已讀不回死全家!

第58章 - 58 Unread Messages

我拎住屋企部手提入咗家姐房閂埋門;大個咗之後我好少會走入家姐房,但係呢度同我記憶中一樣仍然係咁亂,擺滿晒嘢。

撥開佢張床上面啲衫坐低咗之後,我用屋企部手提打番過去頭先個電話度。

「喂?」

「喂?你係唔係…賴…賴乜嘢話?」電話嘅另一邊係頭先嗰個女人。

「我叫何晞賢;你係楊悅盈屋企人?」我以為楊悅盈頭先同屋企講過佢今晚唔番去,所以佢屋企人打嚟問佢咩情況。

「原來就係你?Nice to meet you!」佢口吻好似知道我係邊個咁:「楊悅盈今日上過嚟我公司,我同佢見過面。」

我記得賴智勇講過佢哋今日上MTCC嘅事,所以…呢個女人應該就係Jessica?咁另一個問題又嚟…

「你就係Jessica?你知我係邊個?」

「我睇過你哋個Group。」佢好乞人憎咁笑咗一下:「已讀不回死全家;喺入面見過你個名,所以有啲印象。」

雖然賴智勇有提過呢個女人唔知點解對Admin嘅攻擊免疫;但係就算而家我親耳聽到佢講個Group名出嚟,都仲係有少少難以置信。

「你點解睇完個Group都無事?」純粹一問,我預咗佢唔會講:「有咩方法先可以唔會爆頭?」

「哥哥仔,第時大個你就知架喇!」講完呢句之後佢就自己喺度笑;我唔明個笑點喺邊,而且聽到佢把聲就有少少無名火起。

所以我無出聲。

「你頭先話楊悅盈喺你屋企?原來你先係佢男朋友?」笑完之後佢就好似下命令咁同我講:「俾我同楊悅盈講兩句。」

對住一個三唔識七嘅人我懶得解釋咁多。

「佢瞓咗。」

「我想聽下佢把聲,叫醒佢啦。」Jessica好似細路仔扭計咁,令到我有少少嘔心。

「有咩同我講得喇。」

「我有好消息同佢講,但係要佢幫我手;你而家唔摷醒佢我收線架喇。」

——好消息…今日聽佢哋提過,Jessica應承會幫我哋手。

「乜嘢好消息?」

「十。」

「呀?」

「九。」

仆你個街…條八婆喺度倒數。

「得喇得喇屌!」我忍唔住開始炆:「等陣!」

我無再聽佢把聲,急步走番過自己房閂埋門同埋開咗燈。

床上面嘅楊悅盈瞓得好稔,郁都無郁過。

「起身。」我坐喺床邊拍一拍佢膊頭;楊悅盈慢慢擘大眼,濛濛鬆鬆咁望住我,然後合番埋眼。

「Jessica搵你呀喂。」我捉住佢手臂搖咗兩下,再將個電話聽筒隊埋佢耳仔度,佢終於肯坐番起身。

「三。」我聽番個電話先知原來條八婆仲喺度數緊。

「咪數喇——」——屌——我忍住唔講呢隻字出口:「有咩同佢講啦。」

楊悅盈挨住床頭坐,用手背擦咗一下嘴角,然後開始捽眼。

「你唔好偷聽。」Jessica煞有介事咁警告我。

「得喇!」我大聲應咗佢一句之後就遞咗個電話俾楊悅盈,然後坐咗埋佢右手邊。

「喂?」楊悅盈把聲一聽就知佢仲未瞓醒。

——唔聽就笨柒。我縮低少少,貼埋去同佢一齊聽個電話,楊悅盈亦都好有默契咁靠埋嚟。

「妹妹仔,無阻你瞓覺吖嘛?」Jessica對佢唔知點解好似友善啲咁。

「阻呀…有咩事快啲講…」楊悅盈一邊捽住眼,一邊好唔客氣咁講。

「有方法將個AI System…即係你哋個Admin——Shut Down,但係我需要你本人幫我手。」

「幫你手?」

「幫我Gather晒你而家仲生存緊嘅同學,聽日上我公司;你可以叫埋偷聽緊嘅何晞賢幫手。」Jessica原來一早預咗我會偷聽?「Hello,何晞賢!」

我火咗一下,但係唔想衰俾佢睇,所以我扮唔喺度,唔出聲。

「點解要叫晒全班同學?」楊悅盈繼續問。

「越齊人就越好辦事,但係最緊要嘅係你一定要到。」

唔知佢哋嗰邊打緊咩主意,我有啲擔心咁望一望楊悅盈。

「點解要我?」

「我唔需要同你解釋。」Jessica頓一頓,再補充:「你唔知反而仲好。」

