已讀不回死全家!

第55章 - 55 Unread Messages

楊悅盈成個人挨咗落我左邊身,一直都無講嘢,隔咗一陣我開始有啲尷尬——記憶中除咗何晞媛細個嗰陣,從來都未試過有女仔挨住我膊頭咁耐。

唔知道佢係仲喊緊、諗緊嘢定係點樣,總之我有啲緊張,心跳加速。

好似過咗好耐,我終於冷靜番少少,先至感覺到佢呼吸好慢好柔和;我喺自己同楊悅盈中間小心摸索,摸到佢隻手之後就拎咗部電話,襟開個Mon照一照。

楊悅盈合埋咗眼,瞓得好稔,兩行眼淚已經乾咗。

電話上面個時間係22:15,原來只係過咗半個鐘多啲。

我將部機放咗喺自己旁邊,再伸手去楊悅盈嘅左邊拉番開啲窗簾,等隔離橦大廈同埋街燈嗰啲微弱嘅淡黃光照入嚟我間房度。

左手穿去楊悅盈背後,我用力抱起咗佢——佢比我想像中輕好多——幫佢瞓喺我張床同埋枕頭上面,同佢冚好被之後,我就拎番佢、賴智勇同埋我部電話行番出廳。

我先將三部電話放咗喺飯枱,再入父母睡房拎咗個枕頭同張被出嚟,放咗喺梳化度;仲喺廳用緊電腦嘅家姐一面疑惑咁望住我呢一連串舉動。

「俾女朋友趕咗出嚟?」佢細細聲,煞有介事咁問我。

我懶得再同佢講,拎番三部電話之後就行番去佢面前。

「玩電腦番入房吖…我想喺梳化度攤下…」

家姐將部電腦擺落地,自己坐喺地下挨住梳化,讓個位俾我,仍然用嘅好關心嘅眼神望住我;我放好個枕頭之後就瞓咗上張梳化度,三部電話擺喺枕頭邊。

「做錯咩事?」佢好鍥而不捨咁問…好煩…我決定唔再解釋。

「算啦…唔好提喇。」我伸咗個懶腰:「你聽日自己問佢。」

我本身以為自己默認咗,由佢誤會楊悅盈係我女朋友,佢就唔會再煩我;點知聽到我咁答之後,何晞媛即刻好似執到金咁笑咗出嚟,然後轉身伏喺梳化邊繼續講。

「係咪你同學嚟?佢叫咩名呀?」唔知應該話佢關心我定八卦好:「一齊咗幾耐?」

「佢叫楊悅盈,同我同一班…其他嘢…遲啲再講啦,我眼瞓。」我其實無乜睡意,淨係想佢收聲。

「仆街仔…」家姐輕輕力打咗我塊面一下:「人哋係咪知你唔開心,專登上嚟陪你…?佢…都應該識張允行?」

——允仔…

「喂,你有無衫可以借俾楊悅盈?」我唔想同家姐喺呢個話題上再講落去,所以扯開咗個話題:「我驚佢聽朝瞓醒,想沖個涼換件衫…」

「衫呀…?」家姐企番起身,一路諗一路行番入房,我先終於有一刻安寧。

然後我留意到家姐放喺地下部Notebook,佢仲開住個Facebook,睇緊啲唔知講乜嘢都市傳說嘅片。

拎咗佢部電腦上嚟,喺Search Bar度打咗Nick Cheung——允仔個Facebook——發現原來允仔一段時間之前Send咗Friend Request俾家姐,但係家姐無Accept佢。

我趁家姐未出番嚟,就幫佢Accept咗,然後打開個Messenger:

 

Charlotte Hohw:

Sorry…如果我早啲發現到就好                22:26

 

如果何晞媛發現我用佢Facebook Accept人——一個死咗嘅人——啲Friend Request,佢一定會屌柒我。

但係我好想幫允仔呢個忙。

雖然微不足道,而且於事無補…

我瞓咗喺梳化,想放空自己個腦,但係不斷咁諗番起以前同Billy、允仔一齊玩嘅一啲片段…

「我啲衫佢未必啱著喎,佢咁細粒。」家姐把聲喺房入面傳出嚟,將我拉番入現實。

——求撚其啦…我心入面講,同時歎咗啖氣。

「唔緊要啦,咁由得佢。」

我講完呢句之後拎起咗啲電話Check一Check,見到楊悅盈兩分鐘前收到個Facebook Message;係陳佩珊Send俾佢嘅。

醒起佢仲喺周Sir屋企,我無乜心情睇陳佩珊個Message,所以我用自己個電話覆:

