已讀不回死全家!

第61章 - 61 Unread Messages

何晞媛喺廚房嗌自己嗰陣,楊悅盈拍咗拍何晞賢叫佢幫手應付住先。

何晞賢行開咗之後,收到Admin一個Whatsapp:

 

同學?(笑)

你其實早就很厭煩了吧?              00:55

 

楊悅盈忽然間有個想法,但係佢想自己一個做,所以就拎住部電話入咗何晞賢房鎖埋門。

佢坐喺書枱度,開住Whatsapp將部電話打直部放喺自己前面,然後嗚前少少對住部機,好似準備開Video Conference咁。

…唔係,應該係好似對住一個人咁。

何晞賢呢個時候敲門想入嚟,楊悅盈求其打發咗佢走。

望住個Mon,再諗一次自己想做嘅嘢。

 

阿輝?

你係咪見到同埋聽到我哋講嘢?           00:57

 

不是早就承認過可以看到你們嗎?                 00:57

 

有時楊悅盈對住人講嘢都會周身覺得好唔自在…而家要佢對住件死物講嘢,佢覺得好白痴,但係——

「羅彥輝…阿輝?」佢對住個Mon、對住個Whatsapp講;講完佢都Feel到自己開始面紅。

——好快,個Whatsapp就顯示Admin輸入中…

 

怎麼了?懶得打字嗎?                  01:01

 

楊悅盈望住個電話前Cam,盡量將部電話幻想成係一個人——幻想成羅彥輝。

幻想自己唔係望住個Cam,而係同緊羅彥輝四目交投。

嘗試諗番以前羅彥輝喺學校發生嘅事:楊悅盈每一次見到有欺凌事件發生,其實都好想幫佢;而每一次佢都會私底下同老師講,因為佢相信等老師出手先係治本嘅方法…只不過佢估唔到最後竟然會演變成咁。

「我想直接同你傾計。」楊悅盈細細聲對住部電——對住羅彥輝講:「我其實從來都無嫌過你煩…我一直都好想幫你。」

 

你之前連我死了都不知道,不是嗎(笑)              01:04

 

「對唔住…」

 

你和何晞賢剛剛才想要找那個女人求助是吧?                01:04

 

「我唔想行到嗰一步…因為我寧願相信你都唔想信Jessica。」

 

相信我

解決這件事只有一個方法              01:05

 

「咩方法,你講…」楊悅盈衷心對住羅彥輝講:「今次…今次我一定會幫你。」

 

1. 6A班全員死亡!

2. 6A班倖存者兩人或以下!

3. 關鍵人物全員死亡!

(笑)                 01:07

 

「唔好咁樣…你喺我心目中唔係咁樣…」

 

唔知咩原因,羅彥輝靜咗落嚟。

 

「你唔係啲咁嘅人嚟,你放過啲同學啦…」

 

佢係思考緊,定係…楊悅盈放慢呼吸,有啲緊張;希望羅彥輝可以諗番起自己係個咩人。

 

隔咗幾分鐘,楊悅盈開始隱約聽到——今日晏晝聽過嘅嗰個怪聲。

 

雖然無之前嗰次咁強烈,但係佢即刻就覺得個鼻有啲怪怪地,用手一抹發現原來滲緊啲血出嚟。

 

你以為自己很了解我嗎?              01:11

 

佢揞住耳,但係啲聲好似直接鑽入佢個腦度咁樣,根本就遮唔到…

 

我在你心目中,根本就不是人吧?                 01:12

 

「唔係…」楊悅盈開始頭痛,有啲呼吸困難…

 

死前最後的呼救都沒有得到回應

你明白那種感受嗎?            01:12

 

「對唔住…」佢攬住個頭趴咗喺枱面…唔知係咪心理作用,嗰把殺人怪聲好似越嚟越大咁。

 

「嗚————————————————————」

 

楊悅盈唔想自己咁樣死…唔想死…

忽然間毫無先兆咁,個聲就停咗。

——自己已經死咗?唔係…佢仍然感覺到自己有呼吸…

但係全身都無力,個頭好似抽住抽住咁痛;佢繼續伏喺枱面,對耳仲聽到啲嗡嗡聲,好似耳鳴咁。

唔知過咗幾耐,佢終於有力撐番自己起身;面上流落去嘅血喺何晞賢枱面積埋咗一小灘。

羅彥輝見到,問咗佢一句。

 

知道為甚麼我不殺你嗎?              01:16

 

楊悅盈雙手用力襟住自己兩邊太陽穴,用力合埋眼,搖搖頭。

 

因為你沒有觸犯規則(笑)

看,我是很守規矩的            01:17

 

深呼吸咗幾啖,強忍住頭痛——佢唔知係羅彥輝輕手咗,定係已經開始有啲免疫,但係今次佢恢復得比今日晏晝嗰次快好多。

「我唔想…亦都唔會俾你殺死其他同學…」佢再一次望住羅彥輝講。

 

「嗚——」

 

怪聲今次響一下就停咗,但係楊悅盈感覺好似有人用枝鐵棒喺佢個腦度拮咗一下咁。

 

那很簡單

你跟賴智勇一起去死就可以了               01:20

 你不是早就知道了嗎?                  01:21

「嗚——」

 

「夠喇…」楊悅盈唔想再聽到呢個聲。

 

夠了嗎?(笑)

那你要不要把我轉給其他同學?           01:21

 

「柯志恒…」楊悅盈隨口講咗自己第一個諗起嘅名。

 

不論是叫我找其他同學,還是你的30分鐘回覆限制時間

也是要你打字進來才作計算的(笑)             01:22

不然的話你知道會怎樣嗎?                   01:22

「嗚——」

 

楊悅盈有啲吃力咁拎番起個電話,開始打「柯‧志‧恒」三個字。

 

話說回來,柯志恒一直都在為勝利條件努力

你應該向他多學習呢?                  01:23

 

希望他快點達成目標!(笑)               01:23

 

佢打完個名Send出去嗰下,有種終於甩難嘅感覺:

 

柯志恒                 01:24

 

佢趴番喺枱面,好慶幸唔使再聽到嗰個怪聲…

有啲攰,好想瞓…

「你點樣?無嘢吖嘛?」何晞賢敲門問佢。

楊悅盈伸手去後面擰一擰個門柄,「噠」一聲開番個鎖,然後何晞賢就入咗嚟。

「你…有無睇到個Group?」何晞賢喺佢後面問。

——Group…?楊悅盈唔係好明,所以搖搖頭。

「…你頭先…點樣?」

——頭先…我都唔知算係點…

佢開始搵自己電話嘅通話記錄;搵Jessica個電話…

無論Jessica想點都好,佢已經諗唔到自己仲可以點做…

留言

    未有留言

分享