已讀不回死全家!

第51章 - 51 Unread Messages

19:45。

仲有一分鐘。

楊悅盈無再望過我,無再同我講嘢。

我雖然覺得楊悅盈會無事,但係…唔怕一萬…

轉身諗住出番去。

「唔好走…」楊悅盈叫住咗我。

我回頭望住佢諗咗一諗,行番去佢面前,半跪喺地下。

「無事,唔使驚。」我將兩部電話放喺佢旁邊,捉住咗佢隻手,感覺到佢有啲震。

「記住。」楊悅盈望住賴智勇部電話同我講。

我無任何表示,淨係捉住楊悅盈,然後同佢一齊望住賴智勇部機。

19:46。

無事發生。

我鬆咗一口氣,微笑望向楊悅盈——

——但係佢面色一沉,好失望咁嘅樣。

佢歎咗一口氣,甩開我隻手,捽咗下眼。

我拎番自己部電話,打開已讀不回死全家個Group講:

 

「楊悅盈無事,大家唔好覆區家純個Message

柯志恒條仆街想借呢個機會殺死你哋」               19:46

 

然後我影低楊悅盈,Send咗出去之後,我打字補多咗一句:

 

邊個無事嘅…

唔該,真係同我報一報數…           19:46

 

打完之後,我覺得全身無晒力,所以坐咗落地下;楊悅盈拎起自己同羅彥輝部電話,一面陰沉咁企起身行過去打開房門。

「走喇…我唔想再留喺度…」講完呢句佢就出番去。

床上面淨番賴智勇部機,我又再開始思考點解楊悅盈會叫我幫賴智勇Quit Group…

頭先閃過嘅嗰個諗法又再出現;我搖搖頭、用力眨咗幾下眼,想揮走嗰個諗法——

到我出番廳嗰陣,楊悅盈同賴智勇已經喺度執緊嘢;周Sir繼續頹坐喺梳化,陳佩珊喺隔離有少少唔知點好咁嘅狀態。

你知道周世文老師和陳佩珊每晚都在這裏幹點甚麼嗎?

諗起Admin呢句嘢,我又開始有少少煩燥。

「楊悅盈話走喎…一齊?」賴智勇對住啱啱行番出嚟嘅我問;我點點頭。

陳佩珊望一望周Sir,又再望下我哋,好似喺度猶豫係咪要跟埋我哋走咁。

「你留低啦,唔使一陣落街打個轉又上番嚟。」楊悅盈不留情面咁講咗句,陳佩珊即刻臉紅,一面尷尬樣。

「吓?」賴智勇想問咩事,但係俾我制止咗;我唔知點解楊悅盈會知,係Admin同佢講?

楊悅盈咩都無講就打開門走咗,賴智勇同我向周Sir講咗聲拜拜——我再向陳佩珊投以一個厭惡嘅眼神——之後就跟咗出門口。

楊悅盈成身好似散發住一層負能量咁,搭電梯落去嗰陣我同賴智勇都唔敢出聲,只係一直望下對方,或者抬頭望下個錶板。

終於落到地下,楊悅盈喺我哋前面,我同賴智勇好似做錯事咁粒聲唔出跟住佢,直到行番過去車站嗰陣賴智勇先醒起啲嘢。

「呀,何晞賢…」佢同我講:「我個電話——」

「電話俾何晞賢Keep。」楊悅盈無回頭咁對我哋講;賴智勇聳一聳肩,無再問我拎電話。

我睇番個Group,報數嘅人——計埋賴智勇同陳佩珊——得5個;加埋無報數嘅我、楊悅盈同周Sir…

…仲有柯志恒,我幾乎可以肯定佢未死…

即係我哋全班得番8個同學,一個阿Sir。

一直無出過聲嘅楊悅盈帶住我哋行咗去的士站。

「我番廣源邨…你哋呢?」賴智勇上車之前問我哋。

「我…第一城。」講完之後我問楊悅盈:「你去瀝源?」

「我跟你番屋企。」佢終於望番住我,答咗一句,跟住就開門上咗車。

賴智勇聽到,用個有嘅曖昧嘅眼神望我同楊悅盈;我有啲無辜、又有啲驚訝,唔知講乜嘢好。佢對我揚一揚眉,然後自己坐咗喺的士前座。

我惟有坐後座楊悅盈隔離。

「師傅唔該…先去沙田第一城,然後再上廣源邨。」賴智勇一路纜安全帶一路講;司機未等我哋坐穩就開咗車。

——跟我番屋企…如果唔係而家咁嘅情況,有女仔主動咁樣同我講,我一定會好興奮,然後諗多兩諗之後淆底、再拒絕,但係而家…

楊悅盈托頭望住外面街景,好似唔打算同我解釋啲咩咁。

賴智勇似乎誤會咗我同楊悅盈有咩關係,因為佢專登擰轉面睄咗我哋兩個一眼,然後對住我伸一伸脷。

…仆街仔。

 

***

 

我同楊悅盈落車,賴智勇對住我哋揮手道別。

「你…認真?真係去我屋企?」等到架的士駛走咗,我就對企喺我隔離嘅楊悅盈講咗句。

佢抬起頭,側側地咁望住我,唔答我問題。

而家過咗放工時間無幾耐,係最多人番屋企食飯嘅時間,有啲行過嘅人會望一望企喺路邊唔郁嘅我同楊悅盈;喺佢哋眼中,唔知睇唔睇得出我哋而家經歷緊啲乜嘢?