 

Hei Yin Ho:

楊悅盈部電話喺我度

佢瞓咗喇,有咩事聽日再搵佢啦           22:36

 

反正佢都唔會覆我,我Send完個Message出去之後——

 

Rita Chan Pui Shan:

頭先Admin Whatsapp緊周Sir…

佢話可以將個對話轉俾其他人,係咪真架?          22:36

 

——為咗周Sir佢竟然秒回我;我諗咗一諗,苦笑住覆咗佢:

 

Hei Yin Ho:

係呀           22:38

 

Rita Chan Pui Shan:

而家楊悅盈仲同你一齊?              22:39

 

我好唔爭氣咁,為咗唔想佢誤會而講咗個大話:

 

Hei Yin Ho:

唔係,各自番咗屋企            22:39

 

Rita Chan Pui Shan:

我見佢走嗰陣面色唔係咁好…

佢無乜事吖嘛?          22:41

 

「我放咗喺你床上面。」家姐同我講,我點點頭。

然後佢坐番喺梳化隔離地下,拎番起部電腦嚟用,似乎無發現我用佢Facebook Add咗允仔。

 

Hei Yin Ho:

無事,唔使擔心          22:42

 

Rita Chan Pui Shan:

今日周Sir全日都好似好唔妥咁…

我有啲擔心佢              22:43

 

——仆街…周Sir點樣唔關我事…

 

Hei Yin Ho:

哦               22:43

 

Rita Chan Pui Shan:

多謝你…嗰日如果唔係你

我已經Send咗Message俾羅彥輝                   22:45

 

Hei Yin Ho:

唔使客氣             22:45

 

陳佩珊好似(對我)有魔力咁,一方面我唔係太想同佢再Chat,另一方面又停唔到手…

 

Hei Yin Ho:

你介唔介意我問下你…

你點解會同周Sir一齊?                22:47

 

問完之後,本身見佢輸入中…但係好快就停低咗,然後Messenger就無任何動靜。

算。

已經習慣咗佢唔覆我Messenger…老實講其實我而家都唔稀罕佢覆我。

「喂…你瞓未架?」我一邊將三部電話個聲校到最大,一邊問家姐。

佢搖搖頭。

「如果一陣電話響又嘈我唔醒,你即刻摷醒我。」我諗住閉目養神,不過要提防唔小心瞓著:「如果你要瞓,都同我講聲先。」

「嗯。」佢好順攤咁應我。

「記住叫我呀。」我強調多一次。

「得喇。」

我合埋咗眼,但係隔咗幾分鐘就聽到電話收到Whatsapp嘅聲。

 

何晞賢,我們又碰上了!              22:54

 

…Admin?周Sir咁快就將佢轉咗俾我…

有啲無名火起,我答完陳佩珊條八婆問題佢就唔理我不特止,仲一個屈尾十叫周Sir彈番Admin過嚟…

我忍唔住對Admin洩忿:

 

食屎啦你,仆街冚家剷        22:55

 

比起最初驚到喺Group入面都唔敢問Admin問題,而家有啲麻木嘅我覺得有個任鬧唔嬲嘅AI俾我發洩,都唔差…

 

何同學,無意義的謾罵是解決不了問題的!

相比這個,我告訴你一個重要情報吧?                  22:56

 

唔撚想知呀,屌你老母                  22:56

 

然後我電話彈咗個Notification出嚟,收到一條SMS…!

自出娘胎除咗用嚟收啲App或者網站註冊驗證碼之外,我差唔多無用過SMS;襟咗過去睇,竟然係陳佩珊Send俾我嘅?

 

2017年8月30日週三

想見你,可以出來嗎?                  22:55

 

有啲疑惑嗰陣,Admin又再Send咗個Whatsapp俾我:

 

何同學,我重申,無意義的謾罵終歸是無意義的

不過,怎樣也好

因為周世文老師剛剛在家裏殺死了你女神陳佩珊            22:57

 

(笑)                22:57

留言

    未有留言

分享