已讀不回死全家!

第60章 - 60 Unread Messages

我見楊悅盈好緊張咁——雖然我自己都係——有啲想捉住佢隻手。

點知我仲未掂到佢,佢部電話已經響咗;比我想像中快。

無錯,係Admin Send過嚟嘅Whatsapp

 

你和何晞賢在打甚麼鬼主意呢?           00:49

 

雖然咁做有啲低能,但係為咗不甘示弱,我睥實楊悅盈部機個前Cam,好似望住Admin對眼咁。

 

傾緊點樣令你收手                00:50

 

我望向楊悅盈,佢好認真咁思考緊;但係Admin已經補咗句:

 

還是決定相信那個女人嗎?

已經說過了

我是可以、亦很樂意去改規則配合(笑)              00:52

 

我唔信佢

正如我頭先所講;我仍然當你係同學

你聽到我咁講架          00:53

 

「盈盈!」不知就裏嘅何晞媛喺廚房好大聲咁嗌:「食得喇,你過嚟拎。」

楊悅盈拍一拍我示意我代佢去,我惟有走入廚房,見到家姐將煲麵分緊做兩小碗。

「望咩呀?無預你架。」家姐有啲得戚咁同我講:「一係你同盈盈兩份?」

「唉…你食啦。」無乜心情同佢玩,所以我放棄,行番出去。

同時發現楊悅盈同佢部電話都唔見咗,而我間房閂埋咗門;我嘗試開門,但係道門從裏面反鎖咗。

我唔知咩事,所以敲一敲門。

「俾啲時間我自己一個同佢傾,Sorry。」楊悅盈把聲,好近;睇嚟佢唔係企咗喺門後面,就係坐咗喺書枱度。

「OK,但我要入嚟。」我唔明點解佢要自己一個匿埋:「以防你做咩傻事。」

諗起幾個鐘之前Admin先喺度企圖慫恿佢自殺,所以我就更加唔放心。

「咩傻事?」

「你話呢?」

「如果我夠膽做,你覺得我仲會等到而家?」楊悅盈自嘲地笑咗一聲。

「你如果再單獨同Ad…同佢對話,我唔知佢仲會點同你講、點樣引導你。」

家姐雖然坐咗喺梳化度食緊嘢,但由細對到佢大嘅我知道佢一定喺度偷聽緊;所以我唔敢講「Admin」。

「我都唔知。」楊悅盈似乎有啲焦急:「有人喺我隔離我諗唔到嘢,你俾半個鐘…一個鐘我,唔該你吖。」

「半個鐘。」無辦法。

我惟有由得佢;大不了一陣用鎖匙開門。

行番埋去坐喺梳化度,忽然間又唔係好想食嘢。

「做乜?講電話?」家姐哄埋少少壓低把聲問我。

「係呀…佢屋企人打過嚟。」

「哦。」聽到係屋企人,佢好似喪失咗興趣咁,注意力繼續放番落面前部電腦度,唔知幾時佢又開番個YouTube出嚟喺度睇片。

「聽日或者過幾日就無事架喇。」家姐忽然間咁講,我有啲驚訝望過去嗰陣,佢先講埋後半句:「不過下次唔好激嬲女朋友喇…」

我唔係太想鑽入呢個話題,好在家姐自己轉咗講另一樣嘢。

「同埋呢,今朝喺IG見到啲嘢好奇怪…」佢拎咗自己部電話出嚟諗住開Instagram:「俾你睇下…」

就喺呢個時候,梳化上面我同賴智勇部電話差唔多同一時間響咗。

「喂響電話喎。」家姐聽到之後提咗我一下,我唔知好嬲定好笑

——頭先我行開咗你唔出聲…而家我同你一齊望住響你反而覺得有需要提我…?

兩部機一齊響,幾乎可以肯定係已讀不回死全家收到Message;係咪楊悅盈唔知點樣同Admin傾掂咗數?定係Admin又想改規則逼死我哋?