我皺一皺眉,諗起今日聽番楊悅盈喺佢哋公司經歷過嘅嘢,覺得可能係個伏。

「如果我唔嚟呢?」楊悅盈似乎同我有同一個Concern。

「無所謂。」Jessica冷笑一下:「如果你覺得憑你哋Handle到件事嘅話,你可以當我無搵過你。但係我都幾肯定你哋同我配合,可以減少好多犧牲者。」

我望過去見到楊悅盈表情似乎喺度考慮緊。

「你又唔使即刻答我嘅,總之你決定咗之後,打番呢個電話搵我。」Jessica好似有骨咁再講多一句:「妹妹仔,唔好諗住做英雄喇,乖乖地聽話啦。」

「我想你應承我一件事先,如果唔係我連考慮都慳番…」楊悅盈深呼吸咗一下:「你要——」

「保證你其他同學無事?」Jessica講完之後哈哈大笑,好似恥笑緊楊悅盈俾佢睇穿咗咁樣:「無問題,只要大家合作,我用自己條命Guarantee你哋一個都唔會死。」

「你頭先話AI System…即係代表Admin就等如電腦化咗嘅羅彥輝?」

「Not exactly,但你即管當係啦。」然後佢好似想盡快完咗個對話咁:「你有咩決定隨時打俾我,早啲休息下啦。」

無等楊悅盈有咩回應,Jessica就收咗線。

楊梲盈放低部電話望過嚟,好似想同我商量咁;我無理到佢,馬上起身行番出廳。

雖然而家距離我放低啲電話仲未夠半個鐘,家姐亦都無嗌過我話有收到Message,但係我都係要自己親手Check一次先安樂。

家姐仍然挨住梳化喺度上緊Facebook;一睇原來我自己部電話收到一個Whatsapp,反而楊悅盈同賴智勇兩個都無。

我心都離一離即刻坐喺梳化打開個Message睇:

 

何晞賢,知道你一直在挺身而出的惡果嗎?

現在同學有甚麼麻煩,都第一時間只想到找你來解決(笑)           23:55

 

——仆街何晞媛…我心入面鬧咗句之後,開始覆番Admin:

 

你要針對我就直接啲

唔好賴其他同學          00:06

 

真的啊

鄭綽婷想都沒想就選擇你了                   00:07

我都沒時間好好與她聊天

要不你把我轉回去?            00:08

 

我比較想同楊悅盈傾下頭先Jessica講嘅嘢,所以暫時唔覆住,放番低啲電話企起身。

「喂何晞媛如果我響電話你叫我呀!」大大聲提醒多佢一次之後就走番入房。

一入去就見到楊悅盈似乎已經無乜睡意,而家又好似啱啱番嚟嗰陣咁坐喺床頭、雙手抱住自己膝頭。

「你…會唔會聽嗰個女人講?」我問佢。

「我想試下自己方法搞掂件事先…」佢細細聲答番我。

「你又想自己去死?然後叫我害死埋賴智勇?」我一聽到就忍唔住發佢晦氣。

楊悅盈搖搖頭。

「咁唔係你…仲有咩諗法?」

「我想同Admin直接Whatsapp…有無方法可以叫人將佢轉過嚟我度?」

「放心…而家Admin個對話喺我度。」我無解釋咁多。

包括頭先Admin講嘅嘢,所謂嘅「第二輪」,甚至…甚至我對自己唔小心害死咗周Sir呢個疑慮,全部都無講出口。

周Sir嗰件事…我唔係想隱瞞或者乜嘢,只係…唔想楊悅盈諗多樣嘢住…

真係…我唔係想隱瞞…

楊悅盈聽到我咁講,伸咗個懶腰之後爬去床尾拎起咗家姐放喺度啲舊衫。

「借俾我得唔得…我想沖個涼先。」佢將啲衫放喺自己膝頭上面,坐喺床尾指示我:「你一陣將Admin轉過嚟俾我。」

「轉俾你OK…但你想做乜嘢?」

「同佢傾計…」楊悅盈拎住啲衫行咗出房外面,指住其中一道門問我:「廁所?」

我跟咗出去,點點頭。

「同佢傾計…之後呢?」

「用愛感化佢…?唔知得唔得呢?」楊悅盈講完就砰一聲閂埋咗廁所門。

無幾耐入面就傳嚟一陣花灑水聲。

留言

    未有留言

分享