咗半拍。

之後就放低個電話,伸直雙手合埋眼抬起頭「啊…」咁叫咗一聲。

「Admin呢?」我問佢。

「聽朝十一點…」佢自言自語咁重覆咗一次個時間。

「你同Admin講咗乜嘢?」我都重覆咗一次個問題。

「講咗啲無用嘅嘢…」

「你同佢個對話完咗未?」

「嗯…」佢點點頭:「轉咗俾柯志恒。」

——柯志恒…條友應該唔使十五分鐘就會彈番過嚟俾你…

「響電話。」話口未完,何晞媛就敲門同我講咗聲。

「你轉番俾我吖嘛…反正無分別…」我忍唔住對楊悅盈講,再開門出去拎番三個電話。

但係我發現三部電話都收到Message:Admin喺已讀不回死全家個Group度Send咗嘢出嚟。

將楊悅盈個電話俾番佢、賴智勇嗰部放喺枱面,我開咗自己嗰部嚟睇。

 

第二輪指導了解已經完成

堅強的同學仍然使我大開眼界,沒用的同學始終是垃圾(笑)

不過,看來有人快到極限了!               01:40

 

——啊…!…?楊悅盈頭先話彈咗Admin俾柯志恒,然後咁快就完咗第二輪——

 

報個數,快                  01:41

 

咁諗雖然好邪惡,但係我打從心底希望第二輪死嗰個係柯志恒。

 

@您 不用焦急啊,慢慢數吧

反正你們剩下的人又不多(笑)           01:41

 

接下來的第三輪

我會依舊重新隨機抽選你們一位作開始

夜已深了,小心不要睡著錯過我的訊息!              01:42

 

唔知第二輪係邊個死咗,但係我數一數,而家全班只係剩番六個人…

我呢度有三部電話,代表1/2機會Admin會抽中我哋。

「你快啲瞓,聽朝我同你過去。」我一手搶走咗楊悅盈電話。

佢好順灘——定唔知係無力同我爭——咁俾我拎走咗部機。

「唔使…我自己去。」佢將枱面嘅紙巾撥埋一邊,伏番落去,但係仍然望住我:「你喺個Group度幫手叫人聽日番學校。」

「吓?」睇嚟佢頭先已經追番個Group啲Message;但係我唔明點解佢會叫我順柯志恒意,聽日番去。

「大家當面坐埋一齊,可以避免好多問題…」

「例如?」我有啲懷疑楊悅盈係咪俾Jessica講嘅嘢動搖到。

「例如…如果今日我哋全班同學面對面嘅話,就唔會有咁多人信錯柯志恒而Quit Group。」佢解釋。

我無出聲。

「唔使擔心…聽日…」楊悅盈夾硬擠出一個笑容,個表情有啲奇怪:「過埋聽日就無事架喇…」

講唔出點解,但係硬係覺得聽日聚埋一齊反而會唔安全;不過我見楊悅盈咁樣,唔忍心同佢拗落去。

「唔好諗咁多喇,你瞓啦。」摸摸佢個頭同佢講,跟住我就拎番三部電話起身。

「幫我熄燈…唔該…」佢慢慢爬番上我張床:「幫我同姐姐講聲,整污糟咗佢件衫,唔好意思…」

我無再講啲乜,熄咗盞燈之後出去坐番落梳化。

開番個Group嚟睇,報數嘅人得梁家豪同鄭綽婷。

 

大家就按柯志恒所講聽日一點番學校集合

我唔會講啲乜嘢強迫或者威脅你哋

不過…如果我哋面對面坐埋一齊,啲仆街就無機會乘虛而入            01:45

 

Send完呢個Message之後,我再用Facebook通知賴智勇:

 

Hei Yin Ho:

聽日一點番到學校,約你十二點喺瀝源邨等

我同你講番而家個情況先              01:46

 

Johnny Lai:

OK,Thx               01:46

 

賴智勇…似乎真係一直Online Stand-by等我可以隨時搵到佢;不禁諗起幾日前,我同允仔就係喺我屋企,同一個地方,兩個成晚無瞓咁互Send Whatsapp Send咗一晚。

 

Hei Yin Ho:

多謝你…              01:47

 

Johnny Lai:

吓?咩事呀?              01:47

 

Hei Yin Ho:

無嘢喇,早啲休息啦            01:48

 

忽然間有一剎那,我有啲想喺賴智勇身上搵番Billy或者允仔嘅影子。

當然…無可能會搵得到。

家姐煮俾我嗰碗麵仲放咗喺飯枱度,我諗住食埋佢;點知啱啱坐低,個電話又響,叫番我過去。

柯志恒喺已讀不回死全家覆咗我:

 

@您 啲仆街你係咪指我?

不過唔緊要,聽日一點學校見啦           01:50

留言

    未有留言

分享