已讀不回死全家！

楊悅盈挨住何晞賢，忍唔住自己啲眼淚。

佢知道只要自己同賴智勇而家死咗，件事就會完結，但係佢落唔到手。

無勇氣害死賴智勇，更加無勇氣死；楊悅盈甚至乎覺得，如果頭先佢因為區家純個Message而俾Admin爆頭，對佢嚟講可能仲好。

手上面部電話忽然間震咗一震。

楊悅盈用手抹一抹啲眼淚，開番個電話嚟睇；Admin Send咗個Message俾自己：

 

想清楚了嗎？（笑）            21:32

 

何晞賢喺隔離同楊悅盈一齊睇到呢個Message；佢皺一皺眉，伸手拎走咗部電話，睇番之前楊悅盈同Admin嘅對話。

楊悅盈坐番直，雙手抱住自己膝頭，回憶番Admin同自己講過嘅嘢。

頭先佢喺周Sir屋企睇緊羅彥輝電話、開始懷疑自己就係關鍵人物嗰陣，Admin竟然Whatsapp自己。

從佢口中知道可以將佢Send Message對象轉移俾其他人嗰陣，楊悅盈就一直好想知究竟係邊個交個波俾自己，但係嗰陣當務之急，佢問咗啲有關規則嘅問題，Admin好合作咁答咗佢。

但係之後Admin同佢講咗一樣嘢：

 

你們都想等那個女人幫忙解決這件事對嗎？

有沒有想過我可以在規則上加入時間限制呢？（笑）

 

——時間限制？楊悅盈反問。

 

例如：「12小時內未能達成勝利條件，6A班全員死亡」？（笑）

那麼你清楚自己的處境嗎？

 

……

 

你敢犧牲自己救回其他同學嗎？

還是會設法成為最後兩人呢？

 

——我…

楊悅盈唔知道。

——唔會俾你得逞；收皮啦你。

雖然佢咁樣覆；雖然佢一直都諗盡辦法，唔想成為全班最後只係剩低兩個人嘅局面，但係如果佢要死…

楊悅盈發覺自己好驚…

因為以前嘅經歷，楊悅盈覺得無論發生咩事都好，只要自己有能力就要幫其他人脫離困境。

不過如果切切實實要用自己條命嚟交換嘅話…

「唔好理佢…」何晞賢交番部電話俾楊悅盈：「條友只係想擾亂我哋，等我哋繼續互相殘殺…」

何晞賢爬開咗，然後拎番自己部電話過嚟俾楊悅盈睇。

「佢頭先同我講，陳佩珊同周Sir有路…」佢開咗自己同Admin嘅Chat History俾楊悅盈睇：「佢想激嬲我等我對周Sir或者陳佩珊出手…但係如果我咁做，我會過唔到自己嗰關…」

楊悅盈抬起頭望向何晞賢。

「所以，就算你講嘅嘢無錯…就當你同賴智勇真係剩低嘅兩個關鍵人物…」何晞賢伸手抹一抹楊悅盈面上啲淚痕：「…我都唔會俾你哋有事；你唔好再亂諗嘢。」

跟住何晞賢就幫佢覆咗Admin：

 

諗得好清楚

楊悅盈唔會犧牲，我哋亦都唔會俾其他人再死                21:38

 

Send咗出去之後，何晞賢對住部電話個前鏡頭舉咗一下中指。

「彈佢走，唔好俾佢再影響你。」交番部電話俾楊悅盈嗰陣，何晞賢講咗句。

「…轉俾邊個？」

何晞賢無答到。

「柯志恒？」楊悅盈問——第一個諗起嘅人就係佢。

「呃…」何晞賢好似有啲唔好意思咁：「其實Admin一開始係搵我，然後我就係彈咗俾柯志恒…」

「嗯？」

「跟住——如果我無估錯——轉俾你嘅人就係柯志恒…」何晞賢望住楊悅盈講：「就算轉番俾佢，我覺得佢一樣會針對你，好快叫Admin搵番你。」

「周Sir？」楊悅盈再講另一個人選——佢第二個諗起嘅人：「佢同陳佩珊一齊…應該唔會有事？」

何晞賢聳一聳肩，好似無意見。

或者佢只係唔想再諗咁多——同而家嘅楊悅盈一樣。

所以楊悅盈就趁Admin未再覆佢之前Send多個Message過去：

 

唔好再搵我，你有咩就同周Sir講                   21:41

 

純粹係心理作用——佢自己係關鍵人物、Admin嘅目標呢樣嘢無改變過——不過楊悅盈覺得稍為鬆咗一口氣。

「係呢…其實我想問你。」何晞賢望住佢Send出去呢個Message，若有所思咁講：「你係點發現…周Sir同陳佩珊嘅關係…？」

楊悅盈唔想再講嘢；佢搖搖頭，跟住就挨番落何晞賢膊頭度。

合埋眼諗住休息一陣…

無幾耐，楊悅盈就瞓著咗…