無辦法之下,我當楊悅盈默認咗,於是帶住佢慢慢行到去我住嗰座嘅門口,看更認得我所以開咗門。

雖然平時無傾過計,但係因為見慣見熟,所以我對住佢點頭打個招呼;反而楊悅盈直行直過好似當人哋無到咁。

大堂除咗我哋兩個,仲有一男一女,似係啱啱放工,兩個都喺度玩緊電話等電梯。到我嗰層嘅嗰部電梯無人搭,所以我同楊悅盈入咗去。

「你捨得講嘢未?」入咗電梯、襟完層數之後,我終於對一路唔出聲嘅楊悅盈有啲唔耐煩。

但係佢仍然只係搖搖頭。

「屌…」電梯門一打開,我氣沖沖咁出咗去行番屋企門口,聽到身後面有腳步聲:楊悅盈急步跟喺我後面。

鐵閘無鎖,我直接打開咗之後再用鎖匙開木門,俾楊悅盈入咗屋之後,我就閂埋、鎖咗道門。

佢喺門口除咗鞋之後行入廳,同坐喺梳化對住部電腦嘅何晞媛打咗個照面——家姐本身表情有啲愕然,但係好快就變咗一個好甜嘅微笑,同楊悅盈打咗聲招呼。

楊悅盈好似見到見唔到佢咁,直接行向睡房嗰邊,打開咗其中一間——

「隔離房呀!」我見佢爭啲入咗家姐間房,所以大聲講咗句;於是佢閂番家姐道房門,入咗我房。

然後就閂埋咗門。

楊悅盈個反應搞到家姐呆咗一呆,我入廚房拎咗罐汽水「嗞」一聲打開咗,然後就出番去坐咗喺家姐隔離;因為忽然間好想同佢傾下計。

「女朋友?」家姐將自己大脾上面部電腦放埋一邊,然後挨埋嚟好熱情咁問我。

「痴撚線…」

我望一望個電腦Mon,見佢喺度上Facebook亂Hea緊。

「幾Cute喎,同學嚟?叫咩名?」佢唔理我反應繼續追問:「唔怪得你近排奇奇怪怪咁…鬧交?」

「唔係呀仆街…」我飲一啖汽水之後,不忘警告何晞媛一句:「聽日阿爸阿媽番嚟,你唔好同佢哋亂講嘢呀…」

「得!」佢用兩隻食指喺嘴前面打咗個交叉:「我等你自己介紹佢。」

「唔好再講呢個話題住。」開始有啲後悔坐低咗:「其實我想問你一個問題…」

「嗯?」

「如果…如果你懷疑犧牲自己可以救番啲同學…朋友…你會點做?」

「吓?」家姐皺起眉頭,唔知係覺得我個問題怪定思考緊:「睇情況啦…」

——情況…情況就係我唔可以同你講係咩情況…有口難言…令到本身已經有啲心煩嘅我又開始燥。

「做咩呀?激嬲女朋友,佢要你犧牲自己?」家姐講呢句嗰陣有少少恥笑我咁嘅表情。

「屌…語無輪次…」我見佢嚟嚟去去淨係想環繞「女朋友」呢個話題,所以唔想再同佢講嘢,企起身準備番入房;家姐好想八卦下,所以跟住我尾。

打開房門,入面拉埋咗窗簾、無開燈,我淨係靠廳照入嚟嘅少少光線見到自己張床同埋書枱;我伸手向門側邊道牆上面打算開燈。

「唔好開燈。」楊悅盈把聲喺房入面傳出嚟;我決定睬佢都傻,襟燈掣開咗燈。

淡黃色嘅燈光突然出現,楊悅盈瞇起眼,用右手擋喺前面;我見佢抱住膝坐咗喺我張床上面,縮咗喺最入嗰個角落頭度。

家姐好兀突咁開始自我介紹。

「Hello!我叫阿媛,係何晞賢——」

「Sorry…無人想知,俾我哋抖抖先…」我打斷咗家姐句嘢,用手按住佢膊頭唔俾佢郁,自己行咗入房之後就喺佢面前鎖埋咗門。

「熄燈…」楊悅盈好似哀求緊我咁,我淨係拉咗書枱張櫈出嚟坐低。

「熄咗佢…唔該…我諗唔到嘢…」雙眼習慣咗光線,佢開始無用手擋住啲光,但係仍然好堅持叫我熄燈。

「你話咗俾我聽你諗緊乜先。」我面向住佢翹起雙手,乘機咁同佢講:「點解要叫我幫賴智勇Quit Group?你又做乜無端端十問九唔應?」

楊悅盈隨手唔知喺邊度拎咗羅彥輝部電話出嚟,丟過我呢邊。

「你重新睇一次佢啲Whatsapp記錄…再諗下Admin講過啲乜嘢…你就會知佢Target嗰四個人——關鍵人物——其實係邊四個。」

楊悅盈繼續雙手抱膝坐喺我床頭,但我發覺佢對眼開始有啲變紅。

留言

    未有留言

分享