已讀不回死全家!

第6章 - 6 Unread Messages

下晝六點十五分,我同允仔打住喊露行入校門。

我哋尋晚成晚無瞓,互Send Message Send咗一晚;經過今晚我哋先知道情況不妙。

對住學校大門嘅係一個獎盃櫃,裏面擺滿咗咁多年以嚟學校贏過嘅獎項;透過獎盃櫃後面嗰塊鏡,我望到我7同允仔兩個個樣殘到好似每人打咗十次飛機咁。

身為籃球隊主力嘅Billy同允仔,對個櫃入面嘅獎盃貢獻咗唔少,就連我家姐中學畢業之前都拎過學界田徑嘅獎,反而我…莫講話攞獎,就連課外活動我都好少參加。

一般嚟講我哋上課室嘅話係轉右行上四樓,樓梯旁邊有一部教職員專用電梯,平時禁止學生用,但係學生假期番嚟補課或者做嘢嗰陣搭電梯,啲老師通常都唔會理。

Billy、允仔同我正常嚟講,就算補課都唔會搭電梯,都係一路吹水一路行四層樓梯;之不過今日我同允仔好有默契咁一齊咗過去搭電梯。

「喂…不如真係試下唔睇唔覆…」允仔一行入電梯就挨咗埋牆,一路捽眼一路講。

我無答到佢,呢啲唔知會唔會死人嘅做法,我暫時仲未夠膽試住。我淨係拎咗個電話出嚟準備:20分鐘前允仔Send咗個Message俾我,我打算番到課室就覆佢。

其實無得瞓唔係最辛苦,暑假我哋成日都通宵打機打牌,一兩晚唔瞓根本唔算得係乜嘢,但係每半個鐘要睇一次電話覆Whatsapp,仲要唔可以Hea覆,嗰種壓力原來好難受。

去到四樓,電梯門打開,我哋就見到楊悅盈同鄧鐵雄一齊喺課室度行出嚟。楊悅盈同平時一樣木木獨獨,反而鄧鐵雄個款有啲鬼鼠。

我同允仔對佢哋兩個打招呼,但係佢兩個直行直過無理我哋。

「雕那星…使唔使咁串。」允仔專登用佢兩個聽到嘅音量講,我有啲唔好意思,擰轉身細細聲講咗聲Sorry,然後快手推住允仔走咗入課室。

Billy(實際上係楊悅盈,但其他同學唔知道)約大家六點半番嚟,所以當我行入課室見到已經有接近廿個同學番咗嚟嗰陣,我有啲意外。

雖然同尋日一樣,全部人都係各自一兩個或者三五成群咁坐埋一齊,但係好明顯彌漫住一種不安嘅氣氛。

Billy企咗喺老師枱度,罕有地完全無嘻皮笑臉,子筠坐喺第一排靠右嘅位,Billy示意我同允仔坐喺第一排正中、佢面前嗰兩個位。

允仔一坐低就伏喺枱瞓覺,而我覆完佢Whatsapp之後,就回頭望下啲同學。

課室靠前排同埋中間嘅位就坐咗尋日有番嚟嗰十幾個同學,除咗Elaine同埋啱啱出咗去嘅楊悅盈、鄧鐵雄之外,總共有十一人;睇嚟親眼睇住Elaine死嘅人都唔夠膽無視Group Admin講嘅嘢,所以暫時平安無事。

我見到佩珊同埋另外四個尋日無出現嘅同學,都零零散散坐咗喺呢堆人當中。

我稍為鬆咗一口氣,嘗試用眼神同佩珊打招呼。

當然,佢完全無留意到我。

最後排右邊角落本身係我個位,但係已經俾校工用尼龍布冚住咗我張枱,而且方圓幾枱都無同學夠膽坐過去;相反左邊角落就坐滿咗人——尋日無番嚟嘅一班MK,好似如臨大敵咁聚埋一齊。

我不嬲同佢哋呢班人無乜交集,但係明顯留意到佢哋人數少咗差唔多成半:平時有成八、九個嘅圍威喂嘅佢哋,而家只係得番五個人。我完全明白點解會有呢個情況:一向以為自己係最型最威嘅佢哋,對於已讀不回死全家嘅第一個反應一定係:戇鳩!

然後就會Quit Group。

我甚至相信剩低呢五個人都係因為有同伴Quit完Group爆頭死,先至知今次呢件事並唔係用「戇鳩」兩個字就可以敷衍過去。

靠走廊嗰排單獨位,得一個男同學坐咗喺度,心不在焉咁望住外面——佢就係全班考第一嘅柯志恒。

雖然佢平時份人無乜點樣,但係就硬係俾人一種高高在上嘅感覺,而我亦都會盡量避免同佢呢種人接觸。

仔細數一數,28人竟然番齊嚟;連考試都好少可咁齊人。

楊悅盈呢個時候啱啱好同鄧鐵雄行番入嚟,鄧鐵雄論論盡盡咁走入課室中間人群最密集嗰度坐低;楊悅盈就走到Billy身邊揚一揚手示意佢行開。

雖然Billy高佢成個頭,但係氣場完全俾佢壓咗落去,只好乖乖地走去子筠隔離坐低。

平時甚少參與我哋活動嘅楊悅盈,忽然間變到好似領袖咁,慢慢掃視一下全班每一個同學,再睇一睇鐘,然後先開始講嘢。

「大家,唔好意思,今日其實係我拜託吳啟鋒約你哋番嚟。」

全班即刻議論紛紛開始私底下傾計。

我雖然一早知道Billy係受楊悅盈所托先約人,但係諗起頭先佢同鄧鐵雄行出課室,所以下意識咁轉過去望一望鄧鐵雄。

佢同我眼神對上咗,然後好似有啲作賊心虛咁擰歪咗面。

「我有一個方法,短時間內可以令到大家100%生還。」

楊悅盈講呢句嘢嗰陣,全班馬上靜咗落嚟。

留言

    未有留言

分享