我諗住開個電話嚟睇嗰陣,頭先不停咁搭嘴聊我講嘢嘅何晞媛忽然間靜咗落嚟。

我怕佢唔覺唔覺咁偷偷地昅埋嚟睇到個Group啲內容,所以拎埋賴智勇嗰部電話,又走番入佢房閂埋門先睇。

坐喺佢床上面,我開咗個Whatsapp,果然無估計錯,係個Group收到Message。

或者估錯咗少少…因為係柯志恒Send出嚟嘅:

 

而家都差唔多去到尾聲

我覺得大家不妨攤開嚟講              01:10

 

見到柯志恒,我反射性咁想打句嘢鬧佢或者叫人唔好信佢,點知俾佢快我一步:

 

@您 @6A-楊悅盈 但係你兩個唔好出聲住              01:11

 

老老實實同你班白痴仔講

我由頭到尾都只係打算自己一個生存到最後

其他人係我真係無興趣理              01:13

 

你哋都唔好再心存僥倖

以為大家都可以全身而退              01:14

 

啲同學——仲未死而又Keep緊自己部電話嗰啲——開始蒲頭:

 

你食屎啦,當自己好勁?              01:14

 

@6A-柯志恒 老老實實同你講

我好耐之前已經覺得你好仆街               01:15

 

@您 我其實一直都有聽你話

無信過柯志恒啲廢噏            01:15

 

我唔知柯志恒忽然間出嚟坦白係咪傻咗,但係見到其他同學對佢講嘅嘢,我都放心啲;至少今次唔會有人聽佢話而中伏。我惟有贈佢一句:

 

@6A-柯志恒 算把啦…我唔明你點解要咁做

但係無用架…算啦你             01:16

 

柯志恒無理到我,反而係梁家豪反問:

 

你講乜撚呀?              01:16

 

柯志恒好快覆番佢:

 

我建議你哋都一齊以「自己生存到最後」為目標

唔好再諗住有人可以救到自己               01:17

 

簡單啲嚟講,佢即係想我哋開始互相攻擊?

 

聽日大家一齊番學校,解決咗件事佢             01:17

 

@6A-柯志恒 點樣解決?               01:18

 

@6A-陳嘉欣 唔好聽佢講,我同楊悅盈已經差唔多搵到解決方法              01:18

 

我咁樣講完之後,柯志恒終於都回應我:

 

不如大家諗番:

由第一日開始何晞賢同楊悅盈已經企圖Dominate咗成個遊戲走向

但係佢哋做過啲乜嘢?只係眼白白咁睇住其他人死                  01:18

 

梁家豪繼續狙擊佢:

 

都好過你條仆街吖!

又叫佢Send Message俾柒輝,又扮區家純叫人Quit Group!            01:19

 

柯志恒不徐不疾咁覆番:

 

我認我仆街

但係何晞賢佢兩個難道又唔係想成為最後兩個生還者?                   01:19

 

唔使再擔驚受怕,聽日大家再聚埋一齊

我有一個最公平嘅方法可以完結咗件事佢              01:20

 

陳嘉欣又再追問:

 

咩方法…?          01:20

 

柯志恒懶神秘咁答佢:

 

總之邊個贊成我講法嘅,聽日下晝一點番學校

邊個唔出現,我哋就用Message炸佢             01:20

 

或者你哋唔信我嘅話

可以今晚一齊炸我,悉隨專便               01:21

 

講完之後,柯志恒就無再出聲。

梁家豪似乎好不滿咁:

 

屌你老味,不如炸死條仆街算               01:21

 

——我哋得番幾個人,可以點炸?我無再喺個Group糾纏落去,淨係將頭先嗰啲對話Cap咗圖,喺Facebook Send俾賴智勇睇。

佢一直都On住Line,唔知係咪方便我哋隨時聯絡到佢:

 

Johnny Lai:

佢想搞乜嘢?              01:23

 

Hei Yin Ho:

我都想知…

我純粹通知你一下                01:23

 

Johnny Lai:

咁…你聽日會唔會番去?               01:24

 

無覆到賴智勇,因為我比較想知楊悅盈咩情況,行番去自己間房敲一敲門——

「你點樣?無嘢吖嘛?」

「噠」一聲,應該係楊悅盈喺入面開咗個鎖。

我開門入去,入面窗簾拉埋咗,咩燈都無開;透過個廳照入去嘅光線,我見到楊悅盈背對住我伏咗喺書枱度,佢部電話喺我枱面。

「你…有無睇到個Group?」我問佢。

佢坐番起身,依然背對住我,但係搖搖頭。

「…你頭先…點樣?」

佢無俾反應我,淨係拎起自己個電話睇番啲來電記錄;我知佢係諗住打俾Jessica。

留言

    未有留言

分享