已讀不回死全家!

第49章 - 49 Unread Messages

柯志恒係屋企獨仔,唔係好有錢,但至少係個生活無憂嘅小康之家。

柯生雖然讀書唔多,但係有啲小聰明,憑住自己開公司做生意,好耐之前已經買車買樓,所以柯志恒無乜點捱過苦。

可能係遺傳自爸爸,柯志恒都算係一個醒目仔,呢一點由佢讀書方面可以體現到:由小學開始,每一次測驗考試,佢都一定名列前茅,而喺學校亦都好乖,柯生柯太一直都對呢個仔好自豪。

無論柯志恒想要乜嘢,書、玩具、遊戲機,佢父母都會滿足佢:獨生子可以得到父母100%嘅愛,呢一點從柯志恒身上可以睇得出。

由細到大,佢都係乜嘢都有——除咗朋友之外。

當然,其實佢並唔想同任何人做朋友,因為對佢嚟講所有同齡嘅人都係白痴;佢同啲大過自己嘅長輩相處得仲好過同學。

喺佢成長期間,人哋顧住打機、溝女嗰陣,佢就喺度睇書;到最後,個個擔心緊考試合唔合格嘅時候,柯志恒關心嘅只係今次會考第一定考第二。

考第幾對佢嚟講好重要——其中一個原因,係柯生由細到大都同自己講:「讀好啲書,大個先可以出人頭地。」

但係最重要嘅原因係:佢唔想衰俾任何人,佢無可能會衰俾任何人;其他人充其量只夠資格做自己棋子、幫自己手。

所以,已讀不回死全家發生嗰陣,柯志恒好開心——佢覺得自己對住一班低能嘅同學,根本有辦法主宰咗呢個遊戲。

事實上,佢靠一個大話——「我知道呢個遊戲有咩漏洞,可以幫你生存到最尾,我哋就係最後嗰兩個倖存者」——就令到區家純對自己言聽計從。

聽話到叫佢Send Whatsapp整死自己好朋友Karman都肯。

呢一點令到柯志恒都有啲意外:最初揀佢,只係因為佢哋住同一橦大廈,方便交收電話,但係估唔到呢條女原來咩都做得出;而家咁睇似乎自己無揀錯。

仲有…吳啟鋒呢個成日扮大佬嘅仆街…俾自己講兩句,沖昏頭腦,竟然真係死咗。

只不過——柯志恒襟一下Whatsapp,將楊悅盈頭先段語音再Play一次出嚟:

 

「唔好再Quit…區家純部電話喺柯志恒度…

頭先如果邊個收到區家純Message唔好覆…」

 

——點解硬係要同我作對?你哋只係一班垃圾…

吳啟鋒死咗之後,何晞賢同楊悅盈就一直好似針對自己咁;令到柯志恒最嬲嘅一點係,佢哋兩個好似硬係知道自己想點做咁。

何晞賢還好,至少佢一直表現都唔差;柯志恒甚至想撇甩區家純叫何晞賢同自己Team Up。

但係楊悅盈喺班入面一直都只係個讀書唔叻嘅死毒女…而家下下俾佢食住,個感覺好差…

隨手將區家純部電話掟埋書枱一邊——反正條傻西都死咗——柯志恒攤落床開始諗之後應該點。

關鍵人物——正如佢估計——根本就唔係大家一直認為嘅嗰幾個欺凌者。

柯志恒無頭緒、亦都唔打算向呢個方向諗。由第一日開始佢一直都只係Aim At自己成為最後倖存嗰個,咁樣就算唔好彩原來自己係關鍵人物,佢都可以生存落去。

佢合埋眼數一數:計埋周Sir淨番15人,啱啱有四個人Quit咗,即係仲有11人淨低…如果好彩嘅話再Quit多幾個就好,最好楊悅盈條仆街都死埋。

——無錯,最後淨係邊個都好,楊悅盈條仆街一定要死…

望一望枱上面區家純部電話:唔知繼續用呢部機Send Message引人覆得唔得呢?

 

「叮噹叮噹叮噹叮噹叮噹叮噹。」

 

屋企門鐘不斷咁響,唔知邊個喺度係咁襟。

「嘖…」柯志恒有啲不滿;佢最憎人喺自己諗緊嘢嗰陣打斷佢。

行出廳嗰陣佢發覺自己思緒有啲亂,最衰都係門鐘聲;呢個時間應該係阿媽番嚟,但係唔記得帶——

一打開門,區家純就衝咗入嚟鍊住柯志恒條頸。

「仆街!俾番部電話我!」區家純雙眼通紅咁大叫,好似癲咗咁。

柯志恒呆咗:點解…?

「我部機呢?」

柯志恒開始抖唔到氣,咁先回過神來,用力拉開咗區家純雙手。

「咳!痴…痴撚線!」柯志恒後退咗幾步拉開個距離;姑勿論區家純點解未死都好,都唔想俾番部電話佢。

點知區家純一走就走咗入柯志恒房入面。

「喂!」柯志恒阻止都嚟唔切:部電話就擺喺枱面,只要佢一入去——

「嘭!」一下汽球爆炸咁嘅聲。

「咚。」然後係有人跌落地嘅聲。

柯志恒心知肚明呢兩下聲係乜嘢意思,而且佢見到血開始由房入面、經過門廊慢慢流緊出嚟。

閂番埋屋企度門,跟住跨過啲血小心翼翼咁行入房。

一如所料,房入面好似俾人淋過紅油咁,區家純背靠牆坐喺地下——應該係間房太細,佢倒地嗰時坐咗落去,右手拎住自己部電話,個頭已經無咗。

——只係Delay咗啫…佢最終都係要死…

但係柯志恒諗到另一個問題:佢間房而家多咗一條屍,如果佢報警…自己會唔會變成疑犯?

諗到呢度佢驚咗一驚,所以馬上拎起自己放喺枱面嘅電話,諗住打俾個警察——

前日錄口供嗰陣,佢問嗰兩個警察拎咗卡片——如果係佢兩個,應該會知道自己唔係、亦都無能力咁樣殺人。

用手抹走個Mon上面啲血,佢見到Admin Send咗個Whatsapp俾自己。

 

天才柯志恒!很榮幸可以跟你對話!

設計好下一個害人計劃了嗎?               18:50

 

我唔明你講乜              18:56

 

對方係Admin又好咩人都好,死口唔認就得,呢個亦都係柯志恒一直以嚟嘅做法。

 

不明白嗎?

那麼你能否解釋一下區家純剛才為甚麼衝進來拿回自己的電話?             18:57

 

——你監視緊我間房?柯志恒打緊字嗰陣,見到Admin輸入中…,所以佢停咗手。

 

還好,我抓住這個機會補刀了! 18:57

 

柯志恒見到Admin咁講,將本身打好嗰句嘢Delete咗重新打一次:

 

你用電話嚟殺人同埋監視我間房? 18:58

 

Admin今次好快就覆咗句:

 

全中呀!

你這個高分低能的天才兒童(笑) 18:58

留言

    未有留言

分享