已讀不回死全家!

第56章 - 56 Unread Messages

我望住Admin個Message,又再諗下陳佩珊個SMS。

 

咁而家SMS俾我嗰個係咩人嚟?          22:59

 

雖然我咁問,但係其實Admin之前無呃過我,至少據我所知就係。

就算撇開呢一點嚟講,淨係個SMS嘅寫法已經同Facebook Messenger入面嘅陳佩珊好唔同,所以我幾肯定Send俾我嗰個一定唔係陳佩珊本人。

既然係咁…即係陳佩珊真係死咗…?

我內心一沉,同時估到Send SMS俾我嗰個九成係周Sir,只不過我唔知佢有咩用意。

我用楊悅盈部電話試打俾周Sir,但係唔通。

雖然好想知發生咗咩事,想知道陳佩珊係咪真係有啲咩不測…但係我決定唔理佢,留喺屋企應付Admin。

 

如果你不相信我的話

就Whatsapp她吧(笑)               22:59

 

「陳佩珊」見我無覆,又Send多咗個SMS過嚟:

 

2017年8月30日週三

周Sir好像有點不妥,我很害怕             23:00

 

——兩個都好煩…我開始諗要將Admin彈俾邊個。

照頭先情況睇,柯志恒同埋周Sir一定會好快將佢轉番過嚟;而其他同學…呢幾日我無了解過其他人咩情況,我唔知佢哋而家嘅精神受唔受得住。

 

咪撚煩,你轉去洪諾言度              23:03

 

單獨聊天就是為了認識你們

你叫我找個死人有甚麼意思?(笑)             23:03

 

——唔可以轉去死人度…我心存僥倖咁試下:

 

咁轉去陳佩珊度          23:04

 

回覆同上             23:04

 

「仆街…」我忍唔住細細聲鬧咗一句。

「做乜?又俾啲補習Group拉咗入去?」家姐聽到,見我對住個電話講,所以問咗我一句。

我無理到佢,淨係覆番Admin:

 

咁你去搵周Sir             23:05

 

沒想到你是這麼毒辣的人(笑)

我看到你都開始有點害怕了!               23:06

 

——佢講乜?

我做定心理準備,周Sir會喺十分鐘之內將Admin轉番過嚟或者再扮「陳佩珊」SMS我——更甚者可能兩樣一齊做。

唔係好明,點解周Sir要針對我?唔通因為我今日摑咗佢一下?

但係又做乜要用SMS?

諗緊嘢嗰陣,又收到一個SMS…

 

2017年8月30日週三

我還在周Sir家裏                  23:07

 

「做乜成晚電話係咁響?」家姐聽到我部機不停咁收到Message,忍唔住問我。

「呃…班會有嘢傾…」我求其噏:「傾啲準備開學嘅嘢…」

去到呢啲情況,我無辦法唔諗起柯志恒:除非柯志恒有搵過周Sir,對佢講咗同一番說話:「要令到佢兩個成為最後生還者」;只不過我唔覺得周Sir會接受…

 

2017年8月30日週三

過來接我可以嗎?                23:09

 

Admin話陳佩珊係周Sir殺,佢會唔會係諗住…自己親手將我哋逐個殺死?

允仔都做過啲類似嘅事。

即係周Sir而家扮陳佩珊引我出嚟,其實係想…

 

2017年8月30日週三

你現在來可以嗎?                23:13

 

怯咗一怯,同時又覺得好彩自己發現得早。

 

2017年8月30日週三

唔得           23:14

 

Admin已經無再搵我;我而家淨係希望周Sir快啲放棄。

拎住部電話,我呆望住家姐個背影——直到我又收到一個Whatsapp。

開番部電話——Admin喺已讀不回死全家Send咗個Message出嚟:

 

對各位的第一輪指導了解已經完成

接觸到幾位很堅強的同學,他們都生存下來了

我很高興             23:25

 

幾位同學…應該就係指我、柯志恒同埋楊悅盈…?

柯志恒反應好快咁問咗個問題:

 

乜嘢叫「第一輪完成」?              23:26

 

就是字面的意思(笑)

第二輪我會重新隨機抽選你們一位作開始

敬請期待!                  23:27

 

重新隨機抽選…

心血來潮,再打一次電話俾周Sir,仍然係唔通。

我忽然間寒一寒,直覺覺得自己做錯咗咩事咁,但係又講唔出係乜嘢…

留言

    未有留言

分享